३६ करोडको लागतमा ढल सतह निर्माण हुँदै, डुबानबाट मुक्ति पाउला मिर्चैयाले ?

A+ A A-

प्रत्येक वर्ष वर्षायाम सुरु भएसँगै सिराहाको मिर्चैया क्षेत्र बाढी आए जस्तै जलमग्न हुने गरेको थियो । वर्षायाममा सडक तथा गल्लीमा भेल त बग्थ्यो नै, सडकछेउका घर र पसलहरुमा पनि पानी पस्ने गरेको थियो ।

डुबानको समस्या समाधानको प्रयास हुँदै आएको थियो । यसअघि जिल्ला समन्वय समिति सिराहाले उपभोक्ता समितिमार्फत करिब ३४ लाखको लागतमा मिर्चैया क्षेत्रमा १७५ मिटर नाला निर्माण गरेको थियो ।

तर, नालाको काम कमसल र गुणस्तरहीन हुँदा वर्षाको पानी थेग्न सकेको थिएन । केही भागमा निर्माणाधीन अवस्थामा नाला भत्कियो । डुबानको समस्या जस्ताको त्यस्तै रह्यो । अब भने सो समस्याको दीगो समाधान हुने गरी कार्य भइरहेको छ ।

ढल निर्माणले समस्या समाधानको अपेक्षा गरिएको भए पनि गुणस्तरीय काम हुनुपर्नेमा स्थानीयको जोड छ । ‘वर्षायाममा मिर्चैयामा बाढी आएजस्तै हुन्थ्यो,’ स्थानीय व्यवसायी विनोद महतोले भने, ‘ढल निर्माणले यहाँको मुख्य समस्या समाधान हुने भयो । तर, कामचाहिँ गुणस्तरीय होस् भन्ने हाम्रो चाहना छ ।’

मिर्चैयामा अहिले ह्युम पाइप राख्ने, नाला निर्माण र त्यसक्रममा फुट्ने खानेपानीका पाइप मर्मत, टेलिफोनका तार मर्मत तथा आवश्यकताअनुसार बिजुलीका पोल सार्ने काम निर्माण कम्पनीले गरिरहेको छ ।

एसियाली विकास बैंक (एडीबी), खानेपानी तथा ढल निकास विभाग र मिर्चैया नगरपालिकाको साझेदारीमा ३६ करोड ३३ लाख ६१ हजार पाँच सय ७१ रुपैयाँको लागतमा सतह ढल निर्माण भइरहेको हो । यसमा नगरपालिकाको १५ प्रतिशत बजेट छ भने बाँकी ८५ प्रतिशत बजेट एडीबीको छ ।

पूर्व–पश्चिम राजमार्गको मिर्चैया खण्डमध्ये पश्चिममा जीवा खोलादेखि पूर्व बतहा खोलासम्म सडकको दुवैतर्फ र कटारी चोकदेखि उत्तरमा खानेपानी कार्यालयसम्म सतह ढल निर्माण तथा कटारी चोकदेखि मटियर्वा चोकसम्म नाला गरी साढे ६ किलोमिटर ढल निर्माण गरिने निर्माण कम्पनी बीकोई बिल्डर्स योेगी जेभीका इन्जिनियर राजीवकुमार रायले बताए ।

हालसम्म योजनाको ४५ प्रतिशत काम सकिएको उनले जानकारी दिए । सतह ढल निर्माणका लागि ५२ करोड ८७ हजारको ठेक्का आह्वान भएको थियो । बीकोई बिल्डर्सले ३६ करोड ३३ लाख ६१ हजार रुपैयाँमा निर्माणको जिम्मा पाएको हो ।

२०७६ माघ २० गतेदेखि काम सुरु गरी २०७७ पुस १६ मै काम सम्पन्न गर्नुपर्ने सम्झौता भएको थियो । तर, कोरोना भाइरका कारण उत्पन्न परिस्थितिले काम सञ्चालन गर्न कठिनाइ भएपछि समय थप भएको थियो । अब २०७८ असार १४ भित्र योजना सम्पन्न गर्ने समय तोकिएको छ ।

असारसम्म योजना सम्पन्न गर्ने लक्ष्य भए पनि वर्षा हुने भएकाले त्यस अगावै काम सम्पन्न गर्न निर्देशन दिएको मिर्चैयाका नगरप्रमुख श्रवण कुमार यादवले बताए । सतह ढल निर्माणले मिर्चैयाको वडा नं. ४, ५ र ६ मा हुँदै आएको डुबान र कटान रोकिने उनको भनाइ थियो ।

‘ढल निर्माणले बाटो, सडकको सुरक्षा हुनुका साथै डुबानको समस्या सधैँका लागि अन्त्य हुनेछ,’ उनले भने, ‘डुबान यहाँको ठूलो समस्या थियो, यो योजना सम्पन्न भएपछि नगरलाई थप व्यवस्थित बनाउन अन्य योजना पनि अगाडि सार्छौं ।’

निर्माण कम्पनीले ढल निर्माणको क्रममा खन्ने खाल्डाखुल्डीको माटो उडेर स्थानीयलाई सास्ती भएको छ । ठेकेदारले नियमित रूपमा सडकमा पानी नछर्किएकाले धुलो उडेर हैरानी खेप्नुपरेको स्थानीय दिलीप साहले बताए ।

प्रकाशित मिति: शुक्रबार, फागुन २८, २०७७ १२:४१