कैलालीमा बोर्ड राख्ने विषयमा ओली-माधव समूहबीच झडप

A+ A A-

कैलालीमा नेकपा एमालेको माधव नेपाल समूह र केपी ओली समूहका कार्यकर्ताबीच झडप भएको छ । कैलालीको धनगढीस्थित पार्टीको सुदूरपश्चिम प्रदेश कार्यालयमा नेकपा एमालेको साइनबोर्ड राख्ने विषयमा ओली र माधव समूहका कार्यकर्ताबीच झडपको अवस्था आएको हो ।

बुधबार बिहान प्रदेश कार्यालयमा नेपाल समूहले नेकपा एमाले लेखिएको बोर्ड राख्यो । तर, केही समयपछि प्रधानमन्त्री ओली समूहका कार्यकर्ताले उक्त बोर्ड हटाए । उक्त बोर्ड हटाउँदै ओली समूहका कार्यकर्ताले आफ्नो बोर्ड राख्न थालेपछि झडप भएको हो ।

दुवै पक्षबीच झडपको अवस्था आएपछि अहिले सुरक्षाका लागि प्रहरी परिचालन गरिएको छ । प्रहरी नायब उपरीक्षकको नेतृत्वमा प्रहरी परिचालन भएको छ भने सशस्त्र प्रहरीको उपस्थिति छ ।

माधव समूहको बोर्ड हटाएर ओली समूहले राखेको बोर्डमा पनि नेकपा एमाले नै लेखिएको छ । तर, प्रतिशोध साँध्ने हिसाबमा बोर्ड ओली समूहले हटाएको माधव समूहका नेताको आरोप छ । माधव समूहका एक नेताका अनुसार यसरी प्रतिशोध साँध्नेछ हो भने पार्टीका गतिविधि अघि बढाउन आगामी दिनमा समस्या हुनेछ ।

सर्वोच्च अदालतको आइतबारको फैसलाले नेकपा एमाले र नेकपा माओवादी ब्युँताइदिएपछि दुई फरक-फरक पार्टी बनेका छन् । दुई फरक–फरक पार्टी बनेसँगै केन्द्रदेखि जिल्ला र प्रदेशमा बोर्ड राख्ने र कार्यालय स्थापना गर्ने क्रम चलिरहेको छ ।

यही क्रममा सुदूरपश्चिममा पनि मंगलबार बिहान धनगढीमा एमालेको बोर्ड राखिएको हो । तर, उक्त बोर्ड माधव समूहले राखेको भन्दै स्वीकार गर्न नसकिने ओली समूहको तर्क छ ।

त्यसैगरी, कार्यालयमा लेखराज भट्ट एमाले सुदूरपश्चिम इन्चार्ज तोकिएको नेमप्लेट पनि राखिएको छ भने कर्णबहादुर थापा अध्यक्ष रहेका छन् । यसअघि नेकपा एकतापछि भीम रावल इन्चार्ज थिए ।

प्रकाशित मिति: बुधबार, फागुन २६, २०७७ १५:२९