मोतिपुर औद्योगक क्षेत्रको शिलान्यास रोक्न स्थानीयले भत्काइदिए मञ्च

A+ A A-

भोलि शिलान्यास हुन लागेको रूपन्देहीको मोतिपुर औद्योगिक कोरिडोरको कार्यक्रमस्थलमा स्थानीयले विरोध गर्दै मञ्च भत्काइदिएका छन् । उक्त औद्योगिक कोरिडोरको भोलि अर्थमन्त्री विष्णु पौडेलले शिलान्यास गर्ने कार्यक्रम तय भएको थियो ।

बिहीबार बिहान डेढ सयभन्दा बढीको संख्यामा आएका स्थानीयले कार्यक्रमका लागि तयार गरिएको मञ्च भत्काइदिएको बुटवल औद्योगिक क्षेत्र व्यवस्थापन कार्यालयका प्रमुख निमेष अधिकारीले जानकारी दिए ।

मञ्च भत्काउनुअघि स्थानीयले औद्योगिक कोरिडोरको शिलान्यास कार्यक्रम रोक्ने चेतावनी दिएका थिए । ५० वर्षदेखि बसोबास गर्दै आएका स्थानीयको वैकल्पिक व्यवस्था नगरी औद्योगिक क्षेत्रको शिलान्यास गर्न लागेको भन्दै स्थानीयले पत्रकार सम्मेलन गरी शिलान्यास कार्यक्रम रोक्ने चेतावनी दिएका हुन् ।

संघर्ष समितिका संयोजक रामप्रसाद पाण्डेले किसानले जोतभोग गरेको जग्गाको लालपुर्जा आफ्नो नाममा गराएर सरकारले जनता लुट्ने काम गरेको आरोप बताए । राज्यबाट गास, बास र कपासको ग्यारेन्टी हुनुपर्नेमा त्यसको व्यवस्थापन गर्न चुकेको उनले आरोप लगाए ।

शुद्धोधन गाउँपालिका- ३ का वडाअध्यक्ष शिव खड्काले कोरिडोर शिलान्यासको विषयमा औपचारिक जानकारी नभएको बताए । नागरिकको गास, बास र कपाससँग जोडिएको विषयमा स्थानीय सरकारसँग समन्वय नै नगरी संघीय सरकारले औद्योगिक क्षेत्रको शिलान्यास गर्न लागेको उनको भनाइ छ ।

१३ फागुन अर्थमन्त्री विष्णु पौडेलले शिलान्यास गर्ने तय भएको भए पनि संसद् पुनर्स्थापना भएपछि सृजित परिस्थितिका कारण कार्यक्रम स्थगन गरिएको थियो ।

स्थानीयको माग सम्बोधन नगरी औद्योगिक क्षेत्र स्थापना भए वर्षौंदेखि बस्दै आएका स्थानीयको गास, बास र कपास खोसिने संघर्ष समितिका सदस्य बाबुराम घिमिरेले बताए । उनका अनुसार रानीगन्ज, साविक मोतिपुर, तिलोत्तमालगायतका क्षेत्रमा ३ हजार बढी घर परिवार बस्दै आएको उनले बताए ।

औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले भने मोतिपुरमा बसोबास गर्दै आएका सबैको माग सम्बोधन हुने बताउँदै आएका छन् । उनले काम अगाडि बढ्दै जाँदा सबैको माग सम्बोधन हुने बताउँदै डीपीआरमा सबैको लागत लिइएको र ईआईएमा बाँकी स्थानीयको सम्बोधन भएको बताए । औद्योगिक क्षेत्र परियोना सञ्चाल हुँदासम्म सबैको माग पूरा हुने उनको भनाइ छ ।

बुटवल उपमहानगरपालिका र तिलोत्तमा नगरपालिकाको क्षेत्रभित्र पर्ने तिनाउ नदीको उकास क्षेत्रको करिब १ हजार बिगाहा क्षेत्रफलमा औद्योगिक क्षेत्र बनाउने गरी दुई वर्ष पहिले नै औद्योगिक क्षेत्र कार्यालयसमेत शुभारम्भ गरिएको थियो ।

यता प्रशासनले भने कडा सुरक्षाका बीच शिलान्यास कार्यक्रम सम्पन्न गर्ने तयारी गरिएको बुझिएको छ ।

प्रकाशित मिति: बिहीबार, फागुन २०, २०७७ १७:२९