उच्च अदालतले धरौटी बढाइदिएपछि उपप्राध्यापक चलाउनेप्रति नेविसंघको प्रतिशोध !

उच्च अदालतले धरौटी बढाइदिएपछि उपप्राध्यापक चलाउनेप्रति नेविसंघको प्रतिशोध !

विद्यार्थी आक्रमणको चिनो : अहिले पनि वैशाखी टेकेर मात्र यताउता हिंडछन्, उपप्राध्यापक प्रेमबहादुर चलाउने । तस्विर साभार रेशम थापाकाे ट्विटर

A+ A A-

त्रिभुवन विश्वविद्यालयका उपप्राध्यापकमाथि हमला गर्ने आरोपित धरौटीमा छुटेलगत्तै उनीहरु आबद्ध संगठनले धम्कीपूर्ण सूचना जारी गरेको छ । पाटन उच्च अदालतले ५ लाख रुपैयाँ धरौटीमा छोड्ने आदेश दिएको ३ दिनपछि नै त्रिभुवन विश्वविद्यालयको नेपाल विद्यार्थी संघको इकाइ समितिले उपप्राध्यापक प्रेमबहादुर चलाउनेलाई क्वाटरबाट हटाउने २४ घण्टे अल्टिमेटम दिएको हो ।

चलाउनेमाथि विभिन्न लाञ्छना लगाउँदै नेविसंघले १६ फागुनमा विश्वविद्यालयसमक्ष माग राख्दै सूचना प्रकाशित गरेको छ । उपाध्यक्ष सहदेव तिमिल्सेनाद्धारा हस्ताक्षरित सूचनामा चलाउनेलाई नक्कली घाइतेको संज्ञा दिँदै नेविसंघका कार्यकर्तालाई झूटा मुद्दा लगाएको दाबी गरिएको छ ।

कृष्णप्रसाद सिटौला निकट नेविसंघको इकाइ समितिका अध्यक्ष हरि आचार्य र सचिव योगेन्द्र रावललाई प्रहरीले चलाउनेलाई आक्रमण गर्ने मुख्य योजनाकार मानेर मुद्दा दर्ता गरेको छ । तिमिल्सेना नेविसंघको यही गुटका उपाध्यक्ष हुन् ।

ज्ञातव्य रहोस् चलाउनेलाई त्रिभुवन विश्वद्यालय परिसरमा गत २० असोजमा नेविसंघका आचार्य, रावलसहितका आधा दर्जनले हमला गरेर गम्भीर घाइते बनाएका थिए । विद्यार्थीका हमलाबाट अचेत बनेका चलाउनेले दुई साता ललितपुरकाे मेडिसिटी अस्पतालमा बसेर उपचार गराएका थिए । उनको दाहिने गोडा अपरेसन भएपनि अझै राम्ररी चल्दैन ।

अहिले पनि उनी वैशाखीको साहरामा सामन्य हिँड्डुल मात्र गर्छन् । आक्रमणको आलो निशाना लिएर बाँचिरहेका चलाउनेलाई नेविसंघले भने सहप्राध्यापक हुने लोभमा आफैं नक्कली घाइते भएको उल्टै आरोप लगाएको छ । नेविसंघको यस्तो लाञ्छना अदालतले धरौटी रकम बढाउने निर्णयपछिको विक्षिप्त मानसिकता भनी टिप्पणी गरे । उनी भन्छन्, ‘अपराधीले आफ्ना कुकर्म छोप्न यस्ता बनावटी कुरा गर्छन् । यसले उनीहरुमा अलिकति पनि गलत कामको ग्लानी नभएको पुष्टि गर्छ ।’

यसका साथै अनाधिकृत रुपमा क्वाटरमा बसोबास गरेको भन्दै चलाउनेलाई २४ घण्टाभित्र हटाउन समेत केन्द्रीय क्याम्पसलाई चेतावनी दिँदै सूचना जारी गर्दै केन्द्रीय क्याम्पसका प्रमुखको कार्यकक्षमा तालबन्दी गरेको छ ।

प्राध्यापक क्वाटरमा मापदण्ड विपरित चलाउने बसिरहेको नेविसंघको आरोप छ । चलाउनेले आफू विश्वविद्यालयको नियमानुसार मासिक ६ हजार रुपैयाँ तिरेर क्वाटरमा बसिरहेको बताए । तर विश्वविद्यालयले नियम, पद्धतिभन्दा राजनीतिक पहुँचका आधारमा क्वाटर बाँडफाँड गरेको उनले बताए । ‘८० प्रतिशत क्वाटर राजनीतिक शक्तिका आडमा प्रयोग भएको छ,’ उनले भने, ‘म यहाँ बस्न आउँदा विधि, पद्धति केही थिएन । ८० प्रतिशत जसरी आए म पनि त्यसरी नै आएको हो ।’

चलाउनेका अनुसार प्राध्यापक बस्ने क्वाटरमा विश्वविद्यालयका कर्मचारीदेखि विद्यार्थी नेतासम्मले रजाइँ गरिरहेका छन् । ‘तर नेविसंघले त्यो विकृतिबारे बोलेको छैन । खाली मलाई मात्रै बद्मास देखाउन खोजेका छन्,’ उनले भने, ‘यसले पनि उनीहरुको नियत प्रस्ट हुन्छ । उच्च अदालतले धरौटी रकम बढाएर सजाय गरेकोले उनीहरु विक्षिप्त बनेका हुन् ।’ आफ्नो न्यायिक लडाइँलाई कमजोर बनाउन क्वाटरको गलत कुरा उठाएको चलाउने दाबी गरे । उनले थपे, ‘जसरी हुन्छ उनीहरु मेरो न्यायिक संघर्षलाई कमजोर बनाउन चाहन्छन् । आफ्नो मूल अपराध छोपेर विषयवस्तु मोड्न उनीहरुले यस्ता आधारहीन कुरा गरेका हुन् ।’

यसअघि पनि जिल्ला अदालत काठमाडौंले गत मंसिरमा उनीहरुलाई धरौटीमा रिहा गर्ने आदेश दिएपछि उनीहरुले विश्विद्यालय परिसमा शक्ति प्रदर्शन गरेका थिए । २२ मंसिरमा उनीहरुले उपकुलपति धर्मकान्त बाँस्कोटाको राजीनामा माग्दै विरोधसभा गरेका थिए, जसको नेतृत्व नोपली कांग्रेसका नेता रामचन्द्र पौडेल गुटका श्यामचन्द्र अधिकारीले गरेका थिए । त्रिभुवन विश्वविद्यालयमा केन्द्रीय क्याम्पसमा कांग्रेसका गुटगत इकाइ समिति छन् ।

चलाउनेलाई नेविसंघका नेताद्धय आचार्य र रावलसहितका ७ जनाले आक्रमण गरेको आरोपमा अदालतमा ज्यान मार्ने उद्योगको कसुरमा मुद्दा दायर भएको छ । अन्य आक्रमणकारीलाई प्रहरीले पक्राउ गरेपनि नेताद्धयलाई भने फरार अभियुक्तको रुपमा अभियोजन लगाएको थियो ।

दुवै जना १५ मंसिरमा सुटुक्क अदालतमा हाजिर भएका थिए । सोही दिन दुवै जना जनही ५५ हजार रुपैयाँ धरौटीमा छुटेका थिए । आफूलाई जीनवमरणको दोसाँधमा पुग्ने गरी हमला गर्नेलाई थुनामै राखेर मुद्दा सुनुवाई गर्नुपर्ने माग गर्दै चलाउने जिल्लाको आदेशविरुद्ध उच्च अदालत पुगेका थिए । आफ्नो ज्यान जोखिममा रहेकोले अभियुक्तलाई थुनामा राखेर मुद्दा छिन्नुपर्ने चलाउनेमा माग थियो ।

उच्च अदालतका मुख्य न्यायाधीश कुमार चुडाल र न्यायाधीश किरण पोखरेलको इजलासले आचार्य र रावल दुवैलाई धरौटी रकम बढाउने आदेश दिएको थियो । आदेशलगत्तै नेविसंघले प्रतिशोधपूर्ण कदम चालेको हो । उच्च अदालतमा मुद्दा विचाराधीन रहेकै बेला समेत नेविसंघले आफ्ना नेता÷कार्यकर्तामाथिका झूटा मुद्दा फिर्ता लिनुपर्ने भन्दै विरोध प्रदर्शन गरेको थियो ।

विश्वविद्यालयका गुरुलाई कुटपिट गर्ने विद्यार्थीमाथि यसअघि सार्वजनिक अपराध, अभद्र व्यवहारमा मुद्दा चलाउँदा कारबाहीबाट जोगिँदै आएकोले यस्ता घटनाको बढोत्तरी भएकोले प्रहरीले चलाउनेमाथि आक्रमण गर्नेलाई ज्यान मार्ने उद्योगमा मुद्दा दायर गरेको हो । यो मुद्दाका आरोपितले सजाय पाएमा यस्ता घटना नियन्त्रणमा सहयोग पुग्ने प्रहरीको अनुमान छ ।

आरोपितमध्येका एक रविनकुमार लामाले त जिल्ला अदालत काठमाडौंको इजलासमा बयान दिँदा आफू घटना भएको बेला त्यहाँ पुगेका स्विकारेका थिए । चलाउनेलाई रड, भाटा प्रयोग गरी आक्रमण गरेको प्रहरीको दाबी छ ।
दलीय द्धन्द्धका कारण त्रिभुवन विश्वविद्यालय केन्द्रीय क्याम्पसको समाजशास्त्र विभागको विभागीय प्रमुख नियुक्तिमा विवाद थियो । १ भदौमा विश्वविद्यालयले विभागीय प्रमुख टीकाराम गौतमलाई हटाएर युवराज लुइँटेललाई ल्याएको थियो । गौतम कांग्रेस निकट हुन् भने लुइँटेल वामपन्थी विचारका ।

त्यसपछि नै विश्वविद्यालयमा विवाद चरम बन्दै गएको थियो । नेविसंघले यस निर्णयको विरोध गरेपछि चलाउने विवाद मिलाउन अगुवाइमा थिए । नेविसंघले विभागमा तालाबन्दी ग¥यो । विवाद नमिलेपछि विश्विद्यालय अदालतको शरणमा पुगेको थियो । अदालतले तालाबन्दी खोल्न आदेश दिएपछि चलाउनेसहितका शिक्षकहरुले ताला खोलेका थिए ।

यसपछि चलाउनेमाथि आक्रमण भएको थियो, जसको अन्तिम छिनोफानो जिल्ला अदालत काठमाडौंले लगाउनै बाँकी छ । अदालतले अभियुक्तहरुलाई धरौटीमा छोडेपनि उनीहरु निर्दोष भईसकेका छैनन् । तर विश्वविद्यालयमा फर्केर उनीहरुले प्रतिशोध लिन भने थालिसकेका छन् ।

प्रकाशित मिति: मंगलबार, फागुन १८, २०७७ २२:३६