बुटवलका सामुदायिक विद्यालय देशभरका पालिकामै उत्कृष्ट

A+ A A-

सामुदायिक विद्यालयको कार्यसम्पादनमा बुटवल उपमहानगरपालिका मुलुकमै उत्कृष्ट ठहरिएको छ ।

मुलुकभरका सबै पालिकाबाट नमुना विद्यालयका रुपमा छनोट गरिएका करिब एक हजार सामुदायिक माध्यमिक विद्यालयको कार्यसम्पादन मूल्यांकनका आधारमा बुटवल देशभरकै पालिकामा प्रथम भएको हो ।

शैक्षिक गुणस्तर परीक्षण केन्द्रले देशभरिबाट नमुना विद्यालयका रुपमा छनोट गरेका सामुदायिक विद्यालयको कार्यसम्पादनको परीक्षण गरेको थियो ।

शैक्षिक गुणस्तर परीक्षण केन्द्रले हालै प्रकाशित गरेको परीक्षणको समष्टिगत प्रतिवेदनमा बुटवल उपमहानगरपालिका सामुदायिक माविको कार्यसम्पादन उत्कृष्ट पाइएको हो । विद्यालयको भौतिक संरचना, शिक्षकको योग्यता तथा उपलब्धता र समुदायबाट विद्यालयलाई प्राप्त भौतिक सहयोगलाई लगानी मानेर मूल्यांकन गरिएको थियो ।

परीक्षणका लागि रुपन्देहीका सबै १६ वटै पालिका परेका थिए । बुटवलका २० वटा सामुदायिक विद्यालयको मूल्यांकन गरिएको थियो । रुपन्देहीसहित देशैभरका पालिकाबाट बुटवल उत्कृष्ट भएको शैक्षिक गुणस्तर परीक्षण केन्द्रको प्रतिवेदनमा उल्लेख छ ।

शिक्षाको विकासका लागि बुटवलमा भएको योजनाबद्ध तथा दिगो विकास लक्ष्य अनुरुपका कामको नतिजा मानिएको र आगामी वर्षमा अझ सुधारका लागि हौसला बढाएको उपमहानगरका मेयर शिवराज सुवेदीले बताए ।

समग्र उपमहानगरलाई एउटा विद्यालय अर्थात् सिकाइ स्थलका रुपमा विकास गर्दै मुलुकभरमै पहिलो पटक शैक्षिक संगोष्ठी, स्थानीय पाठ्यक्रम निर्माण, पाठ्यपुस्तक छपाई तथा पठनपाठन गराउनेदेखि अतिरिक्त क्रियाकलापमा समेत उत्कृष्ट बनाउने गरि योजना तय भएको सुवेदी बताउँछन् ।

शैक्षिक गुणस्तर परीक्षण केन्द्रबाट कार्यसम्पादन परीक्षण गरिएका मुलुकभरका १३ जिल्लाका ९ सय ९६ विद्यालयमध्ये ८३ दशमलव २ प्रतिशत विद्यालयको कार्यसम्पादनको अवस्था सामान्य देखिएको छ । उत्तम कार्यसम्पादन भएका विद्यालय दुई वटा मात्र देखिएको छ । ती दुई वटामा एउटा बुटवलको र अर्को दार्चुलाको रहेका छन् ।

कार्यसम्पादन परीक्षणमा मध्यम खालका विद्यालयको प्रतिशत सबैभन्दा धेरै बुटवल उपमहानगरमा पाइएको छ । यो २० दशमलव ३ प्रतिशत रहेको छ । सबैभन्दा कम अर्थात् ७ प्रतिशत रोल्पामा रहेको छ । औसत अंकमा बुटवलमा विद्यालयको सबैभन्दा बढी ९० अंक छ भने कममा ६० प्रतिशत छ । रुपन्देहीकै अरु पालिकामा बढी अंक ८१ मात्रै छ भने कममा ४० छ ।

परीक्षणमा बुटवलका २० ओटा सामुदायिक विद्यालय, तिलोत्तमा नगरपालिकाका २०, सैनामैना नगरपालिकाका १३, देवदह नगरपालिकाका १३, सिद्धार्थनगर नगरपालिकाका ९, लुम्बिनी सांस्कृति नगरपालिकाका ७, कञ्चन गाउँपालिकाका ९, गैडहवा गाउँपालिकाका ९, मायादेवी गाउँपालिकाका ८, रोहिणी गाउँपालिकाका ७ वटा सामुदायिक विद्यायलको मूल्यांकन परीक्षण गरिएको थियो ।

यस्तै सियारी गाउँपालिकाका ७, सुद्धोधन गाउँपालिकाका ६, सम्मरीमाई गाउँपालिकाका ३, ओमसतिया गाउँपालिकाका ३ , कोटहीमाई गाउँपालिकाका ५ र मर्चवारी गाउँपालिकाका ४ वटा सामुदायिक विद्यालयको कार्यसम्पादन परीक्षण गरिएको थियो ।

बुटवल उपमहानगरपालिका अन्तगर्त ३९ सामुदायिक विद्यालय छन् । यीमध्ये रात्रि मावि, महिला विद्यालय, खुला विद्यालय, सुस्त मनस्थितिका बालबालिकाका लागि विशेष विद्यालय, गुरुकुल विद्याश्रम र तीन वटा मदरसा विद्यालय सञ्चालनमा छन् । कक्षा १ देखि १२ सम्म बुटवलका सामुदायिक विद्यालयमा अध्ययन गर्ने विद्यार्थीको संख्या करिब २३ हजार छ ।

शैक्षिक गुणस्तर परीक्षण केन्द्रले शैक्षिक निकायहरूको कार्यसम्पादन परीक्षण ढाँचा तयार पारेर परीक्षण गर्दै आएको छ । विद्यालयमा गरिएको लगानी, प्रक्रिया, उपलब्धि, विद्यार्थी संख्या र नतिजालाई विषयक्षेत्र निर्धारण गरिएको छ । लगानी अन्तर्गत विद्यालयको भौतिक पूर्वाधार, शिक्षक र समुदायको सहभागितासम्बन्धी सूचक छन् । प्रक्रियामा कक्षा शिक्षण, विद्यार्थी मूल्यांकन, शिक्षकको पेसागत विकास, नेतृत्व र व्यवस्थापन तथा अतिरिक्त क्रियाकलापसम्बन्धी सूचक छन् ।

उपलब्धि सम्बद्ध सूचकमा विद्यार्थीको विद्यालयमा नियमितता, विद्यालय छाड्ने र कक्षा दोहोर्‍याउने दर, विद्यार्थीको औसत सिकाइ उपलब्धि, सेवाग्राही सन्तुष्टि र शिक्षकको पेसागत सन्तुष्टि सम्बद्ध सूचकका आधारमा मूल्यांकन गरिएको थियो । यी समग्र पक्षमा मुलुकभरका पालिकामा बुटवल उत्कृष्ट भएको हो ।

शैक्षिक गुणस्तर परीक्षण केन्द्रले तयार पारेको ‘सामुदायिक माध्यमिक विद्यालयहरूको कार्यसम्पादन परीक्षण २०७५-७६ को समष्टिगत प्रतिवेदन, २०७७’ मा विद्यालयमा सामुदायको सहभागिता, चासो र लगानी बढाउनुपर्ने र निजी विद्यालयको समेत कार्यसम्पादन परीक्षण नियमितरुपमा गर्ने/गराउने नीतिगत व्यवस्था गर्न सम्बन्धित मन्त्रालयलाई सुझाव दिएको छ ।

प्राध्यापक, निवृत्त अधिकारी र पूर्व शिक्षकहरू समेत सहभागी विज्ञ टोलीले सामुदायिक विद्यालयको मूल्यांकन गरेर प्रतिवेदन तयार पारेको हो ।

प्रकाशित मिति: मंगलबार, फागुन १८, २०७७ २०:००