८ लाख रुपैयाँ कमिसन बरामद प्रकरण : अख्तियारको टोलीबाट कसरी उम्किए गाउँपालिका अध्यक्ष राउत ?

८ लाख रुपैयाँ कमिसन बरामद प्रकरण : अख्तियारको टोलीबाट कसरी उम्किए गाउँपालिका अध्यक्ष राउत ?

A+ A A-

धनुषाको बटेश्वर गाउँपालिकाका अध्यक्ष डम्बरबहादुर राउत चढेको सरकारी गाडीबाट अख्तियार दुरुपयोग अनुसन्धान आयोगको टोलीले कमिसनबापतको ८ लाख रुपैयाँ बरामद त गर्‍यो ।

तर, त्यही गाडीमा सवार गाउँपालिका अध्यक्ष राउत भने अख्तियारको टोलीबाट उम्किए । अख्तियारलाई छलेर भागेका उनी अझैसम्म पक्राउ पर्न सकेका छैनन् ।

राउतले कमिसनबापतको ८ लाख रुपैयाँ बोेकेर हिँडेको सुइँको पाएपछि अख्तियारको टोलीले उनलाई पछ्याएको थियो । शक्ति र सत्ताको आडमा अध्यक्ष राउतका गाडीचालकलाई फसाएर उनलाई जोगाउन खोजिएको भन्दै मंगलबार बिहानैदेखि गाउँपालिकाको कार्यालयअगाडि स्थानीय धर्ना बसेका छन् ।

स्थानीयले अध्यक्ष राउतको कार्यकक्षअगाडिको ढोकामा ‘भ्रष्टाचारी गाउँपालिका अध्यक्षलाई कारबाही गर’, ‘८ लाख घूस लिने घूसखोरी अध्यक्ष मुर्दावाद’ र ‘गाउँपालिकाको सम्पूर्ण विकास योजना सार्वजनिक गर,’ जस्ता नारा लेखिएको पम्पलेट समेत टाँसिदिएका छन् ।

अध्यक्ष राउतलाई पक्राउ गरेर पछिल्लो तीन वर्षमा गाउँपालिकाले गरेको खर्चको हरहिसाब पारदर्शी गर्नुपर्ने मागसहित स्थानीयले गाउँपालिकाको कार्यालयमा तालाबन्दी गरेका हुन् ।

'अध्यक्षजीले कमिसन नलिई कुनै योजनाको भुक्तानी दिइराख्नुभएको थिएन । हामीले गुनासो गर्दा उल्टै हप्काउनुहुन्थ्यो । तर, अहिले प्रमाणसहित उहाँको भ्रष्टाचारी गतिविधिको पर्दाफास भएको छ,’ स्थानीय अजय राउतले भने, ‘उहाँलाई तुरुन्तै पक्राउ र सबै हरहिसाब पारदर्शी नभई हामी ताल्चा खोल्दैनाैँ । भोलिदेखि थप कडा आन्दोलनमा उत्रिन्छौँ । ’

अख्तियार दुरुपयोग अनुसन्धान आयोगको बर्दिबास कार्यालयमा विभिन्न योजनामा अनियमितता भएको भन्दै बटेश्वर गाउँपालिकाबाट यस आर्थिक वर्षमा मात्र डेढ दर्जनभन्दा बढी उजुरी परेका छन् ।

स्वास्थ्यचौकी निर्माण, सोलार बत्ती जडान, भवन, नाला निर्माणलगायतका शीर्षकमा अख्तियारको बर्दिवासस्थित कार्यालयमा बटेश्वर गाउँपालिका तथा अध्यक्ष राउतविरुद्ध उजुरी परेको बताइएको छ । तत्कालीन एमालेबाट अध्यक्षमा निर्वाचित भएका उनी पछिल्लो समय नेकपा ओली समूहमा लागेका छन् ।

अख्तियारको टोलीलाई छलेर यसरी उम्किए अध्यक्ष राउत

बटेश्वर गाउँपालिका-४ स्थित बटेश्वर गाउँपालिका कार्यालयको निर्माण कार्यसम्पन्न भइसकेको भन्दै भुक्तानीका लागि ठेकेदारले अध्यक्ष राउतलाई करिब डेढ महिनादेखि ताकेता गरिरहेका थिए ।

तर, अध्यक्ष राउतले गुणस्तरहीन काम गरेको र समयमा काम पूरा नगरेको भन्दै ठेकेदारसँग मोटो रकम कमिसन माग्दै आएका थिए । कमिसन नदिएकै निहुँमा अध्यक्ष राउतकै निर्देशनमा गाउँपालिकाको कार्यालयले लामो समयदेखि ठेकेदारको भुक्तानी रोकेको थियो । ठेकेदारले सम्झौताअनुसार काम सम्पन्न गरिसकेको अवस्थामा समेत अध्यक्ष राउतकै दबाबमा ठेकेदारले रङरोगनलगायतका थप काम समेत गरेका थिए ।

अध्यक्ष राउतको कमिसन आतंकबाट आजित भइसकेपछि ठेकेदारले अख्तियारको केन्द्रीय कार्यालय टंगालमा उजुरी गरेका थिए । अख्तियारले छानविन थाल्यो । सोमबार दिउँसो करिब ३ बजेसम्म अध्यक्ष राउत बटेश्वर बजारमै साथीहरूसँग चिया पिउँदै गर्दा उनको फोनमा घण्टी बज्यो ।

स्थानीय साथीहरूलाई इलाका प्रहरी कार्यालय महेन्द्रनगरका प्रहरी निरीक्षकले चिया खान बोलाएको भन्दै ड्राइभरसहित उनी हिँडे । र, करिब ४ बजे त्यहाँबाट प्रदेश २-००२-००१ झ ०००२ नम्बरको गाडीमा उनी कमिसनबापतको रकम लिएर फर्किँदै गर्दा उनलाई अख्तियारको टोलीले पछ्याएको थियो ।

महेन्द्रनगरबाट राजमार्ग कटेलगतै अख्तियारको टोलीले आफूलाई पछ्याइरहेको सुइँको राउतले पाए । चालकलाई इशारा गर्दै अध्यक्ष राउतले तीव्र गतिमा गाडी चलाएर खोला हुँदै गाउँपालिकातिर लैजान निर्देशन दिए । त्यही क्रममा अध्यक्ष राउतले ८ लाख घूस रकम भएको झोला औरही खोलानजिकको झाँडीमा फालेर गाडीबाट ओर्लिएर फरार भए । पछ्याउँदै गरेको अख्तियारको टोलीले पछि सो रकम भएको झोला फेला पारेको थियो ।

गाडी चालक वीरबहादुर मगरलाई अख्तियारको टोलीले गाउँपालिकाको कार्यालयनजिकैबाट नियन्त्रणमा लिए पनि गाउँपालिकाका अध्यक्ष राउत अझै पक्राउ पर्न सकेका छैनन् । उनको खोजी भइरहेको धनुषाका प्रहरी नायब उपरीक्षक मकेन्द्र मिश्रले बताए ।

प्रकाशित मिति: बुधबार, फागुन १९, २०७७ १४:१४