सुदूरपश्चिम प्रदेशसभा सदस्य भन्छन् : सर्वोच्चले जनताको अधिकारलाई जोगायो

A+ A A-

सुदूरपश्चिम प्रदेशसभाका सदस्यले सर्वोच्च अदालतको फैसलाले लोकतान्त्रिक गणतन्त्र संस्थागत भएको बताएका छन् । प्रदेशसभाको बैठकमा विशेष समय लिएर बोल्दै उनीहरूले विघटित प्रतिनिधिसभा पुनर्स्थापना गरेर सर्वोच्चले जनताको अधिकारलाई जोगाएको बताएका छन् ।

अदालतको फैसलालाई स्वागत गर्दै नेकपा संसदीय दलका प्रमुख सचेतक तारा लामा तामाङले अदालतको फैसलाले सम्पूर्ण नेपालीको शीर ठाडो भएको बताए । ‘यो फैसलाले जनयुद्ध, जनयुद्धका घाइते, शहीद, २०६२/६३ को जनआन्दोलनलाई सम्मान गरेको छ,' उनले भने ।

संविधानलाई अपव्याख्या गरेर मुलुकलाई अन्यौलतातिर धकेल्ने गरी कार्यकारी प्रमुखले अगाडि बढाएको कदमलाई संविधानविद्हरूले सोचेर व्याख्या गरेको तामाङको भनाइ थियो । उनले व्यवस्थापिका जहिले पनि कार्यकारी निकायसँग तर्सेर बस्नुपर्ने अवस्थालाई अदालतको फैसलाले भङ्ग गरेको उल्लेख गरे ।

यसैगरी, नेपाली कांग्रेस संसदीय दलका नेता डा. रणबहादुर रावलले पनि सर्वोच्च अदालतको फैसलाको स्वागत गरे । सिङ्गो मुलुकको राष्ट्राध्यक्ष र सबैका अभिभावक रहेका राष्ट्रपतिले अभिभावको भूमिका निर्वाह गर्न नसकेको उनको आरोप थियो ।

सरकारको सिफारिसमा राष्ट्रपतिले प्रतिनिधिसभा विघटन गर्दा त्यसले अत्यन्तै गम्भीर बहस सिर्जना गरेको उनले बताए । प्रतिनिधि सभा विघटन अवैधानिक रहेको र सो कार्यले अधिनायकवाद सिर्जना गर्ने भएपछि कांग्रेसले विरोध गरेको उनले बताए ।

प्रदेशसभा बैठकमा प्रदेश बालबालिकासम्बन्धी व्यवस्था गर्न बनेको विधेयक २०७६ माथि सामाजिक विकास समितिमा दफावार छलफल गरी तयार पारिएको प्रतिवेदन प्रस्तुत गरिएको थियो । समितिका सभापति कुन्ती जोशीले प्रतिवेदन प्रस्तुत गरेकी थिइन् ।

प्रकाशित मिति: बुधबार, फागुन १२, २०७७ २०:००