श्रममन्त्री चौधरीको गुनासो- मिडियाकै कारण म अलमलमा परेँ

A+ A A-

श्रम, रोजगार तथा सामाजिक सुरक्षा मन्त्री गौरीशंकर चौधरीले मिडियाका कारण काम गर्न र सार्वजनिक कार्यक्रममा बोल्न अप्ठ्यारो हुन थालेको बताएका छन् ।

वैदेशिक रोजगार बोर्डको सचिवालयले गरेको वैदेशिक रोजगार अभिमुखिकरण तालिम समापन तथा प्रमाणपत्र वितरण कार्यक्रममा श्रममन्त्री चौधरीले मिडियाले सा-सानो विषयलाई ठूलो मुद्दा बनाएर उठान गर्दा काम गर्न समस्या भइरहेको गुनासो गरे ।

देशभित्र रोजगारी कसरी सिर्जना गर्ने भनेर चिन्तनशील भएर काम गरिरहेका बेला मिडियाले विषयान्तर गरेर समाचार बनाउँदा आफू अलमलमा परेको श्रममन्त्री चौधरीले बताए ।

‘कहिले म्यानपावरसँग जोडेर समाचार आउँछ । कहिले म्यानपावरमा छापा नमार्ने वैदेशिक रोजगार विभागलाई निर्देशन गरेको भनेर सञ्चारमाध्याम समाचार लेखेर अप्ठयारो पर्छन्,’ उनले भने, ‘मिडियाले कतिसम्म जासुस गर्न सकेका होलान । केही बोल्न मिल्दैन, गलत अर्थ लगाउँछन् ।’

उनले आफू श्रममन्त्री भएदेखि वैदेशिक रोजगार क्षेत्र व्यवस्थित गर्न लागिपरेको बताए । श्रममन्त्री चौधरीले भाषण गरेको आधा मात्र शब्द काटेर टिकटक बनाएर आफ्नो बेइज्जत गरेको भन्दै गुनासो गरे ।

मन्त्री चौधरीले जापानमा पनि सरकारी संयन्त्रमार्फत नै श्रमिक पठाउने विषयमा सहमति भइसके पनि त्यसलाई कार्यान्वयन गर्न कार्यविधि अभाव रहेको जानकारी दिए । विगत एक वर्षदेखि कार्यविधि बनाउने विषय थाँती रहेको भन्दै उनले आफूले त्यसलाई अगाडि बढाउन सक्दो पहल गरिरहेको बताए ।

नेपाल र जापानबीच सरकारी संयन्त्रमार्फत नै श्रमिक पठाउने विषयमा सहमति भइसकेको छ । तर, सहमति कार्यान्वयनका लागि आवश्यक कार्यविधि नबनाउँदा सरकारी संयन्त्रमार्फत नेपाली श्रमिक रोजगारीका लागि जापान जान पाएका छैनन् ।

कतारमा विश्व कप फुटवल प्रतियोगितामा सुरक्षा गार्डमा कामदार लिन पहल गरिरहेको श्रममन्त्री चौधरीले बताए । नेपालबाट विश्वका प्रतियोगितामा कामदार लिन नेपालीका लागि कतारी राजदूतसँग छलफल गरिरहेको उनको भनाइ छ ।