सुनील पोखरेलको नाटक 'अर्को अर्थ नलागेमा' : १० जना निर्देशक, ४० कलाकार

A+ A A-

कोरोनाका कारण लामो समय बन्द भएका नाटकघरहरू गत १ माघबाट संचालनमा आए । केही समय फुर्सदिला बनेका रंगकर्मीहरू अहिले लयमा फर्किने प्रयत्नमा छन् ।

रंगकर्मी सुनील पोखरेल पनि नयाँ नाटकको लागि जम्बो टोली लिएर मैदान उत्रिने तयारीमा छन् । उनले नाटककाे नाम जुलाएका छन्, 'अर्को अर्थ नलागेमा' ।

मण्डला थिएटरको रिहर्सल हल भरिभराउ देखिन्छ । हलको वरिपरि धेरै जना लामवद्ध बनेर बसेका छन् । पाँच जना कलाकार उभिएर आलो-पालो संवाद गरिरहेका छन् । छेवैमा बसेर सुनील पोखरेल उनीहरूलाई नियालिरहेका छन् ।

झण्डै दुई साता हुन लाग्यो, यहाँ नाटक 'अर्को अर्थ नलागेमा' को रिहर्सल चलिरहेको छ ।

सुनीलले हलको वरिपरि बसेकाहरूलाई देखाउँदै भने, 'ल हेर्नुस्, यी सबै कलाकार हुन् । केही बाहिर पनि गएका छन् । यस नाटकमा ४० जना कलाकार छन् ।'

कलाकारको टोली मात्र जम्बो होइन, नाटक निर्देशन गर्ने टोली पनि ठूलो छ । सुनीलसँगै सुनीलका १० जना विद्यार्थीले पनि याे नाटकमा निर्देशन गर्दै छन् ।

सुनील भन्छन्, 'ज्ञबाट नाटक बन्ने भन्ने थाहा पाएपछि विद्यार्थी आए । उनीहरूलाई रुचिअनुसार कसैलाई अभिनय, कसैलाई निर्देशनको टिम बनाएको छु । उनीहरूले हर्ष मानेर काम गरिरहेका छन् ।'

रंगकर्मी सुनील पोखरेल

कोरोनाका कारण लामो समय घरमा नै थुनिएर बस्नुपर्दा सुनीललाई काम गर्न नपाएको छटपटी थियो । देशको आर्थिक, राजनीतिक विषयले पनि उनलाई उकुस-मुकुस पारेको थियो । उनलाई लाग्थ्यो, 'काम गर्न पाए यो छटपटी कम हुन्थ्यो कि !'

अहिले नाटक हेर्न दर्शक नाटकघरसम्म आउने हुन् वा होइनन् भन्ने शंकाको विषय छ । तर, यही शंकामा सुनीलले जोखिम मोल्ने आँट गरेका छन् । भन्छन्, 'दर्शक आउनुहुन्छ वा आउनुहुन्न हामीलाई थाहा छैन । तर, काम नगरी बस्नुभन्दा त केही गरौँ भन्ने लागेर नाटक गर्न लागिएको हो ।'

अहिले जनता फ्रस्ट्रेसनमा छन् । केही समयअगाडि कोरोनाले दिक्क बनेका जनतालाई अहिले राजनीतिक खिचातानीले दिक्क तुल्याएको छ । यी फ्रस्ट्रेसनमा रहेका जनतालाई सुनील नाटक हेर्ने निम्तो दिन्छन् ।

'तपाईं नेताहरूसँग रिसाएर बस्नुभन्दा आउनुस् नाटक हेर्न । हामीले नाटकबाट नेताहरूलाई गाली गरेका छौँ, ब्यङ्ग्य गरेका छौँ', सुनील भन्छन्, 'यो नाटकले तपाईंको फ्रस्ट्रेसनलाई केही मात्रामा भए पनि शान्त पार्नेछ ।'

सुनील नाटकमा तीनवटा विषयवस्तु उठाइएको बताउँछन् । राजनीति, समाज र कोरोना ।

सुनील भन्छन्, 'हामीले अहिलेका यी तीन विषयलाई नाटकमा देखाउन लागेका हौँ । हामीले सबै विषयवस्तुलाई ब्यङ्ग्यात्मक शैलीमा तयार पारेका छौँ ।'

सुनीलले यस नाटक शरच्चन्द्र वस्तीको लेखबाट तयार गरेका हुन् । वस्तीले हरेक शनिबार 'अर्को अर्थ नलागेमा' शीर्षकमा लेख लेख्थे । ती लेख सुनीललाई मन पर्थ्यो ।

केही शृंखला पढेपछि सुनीललाई यस लेखमा नाटक बनाउने रहर जाग्यो । सुनीलले वस्तीलाई फोन गरे र लेखलाई नाट्य रुपान्तरण दिने स्वीकृति लिए । भन्छन्, 'मैले उहाँलाई प्रत्यक्ष फोन गरेर यसमा नाटक गर्छु भनेँ । उहाँले सहजै स्वीकार्नुभयो ।'

सुनीलले वस्तीको सम्पूर्ण लेखलाई नाटकमा समेट्न सकेनन् । उनले १० वटा शृंखलालाई नाटकमा समेटेका छन् । उनी भन्छन्, 'ती १० शृंखलाबाट पनि मैले मुख्य-मुख्य कुरालाई लिएर नाटकमा राखेको छु । मैले पत्रिकालाई काटेर नै स्कृप्ट तयार गरेको हुँ ।'

०००

'अर्को अर्थ नलागेमा' १८ फागुनदेखि ७ चैतसम्म मञ्चन हुनेछ ।

नाटकमा 'ज्ञ'का विद्यार्थीहरू विपिन कार्की, संगीत सापकोटा, सब्बु गुरुङ, देविशा लामिछाने, उत्तमराज पाण्डेय, आनन्द महत, मौसम खड्का, विशाल देवकोटालगायतले अभिनय गर्नेछन् ।

निर्देशकीय टिममा नवीनचन्द्र अर्याल, सुरज तमु, चन्द्र नेपाली, राज न्यौपाने, जयराम ढकाल, अकिल बजगाईं, आर्जेश रेग्मी, सञ्जीप योगी, निशांश पोखरेल र नीता राई छन् ।

फोटो : सुशील श्रेष्ठ

प्रकाशित मिति: शुक्रबार, फागुन १४, २०७७ १५:०३