प्रेमी भेटेर घर फर्किन ढिला भएपछि सामूहिक बलात्कारको नाटक !

A+ A A-

कञ्चनपुरको पुनर्वासमा अज्ञात समूहले १४ वर्षीया एक बालिकालाई अपहरण गरी बलात्कार गरेको भन्ने घटना झुटो सावित भएको छ ।

पुनर्वास नगरपालिका-२ मोतिवस्तीकी १४ वर्षीया एक बालिकाले शुक्रबार साँझ साढे ७ बजेतिर कलम किन्न नजिकैको पसलमा जाने क्रममा मोटरसाइकलमा आएका तीन जना युवाको समूहले आफूलाई अपहरण गरी अज्ञात स्थलमा लगेको र बलात्कार गरी मध्यरातमा सोही ठाउँमा छोडेर गएको भनी दिएको बयान बदलेकी छन् ।

मध्यराति घरभन्दा करिब तीन सय मिटर टाढा सडक छेउमा त्रसित अवस्थामा फेला परेकी ती बालिकाले प्रहरी र परिवारजनलाई दिएको बयान शनिबार साँझ फेरेकी छन् । आफू कलम किन्ने निहुँमा घरबाट निस्केर प्रेमीलाई भेट्न गएको र फर्किँदा अबेर राति भएपछि घरपरिवारको डरत्रासले झुटो बयान दिएको उनको भनाइ छ ।

बालिका हराएको भन्ने खबर पाउनासाथ शुक्रबार रातिदेखि नै अनुसन्धानमा खटिएको प्रहरी टोली समक्ष बालिकाले दिएको पहिलो बयानका आधारमा शनिबार साँझसम्म व्यापक प्रहरी परिचालन गरी अनुसन्धानलाई तीब्रता दिइएको भएपनि अन्ततः बालिकाले घटनालाई तोडमोड गरेर बयान दिएकी छिन् ।

त्यसक्रममा बालिकाका प्रेमी भनिने एक जना किशोरमाथि अनुसन्धान अगाडि बढाइएको जिल्ला प्रहरी कार्यालय कञ्चनपुरका प्रवक्ता एवं प्रहरी नायब उपरीक्षक अमरबहादुर थापा क्षेत्रीले बताए । ती किशोरको स्वास्थ्य परीक्षण पश्चात थप विवरण खुल्ने प्रहरीले जनाएको छ ।

बालिकाको स्वास्थ्य परीक्षणपछि यसअघि नै गरी सम्झाइबुझाइ परिवारको जिम्मा लगाइएको इलाका प्रहरी कार्यालय त्रिभुवनवस्तीका प्रहरी निरीक्षक कैलाश सिंह विष्टले बताए ।

प्रकाशित मिति: आइतबार, चैत १, २०७७ १२:०७