गगनको भाषण सुनेपछि सहभागीले भने, ‘केन्द्रमा साँढे जुध्छन्, बाली हाम्रो मिचिन्छ’

गगनको भाषण सुनेपछि सहभागीले भने, ‘केन्द्रमा साँढे जुध्छन्, बाली हाम्रो मिचिन्छ’

A+ A A-

सिन्धुलीको तीनपाटन गाउँपालिकामा छ, चकमके बजार । याे पहाडी बजारमा मध्य फागुनमा एकाएक राजनीतिक चहलपहल बढ्यो । कारण थियो, कांग्रेस नेता गगन थापा आमसभालाई सम्बोधन गर्न आउनु ।

अघिपछि शान्त देखिने कार्यकर्तासमेत ‘जय नेपाल’ भन्दै बजारतिर झर्न थाले । यही मौकामा आउँदो महाधिवेशन र चुनावका लागि आफ्नो प्रभाव बढाउनेतर्फ स्थानीय नेता/कार्यकर्ताको सक्रियता देखिन्थ्याे ।

‘नेकपाका कारण बन्धक बनेको संसद्बाट देशलाई अब कांग्रेसले निकास दिन्छ’, थापाले चकमकेको मैदानमा ठोकुवा गरे । उनी कतै आक्रोशित, कतै भावुक सुनिन्थे । स्टेजमा बस्नेको गर्जन र तल बस्नेको हुटिङले चकमके बजारमा राजनीतिक तातो बढेको थियो ।

सहभागीको गगन मोह अचम्मकै थियो । जब-जब कार्यक्रम सञ्चालक मुकेश घिमिरेले गगन थापाको नाम लिन्थे, तब ताली र हुटिङको वर्षा हुन्थ्यो । गगनको भाषणमा उनीहरूले ताली बजाइरहे । ‘यत्तिको नेता हुने हो भने त देश बनिहाल्छ नि’, स्थानीय भक्तबहादुर तामाङ भन्छन्, ‘तर के गर्नु, राम्रोलाई माथिबाटै बन्न दिँदैनन् ।’

उनको गुनासो राजनीतिमा बुढा नेताहरूको सिन्डिकेटप्रति थियो । अर्का सहभागी शुक्रबहादुर घलान भन्छन्, ‘केन्द्रदेखि आएका नेता हुन्, न केही विकास गर्दिने कुरा पो गरिहाल्छन् कि भनेर हेर्न आएको म त ।’ राजनीतिक सुझबुझ नभए पनि युवानेताहरूबाट अधिक अपेक्षा राखेको पनि उनले बताए ।

सहभागीले आफ्नो मोबाइल ठड्याएर भिडियो खिचिरहेका थिए । भाषणको भिडियो खिचिरहेकी सम्झना कोइरालाले भनिन्, ‘भिडियो भरे टोलछिमेकमा देखाउन हुन्छ भनेर खिचेकी ।’

सभामा उपस्थित व्यक्ति गगनले बोल्ने शैलीबाट प्रभावित थिए । स्थानीय रुमाने दमाईंलाई गगनको भाषणशैली एमालेका तत्कालीन महासचिव मदन भण्डारीको जस्तै लाग्यो रे । ‘गगन अहिलेका मदन भण्डारी नै हुन्’, उनले प्रस्ट्याए, 'मैले विषयवस्तुको कुरा गरेको होइन, भाषणको शैली भनेको ।'

गाउँमा सभा हुनु भनेको बजारमा मेला लाग्नुजस्तै हो । कांग्रेस सभाका आधाआधी सहभागी बजारमा घुमफिर र किनमेलमै व्यस्त थिए । बजार आएको मौकामा घरायसी सरसामान किनेर लग्ने ध्याउन्नमा थिए उनीहरू । बजारमा घुमिरहेकी खिला मगर भन्छिन्, ‘बल्लबल्ल बजार झर्न पाइन्छ । अलिअलि किनमेल त गर्नैपर्‍यो नि ।’

सँगै रहेका भीमबहादुर क्याप्छाकी भन्दै थिए, ‘छोराछोरी पनि लिएर आएको छु, उनीहरूलाई बजार घुमाइदिउँ भनेर निक्लिएको ।’

गाउँको अर्को पनि उदारता छ । एउटा पार्टीका यस्ता सभामा अर्को पार्टीका समर्थक पनि टाढैबाट भए पनि सहभागी हुन्छन् । चासो दिएर नेताका भाषण सुन्छन् । गगनको भाषण कांग्रेसका शुभचिन्तकले मात्र होइन, अरु पार्टीका समर्थकले पनि ध्यान दिएर सुने । तर, अलि टाढै बसेर ।

चकमके बजारको आँखाबाट केन्द्रको राजनीति अलिक भिन्न देखिन्छ । सभा, सम्मेलनमा बजार झर्ने कार्यकर्ता हुन् वा सर्वसाधारण, केन्द्रीय राजनीतिबारे सबैका आ-आफ्नै बुझाइ छन् । राजनीतिक सुझबुझ जे-जस्तो भए पनि सबैमा एउटै चिन्ता देखिन्थ्यो । त्यो हो- नेताले देश बनाएनन् भन्ने चिन्ता ।

नेताहरूको विवाद देखेर रङ्गलाल मोक्तान दिक्क मान्छन् । उनले भने, ‘केन्द्रमा साँढे जुध्छन्, बाली हाम्रो मिचिन्छ । शेरबहादुर, केपी, प्रचण्ड स्वार्थमा एक ठाउँ हुन्छन्, अरु बेला जनता जुधाउँछन् ।’

गाउँमा प्रधानमन्त्री केपी ओलीलाई राष्ट्रवादी मान्नेदेखि प्रतिगमनको मतियार भन्नेसम्म भेटिए । स्थानीय टेकबहादुर श्रेष्ठ भन्छन्, ‘खोइ कोही राष्ट्रवादी भन्छन्, कोही प्रतिगामी भन्छन् । जो जस्तो भए पनि हामी जस्ताको तस्तै छौँ, गाउँको समस्या उस्तै छ ।’

प्रकाशित मिति: मंगलबार, फागुन १८, २०७७ १३:३०