लुम्बिनीमा एमालेलाई पुगेन बहुमत, अब कस्तो बन्ला गठबन्धन ?

A+ A A-

सर्वाेच्च अदालतले नेपाल कम्युनिस्ट पार्टी (नेकपा) को नामसम्बन्धी विवादमा छिनोफानो गर्दै तत्कालीन एमाले र माओवादी केन्द्र ब्युँताएपछि लुम्बिनी प्रदेशको सत्ता समीकरण फेरबदल हुने सम्भावना बढेको छ ।

कुल ८७ जना सांसद रहेको लुम्बिनी प्रदेशसभामा पार्टी एकीकृत रहदासम्म ६१ जना सांसद नेकपाका थिए । पूर्ववत एमाले र माओवादी केन्द्र ब्युँतिएपछि अब लुम्बिनी प्रदेशसभामा एमालेका ४१ सांसद मात्र रहने भएका छन् । यो संख्या बहुमतका लागि आवश्यक संख्याभन्दा कम हो । प्रदेशसभाका २० जना सांसद तत्कालीन माओवादी केन्द्रका छन् ।

सरकार बनाउन ४४ सांसद आवश्यक पर्छ । तर, एमालेबाट निर्वाचित ४१ जना सांसद मात्र भएकाले सरकार टिकाउन अब एमालेले तीन जना सांसदको साथ खोज्नुपर्ने हुन्छ ।

उता तत्कालीन माओवादी केन्द्रबाट निर्वाचित सांसद दधिराम न्यौपाने (माधव शर्मा) ले आफू एमालेमै (ओली पक्षमै) रहने बताएका छन् । न्यौपाने ओली पक्षमा रहँदा एमालेलाई थप दुई जना सांसद अपुग हुन्छ । यस्तो स्थितिमा लुम्बिनीमा एमालेले जनता समाजबादी पार्टीसँग सत्ता समीकरण गर्ने सम्भावना बढेको छ ।

प्रदेशसभामा जनता समाजवादीका छ जना सांसद छन् ।

‘पार्टी ह्वीप लागीहाले पनि माधव जीले हामीलाई साथ दिनुहुन्छ । अरु अपुग संख्यामा जनता समाजवादी वा कसैसँग सहकार्य हुन सक्छ,’ लुम्बिनी प्रदेश सरकारका प्रवक्ता वैजनाथ चौधरीले भने ।

माओवादी केन्द्रले प्रदेश सरकारलाई दिएको समर्थन फिर्ता गरे मुख्यमन्त्री शंकर पोखरेलले नयाँ सरकार निर्माणका लागि नेपाली कांग्रेस वा जसपा दुईमध्ये एक पार्टीको साथ लिनुपर्ने छ । १९ सांसद रहेको कांग्रेससँग सत्ता समीकरण गर्नुभन्दा जसपासँग समिरण बनाउँदा बढी फाइदा पुग्ने एमालेको आँकलन छ ।

चौधरीले अहिले नै प्रदेश सरकार कसरी अगाडि बढ्छ ? भन्ने विषयमा केही भन्न नसकिने बताए । उनले केन्द्रीय कमिटीको बैठकले मात्र त्यसको टुंगो लगाउने जानकारी दिए ।

‘आ–आफ्नो पार्टीले ह्वीप लगाउने वा नलगाउने केही भएको छैन । एकताका लागि नयाँ बाटो पनि तयार छ । एकले अर्कालाई कारबाही भएमा पनि सांसदहरु बाँकी रहदैनन्,’ उनले भने, ‘त्यसैले अहिल्यै यही हुन्छ भन्ने सक्ने अवस्था छैन ।’

प्रदेशसभामा नेकपाका सचेतक रहेका भूमिश्वर ढकाल एमाले र माओवादी केन्द्रको केन्द्रीय कमिटी बैठकले गर्ने निर्णयअनुसार नै सरकार अगाडि बढ्ने बताए । उनले सरकार गिर्न नदिने बताउँदै प्रदेशभित्र वामपन्थी एकता पनि हुन सक्ने बताए ।

प्रकाशित मिति: मंगलबार, फागुन २५, २०७७ ०८:५०