उपभाेक्ता समितिले निर्माण गरेकाे सडक छ महिना नबित्दै भत्कियो, अख्तियारले थाल्यो छानबिन

उपभाेक्ता समितिले निर्माण गरेकाे सडक छ महिना नबित्दै भत्कियो, अख्तियारले थाल्यो छानबिन

A+ A A-

सिरहाको अर्नमा गाउँपालिकामा निर्माण भएको पक्की सडक छ महिना नबित्दै भत्किएको छ । अर्नमा गाउँपालिका- ५ अन्तर्गत रामजानकी चोकदेखि कृष्णपुरसम्मको सडकखण्ड गत आर्थिक वर्ष २०७५/०७६ मा कालोपत्रे गरिएको थियो । सुरेशकुमार यादव अध्यक्ष रहेको उपभोक्ता समितिले करिब १ किलोमिटर कालोपत्रे सडक ५० लाख रुपैयाँको लागतमा निर्माण गरेको थियो ।

करिब १ किलोमिटर लम्बाइ र २२ फिट चौडाइको उक्त सडक निर्माण गरिएको छ महिना पनि नबित्दै ठाउँठाउँमा भत्किन थालेपछि स्थानीयले अख्तियार दुरुपयोग अनुसन्धान आयोगको बर्दिबास कार्यालयमा उजुरी दिएका थिए ।

स्थानीयले उजुरी दिएकाे लामो समयपश्चात् मात्र अख्तियारले उक्त सडककाबारेमा चासो लिएको छ । अख्तियारको टोलीले फागुनको दोस्रो साता यससम्बन्धमा स्थलगत रूपमै बुझेर छानबिन थालेको छ । सडको निरीक्षण गरेको अख्तियारको टोलीले गाउँपालिका कार्यालयलाई सडक निर्माणसम्बन्धी प्रतिवेदन पठाउन निर्देशन दिएको छ ।

सडक निर्माण गर्न उपभोक्ता समिति र गाउँपालिकाका इन्जिनियरबीच आर्थिक लेनदेन भएपछि सडक निर्माणको काम कमसल भएको स्थानीयको आरोप छ ।

फस्ने डरले मर्मत गर्न खोज्दा स्थानीयको अवरोध

सडक भत्केर स्थानीयको उजुरीपश्चात् अख्तियारले चासो लिएपछि फस्ने डरले गाउँपालिकाले सडक भत्किएका ठाउँहरूमा जेसीबी लगाएर मर्मत गर्न खोज्दा स्थानीयले अवरोध गरेका छन् ।

गाउँपालिकाका इन्जिनियर दायाशंकर महतोले सडक मर्मत गर्न खोजेपछि स्थानीयले अवरोध गरेको नेकपाका स्थानीय अगुवा प्रविण यादवले बताए । 'सेटिङमा कमसल काम गरी व्यापक भ्रष्टाचार भएको छ,' उनले भने, 'फस्ने डरले पछि मर्मत गर्न खोजियो, तर हामीले भ्रष्टाचार लुकाउन दिँदैनौँ ।'

गाउँपालिकाले बल प्रयोग गरी अनियमितता छोप्न र अख्तियारको फन्दाबाट उम्किन सडक मर्मत गर्न खोजेपछि अवरोध गरेको उनले जनाए ।

यता, अर्नमा गाउँपालिकाका प्रमुख प्रशासकीय अधिकृत कृष्णानन्द सिंहले भने कुनै किसिमको अनियमितता नभएको दाबी गरे । सवारीको आवतजावत बढ्दा सडक भत्किन पुगेको उनको दाबी छ ।

प्रकाशित मिति: बुधबार, फागुन २६, २०७७ १२:१४