श्रीलंकामा थुनिएका २६ महिलाको उद्धारमा कानुनी झमेला, कुन जेलमा छन् भन्ने नै थाहा छैन

श्रीलंकामा थुनिएका २६ महिलाको उद्धारमा कानुनी झमेला, कुन जेलमा छन् भन्ने नै थाहा छैन

A+ A A-

सरकारले ११ महिनादेखि श्रीलंकाको जेलमा थुनिएको २६ जना नेपाली महिलाहरूको उद्धारका पहल सुरु गरेको छ । ती महिलाको उद्धारमा केही कानुनी समस्या भएको कारण ढिलाई भइरहेको परराष्ट्र मन्त्रालयले जानकारी दिएको छ ।

सरकारले उद्धारका लागि पहल गरिरहेको र कानुनी तथा वैदेशिक रोजगारीसँग जोडिएको विषय भएकाले उद्धारमा केही समय लाग्न सक्ने परराष्ट्र मन्त्रालयकी सह–सचिव तथा प्रवक्ता सेवा लम्सालले जानकारी दिइन् ।

अन्तरदेशको कानुनका कारण श्रीलंकाको जेलमा रहेका उनीहरूको उद्धार गर्न ढिलाइ भएको र उद्धारका लागि परराष्ट्र मन्त्रालयले पहल गरिरहेको उनले बताइन् ।

थुनिएका महिला श्रीलंकाको कुन जेलमा छन् भन्ने पत्ता लगाउन समस्या भएको श्रीलंकास्थित नेपाली दूतावासले परराष्ट्र मन्त्रालय र महिला, बालबालिका तथा ज्येष्ठ नागरिक मन्त्रालयलाई पत्रमार्फत जानकारी गराएको छ ।

उनीहरूमाथि लगाइएको अभियोग प्रस्ट नखुलाइएका कारण तत्काल छुट्ने सम्भावना नरहेको विषय पनि दूतावासले दुवै मन्त्रालयलाई जानकारी गराएको छ ।

उनीहरू लामो समयदेखि जेलमा रहेकाले श्रीलंका अध्यागमन कानुनअनुुसार आर्थिक तथा कानुनी सजाय हुन सक्ने दूतावासले जनाएको छ ।

श्रीलंका सरकारले खाडीका देश रोजगारीका लागि लैजाने श्रीलंकाली एजेन्टलाई पक्रिएर मुद्दा दायर गरेसँगै उनीहरूलाई साक्षी र बयानका लागि जेलमा राखेको हुनसक्ने दूतावासको अनुमान छ ।

मन्त्रालयको मानव बेचबिखन कोषअन्तर्गत आवश्यक रकम छुट्याएर उद्धारको तयारीमा रहेको परराष्ट्र र महिला, बालबालिका तथा ज्येष्ठ नागरिक मन्त्रालयका प्रवक्ता टेकराज निरौलाले जानकारी दिए ।

खाडी देश ताकेर हिँडेका थुप्रै नेपाली महिला श्रीलंकामा अड्किएको हुन सक्ने दूतावासको अनुमान छ । भिजिट भिसामा वैदेशिक रोजगारीका लागि खाडीका विभिन्न देश हिँडेका ती महिलालाई भिसाको म्याद सकिएपछि श्रीलंका प्रहरीले पक्राउ गरेको दूतावासले जनाएको छ ।

चालू आर्थिक वर्षमा भारत र श्रीलंकादेखि एजेन्टमार्फत खाडीका देश हिँडेका ५२ जना महिलाको उद्दार गरी स्वदेश फकाईएको महिला, बालबालिका तथा ज्येष्ठ नागरिक मन्त्रालयले जनाएको छ ।

प्रकाशित मिति: आइतबार, चैत १, २०७७ १३:३६