प्रदेश २ : ओली समूहमा लागेका सांसद माओवादीमा फर्किन थाले, दलको नेता छान्न सकस

प्रदेश २ : ओली समूहमा लागेका सांसद माओवादीमा फर्किन थाले, दलको नेता छान्न सकस

A+ A A-

पद धरापमा परेपछि प्रदेश २ का प्रदेशसभा सदस्यहरू ओली समूहबाट आफ्नो पुरानो घर माओवादी केन्द्रमै फर्किन थालेका छन् । ओली–प्रचण्ड नेतृत्वको नेपाल कम्युनिस्ट पार्टी (नेकपा)को मान्यता खोसिनुअघि कित्ता परिवर्तन गरी ओली समूहतिर लागेका प्रदेश सांसदहरू माओवादीमा फर्किन थालेका हुन् ।

प्रदेश २ मा माओवादी पृष्ठभूमिका ११ जना प्रदेशसभा सदस्य छन् । तीमध्ये रामचन्द्र मण्डल, कुन्दनप्रसाद कुसवाह, मोहम्मद समीर र ज्वालाकुमारी साह ओली समूहमा लागेका थिए । प्रमिलाकुमारी यादव, भरतप्रसाद साह, रामकुमार यादव, जगतप्रसाद यादव र रुविकुमारी कर्ण सबिक नेकपाको प्रचण्ड–नेपाल समूहमा थिए ।

प्रदेशसभा सदस्यद्वय दिलीप साह र फुलियादेवी सदा भने तटस्थ थिए । ओली समूहमा लागेकी ज्वालाकुमारीले एमालेमै बस्ने निधो गरेकी छन् । ‘पद ठूलो होइन, पार्टी, देश र जनता ठूला हुन् भनेर हामीले माओवादीका अन्य साथीलाई पनि सम्झाएका छौँ’, उनले भनिन्, ‘२०७५ सालमै माओवादी विघटन भइसक्यो । अब म कुनै हालतमा माओवादीमा फर्किन्नँ ।’

उनी संघीय सरकारका सहरी विकासमन्त्री प्रभु साहनिकट मानिन्छिन् । मन्त्री साह आफैँ ओली समूहमा छन् र उनले समेत माओवादीमा नफर्किने बताउँदै आएका छन् ।

ज्वालाकुमारीबाहेक अरु सदस्य भने माओवादीमै फर्किने निचोडमा पुगेका छन् । ओली समूहमा लागेका सांसद रामचन्द्र मण्डलले पार्टी नेतृत्व आफैँ सामन्त शैलीको देखिएकाले केही सांसदहरू माओवादीमा फर्किन नचाहेको बताए ।

‘केही साथी (प्रदेशसभा सदस्य) लाई पद गए पनि माओवादीमा बस्ने मन छैन । तर, एमालेमा बस्न पनि त्यति सजिलो नहोला । हामी छलफलमै छौँ’, उनले भने ।

सांसद भरत साहले ओली समूहमा लागेका सांसदलाई माओवादीमा फर्काउन छलफल भइरहेको बताए । ‘उहाँहरूलाई ससम्मान स्वागत गर्न हामी आतुर छौँ’, उनले भने ।

दलको नेताका लागि रस्साकस्सी

एकीकरणअघि माओवादी संसदीय दलका नेता रामचन्द्र मण्डल ओली समूहमा लागेपछि माओवादीमा अहिले संसदीय दलको नेता चयनको विषय पेचिलो बनेको छ ।

मण्डलले पार्टी नेतृत्व अप्ठेरो परिस्थितिमा हुँदा कित्ता परिवर्तन गरेको, अझै पार्टीमा फर्किने निर्णय गरिनसकेकाले दलको नेता कसलाई बनाउने भन्ने विषयमा छलफल हुने नेताहरू बताउँछन् । दलको नेता बन्न कतिपयले केन्द्रीय नेतासँग लबिङ सुरु गरिसकेका छन् ।

मातृका यादवनिकट महोत्तरीका सांसद भरत साह र दिलीपकुमार साह प्रमुख दाबेदार मानिएका छन् । भरत साहले एकीकरणअघिसमेत संसदीय दलको नेतामा दाबी गर्दै रामचन्द्र मण्डलविरुद्ध उम्मेदवारी दिएका थिए ।

सहमतिमा दलको नेता चयन गर्ने प्रयास विफल भएपछि निर्वाचन भएको थियो, जसमा साह पराजित भएका थिए ।

यही पदमा सांसद दिलीप साहले दाबी गरे पनि उनलाई दलको प्रमुख सचेतक बनाइएको थियो । अहिले भने दलको नेता कसलाई बनाउने भन्नेबारे छलफल सुरु नभएको र चाँडै बैठक बोलाइने सांसद साहले बताए ।

‘यसबारे हामी बसेर छलफल गर्छौं । दाबेदार म पनि छु’, उनले भने, ‘२ चैतमा राष्ट्रिय भेलापछि हामी पार्टीमा छलफल गरेर निर्णय गर्नेछौँ’, साहले भने । मण्डल पार्टीमा फर्किए उनैलाई पुनः दलको नेता बनाउन सकिने साहको भनाइ छ ।

प्रकाशित मिति: बिहीबार, फागुन २७, २०७७ ०९:०२