विप्लवलाई पूर्वप्रधानमन्त्रीसरह सरकारी सुरक्षा

सहमतिपत्र हस्ताक्षर कार्यक्रममा एउटै मञ्चमा प्रधानमन्त्री ओली र विप्लव ।तस्वीर : सुशील श्रेष्ठ

A+ A A-

अवकाशप्राप्त अतिविशिष्ट व्यक्ति (भीभीआईपी) र विशिष्ट व्यक्ति (भीआईपी)लाई दिइने सुरक्षाकर्मीको संख्यामा व्यापक कटौती गरेको सरकारले हप्ता दिनअघि मात्र खुला राजनीतिमा ओर्लिएका नेत्रविक्रम चन्द ‘विप्लव’लाई भने पूर्वप्रधानमन्त्रीसरहकै सुरक्षा उपलब्ध गराउँदै आएको छ ।

विप्लवका लागि सरकारले नेपाल प्रहरीका १० जना सुरक्षाकर्मी तैनाथ गरेको छ । सुरक्षासम्बन्धी कार्यविधिअनुसार पूर्वप्रधानमन्त्रीको हकमा मात्रै प्रहरी निरीक्षकको कमाण्डमा सुरक्षा प्रबन्ध गरिन्छ । पूर्वप्रधानमन्त्रीले सशस्त्र प्रहरी निरीक्षकको कमाण्डमा १६ जना सशस्त्र प्रहरी र २ जना नेपाल प्रहरीबाट अंगरक्षक पाउने व्यवस्था छ । अतिविशिष्ट तथा विशिष्ट व्यक्तिको सुरक्षासम्बन्धी कार्यविधि संशोधन गरेर सरकारले पूर्वभीभीआईपी र भीआईपीको सुरक्षामा कतौटी गरेको थियो ।

प्रधानमन्त्रीबाहेकका भीआईपीलाई प्रहरी सहायक निरीक्षकदेखि नायव निरीक्षकसम्मका सुरक्षाकर्मी खटाउने व्यवस्था छ । तर, विप्लव भने यस्ता भाग्यमानी विद्रोही नेतामा दरिए, जसले पूर्वप्रधानमन्त्रीकै हैसियत बराबर प्रहरी निरीक्षककै कमाण्डमा सुरक्षा बन्दोबस्त पाइरहेका छन् । विप्लव राज्यको पदीय हैसियतमा कहिल्यै पुगेका व्यक्ति भने होइनन् ।

काठमाडौंका प्रमुख जिल्ला अधिकारी कालीप्रसाद पराजुलीले विप्लवलाई सुरक्षाकर्मी उपलब्ध गराइएको पुष्टि गरे । ‘सुरक्षा मूल्यांकनको आधारमा गृह मन्त्रालयको निर्देशनमा सुरक्षा व्यवस्था मिलाइएको हो,’ पराजुलीले शिलापत्रसँग भने ।

उसो त विप्लवलाई प्रहरीबाहेक उनको पार्टीले छट्टै सुरक्षाको प्रबन्धसमेत मिलाएको छ । सरकारले २८ फागुन २०७५ मा विप्लव समूहलाई प्रतिबन्ध लगाएपछि भूमिगत कालमा गठन भएको जनसेनाले सुरक्षा दिइरहेको विप्लवनिकट स्रोतको भनाइ छ ।

सरकार र विप्लव समूहबीच २० फागुनमा शान्तिपूर्ण रूपले राजनीति गतिविधि गर्ने, सरकारले पक्राउ गरेका नेता तथा कार्यकर्ताको रिहाइ गर्ने र विप्लव समूहमाथि लगाइएका मुद्दा खारेजी गर्ने तीनबुँदे सहमति भएको थियो ।

फागुन पहिलो साता मात्र सरकारले पूर्वभीभीआईपी र भीआईपीको सुरक्षामा खटिएका सुरक्षाकर्मीको संख्यामा व्यापक कटौती गरेको थियो । आफ्नो पहुँच र प्रभाव देखाउनका लागि पूर्वविशिष्ट पदाधिकारीलाई बर्दीधारी सुरक्षा दस्ता उपलब्ध गराउने गलत संस्कार बसेको भन्दै यस्को विरोध हुँदै आएको छ । त्यसैले पूर्वविशिष्ट पदाधिकारीको सुरक्षाकर्मी हटाउने सरकारी कामको प्रशंसा हुँदै आएको थियो ।

तर, सरकारले भूमिगत जीवनबाट बाहिर आएको विप्लवलाई पूर्वविशिष्ट पदाधिकारीकै हैसियत समान ठूलो संख्यामा सुरक्षाकर्मी खटाएको छ । प्रधानमन्त्री केपी ओलीले प्रतिशोध लिन आफ्ना सुरक्षाकर्मीको संख्या कटाइदिएको नेकपाका अध्यक्ष पुष्पकमल दाहाल 'प्रचण्ड'ले अभिव्यक्ति मात्र दिएनन्, सुरक्षा चुनौती बढेको भन्दै आफ्नो सुरक्षाका लागि पूर्वजनमुक्ति सेना नै राखेका छन् ।

पूर्वराजा ज्ञानेन्द्र शाहलगायत केही पूर्वविशिष्ट पदाधिकारीले गृह मन्त्रालयमा सुरक्षाकर्मीको संख्या बढाइदिन ताकेतासमेत गरेको थिए । विशिष्ट व्यक्तिहरूको सुरक्षामा खटाइएका सशस्त्र प्रहरी बलका जनशक्ति कटाएर सीमा सुरक्षामा लगाउने गृहको नीति छ ।

कार्यविधि नै बनाएर सुरक्षाकर्मी फिर्ता बोलाएको सरकारले ‘विप्लव’को सुरक्षामा पूर्वप्रधानमन्त्रीसरह सुरक्षाफौज पठाउनुलाई अनौठो मानिएको छ ।

प्रकाशित मिति: सोमबार, फागुन २४, २०७७ २१:०३