आठ वर्षसम्म बनेन विद्यालय भवन

A+ A A-

करिब आठ वर्ष भयो, सिन्धुलीको तीनपाटन गाउँपालिकाको श्री भवानी उच्च माविको भवन बन्न सुरु गरेको । सम्झौताअनुसार काम भएको भए २६ जेठ २०७१ मै भवन बनिसक्नुपर्ने हो । तर, सम्झौता सकिएको सात वर्ष पुग्न लाग्दा पनि भवन बनेको छैन ।

भवन बनाउने जिम्मा पाएको थियो, सिद्धबाबा कन्स्ट्रक्सनले । अवस्था कस्तो छ भने विद्यालय भवन अब चाँडै बन्ला भनेर विश्वास गर्नसमेत मुस्किल छ । जिल्ला विकास समिति (पछि जिल्ला समन्वय समितिमा रुपान्तरण भएको) ले समयमै काम नसकाउने ठेकेदार कम्पनीलाई तीन वर्षअगाडि ८ लाख रुपैयाँ जरिवाना तिराएर काम सकाउने नयाँ भाका तोकिदिएको थियो । तर, कम्पनीले थपिएको अवधिमा समेत भवन त बनाएन नै कम्पनी कारबाहीबाट समेत जोगिँदै आएको छ ।

भारतीय राजदूतावासको सहयोगमा २४ कोठाको ३ तले भवन बनाउने योजना २०६८ मै बनेको थियो । भवन निर्माणका लागि दूतावास र जिल्ला विकास समितिबीच ३ करोड ८८ लाख रुपैयाँ लागतको भवन चार वर्षभित्र सकाउने सम्झौता भएको थियो ।

तर, विद्यालयको भवन त बनेन नै, कहिलेसम्म बन्छ भन्नेमा सम्झौताको एउटा पक्ष जिल्ला समवन्य समितिलाई समेत पत्तो छैन ।

निरीक्षणको जिम्मेवारीसमेत पाएका समितिका प्रमुख डिकबहादुर कार्की ठेकेदारको लापरबाहीले काम अलपत्र परेको बताउँछन् । कार्की भन्छन्, ‘हामीले दबाब दिएपछि ठेकेदारले काम गरेजस्तो गर्छ र फेरि छोडिहाल्छ ।’

सोही क्षेत्रका प्रदेशसभा सदस्य प्रदीप कटुवालसमेत ठेकेदारको गलत नियतले नै काम सम्पन्न हुन नसकेको बताउँछन् । ठेकेदार कम्पनीले जानीजानी ढिलाइ गरेको सबैले बताए पनि कारबाहीबाट उनी किन जोगिँदै आएका छन् भन्ने जवाफचाहिँ कसैले दिँदैनन् ।

ठेकेदार कम्पनीका सञ्चालक दीपक कार्की भने सम्झौता हुँदाको बखतभन्दा अहिले निर्माण सामग्रीको भाउ थामिनसक्नु बढेकाले सम्पूर्ण लागत खर्च पहिल्यै दिनुपर्ने जिकिर गर्छन् । यसका लागि आफूले समन्वय समितिमार्फत भारतीय दूतावासमा अनुरोध गरे पनि सुनुवाइ नहुँदा समस्या परेको कार्कीको दाबी छ । यद्यपि निर्माण सम्झौतामा अग्रिम भुक्तानीको सुविधाबारे केही उल्लेख छैन । ‘अग्रिम भुक्तानी पाए मात्र म काम गर्न सक्छु, नत्र सक्दिनँ,’ उनी भन्छन् ।

जस्तापाताले ओतिएका स-साना कक्षाकोठा छन् । पानी पर्दा टिनको छानामा पट्ट आवाज आएर पढ्न र पढाउन मुस्किल हुन्छ । ‘पानी पर्न थालेपछि शिक्षकले पढाएको न विद्यार्थी सुन्छन्, न हामी ठूलो आवाजमा पढाउन नै सक्छौँ,’ शिक्षिका यशोदा काफ्ले भन्छिन्, ‘ पढाइमा असर भइरहन्छ ।’

नयाँ भवन बनेपछि सुविस्तासँग पढ्न पाइन्छ भन्ने आस अब मर्न थालेको १० कक्षाकी विद्यार्थी बबिता घिमिरे बताउँछिन् । ‘अब हामीले त नयाँ भवनमा पढ्न नपाउने नै भयौँ । तल्ला कक्षाका विद्यार्थीले पनि कहिले पाउने हुन्, थाहा छैन । नयाँ भवन बन्छ भनेको यत्रो वर्ष भइसक्यो,’ उनले भनिन् ।

विद्यालयमा ६ सयभन्दा बढी विद्यार्थी अध्ययनरत छन् । तर, पर्याप्त कक्षाकोठा नहुँदा पठनपाठनमा समस्या भइरहेको प्रधानाध्यापक पवन दाहालको गुनासो छ । ‘एकैपटक पुरै कक्षा चलाउन १६ वटा कोठा चाहिन्छ । हामीसँग १० वटा कोठा मात्र छन्,’ उनले भने, ‘अपुरो भवनभित्र जोखिम मोलेर केही कक्षा चलाइरहेका छौँ ।’

समन्वय समितिमार्फत आफूहरूले भवन निर्माण पूरा गरिदिन धेरैतिर हारगुहार गरे पनि केही सीप नलागेको दाहाल बताउँछन् । उजुरी हाल्न जाँदा समितिले ठेकेदारलाई काम सकाउन लगाइदिने बचन दिएर फर्काएको समेत उनले बताए ।

गाउँपालिकाकै सबैभन्दा पुरानो विद्यालयमा गनिन्छ, यो । तर, भौतिक सुविधा भने निम्नस्तरको छ । नयाँ भवन नबनेकोमा विद्यार्थी, शिक्षकदेखि अभिभावकसम्म आक्रोशित छन् । स्थानीय नीमलाल तामाङ भन्छन्, ‘जताततै भ्रष्टाचार मात्र छ, हाम्रा छोराछोरी पढ्ने स्कुलसमेत यो हालतमा पुग्दा रिस त उठ्छ नि ।’

प्रकाशित मिति: बुधबार, फागुन १९, २०७७ १७:३८