नाका खोल्न माग गर्दै बेलहियामा दिनहुँ प्रदर्शन

A+ A A-

कोरोना भाइरस संक्रमणको असरलाई न्यून गर्न भन्दै ११ चैत २०७६ देखि सरकारले भारतसँगका सबै नाका बन्द गर्ने निर्णय गर्‍यो । त्यसपछि रूपन्देहीको बेलहिया नाकासहित देशैभरका नाका ठप्प भए । सीमानाकामा कडा चेकजाँच र क्वारेन्टाइनपछि मात्र नेपाली नेपालमा आउन पाए ।

कोरोना कहर सामान्य भएपछि पनि सरकारले भारतसँग सिमाना जोडिएका नाका अझै खुलाएका छैन । नाका ठप्प हुँदा पर्यटनसमेत नेपाल प्रवेश गर्न नपाएको भन्दै अहिले रूपन्देहीको बेलहिया नाकामा पछिल्लो एक सातादेखि नाका खुलाउन माग गर्दै पर्यटन व्यवसायीले प्रदर्शन गरिरहेका छन् ।

कोरोना कहर हुनुअघि बेलहिया नाका प्रयोग गर्दै बर्सेनि ५ लाखभन्दा बढी भारतीय र बुद्धिस्ट पर्यटक लुम्बिनीमा आउँथे । तर, अहिले पनि लुम्बिनीमा भारतसहित तेस्रो मुलुकबाट पर्यटक लुम्बिनी आएका छैनन् । लुम्बिनी घुम्नका लागि विशेष गरी अक्टुबरदेखि मार्चसम्म मौसम अनुकूल माने पनि नाका ठप्प हुँदा पर्यटन व्यवसायीले नाकामा दिनुहँजसो प्रदर्शन गरेका हुन् ।

सिद्धार्थ होटल एसाेसिएसनका अध्यक्ष सीपी श्रेष्ठले नेपाल सरकारले नाका नखुलाउँदा पर्यटक नेपालमा आउन नपाएकाले नाका खुलाउन माग गर्दै चरणवद्ध रूपमा नाकामा प्रदर्शन गर्दै आएको बताए । एसाेसिएसनले गत ४ माघमा लुम्बिनी प्रदेशका मुख्यमन्त्री शंकर पोखरेललाई समेत नाका खुलाउन माग गर्दै ज्ञापनपत्र बुझाएका थिए । ज्ञापनपत्र बुझाएपछि पनि नाका नखुलेपछि ३ माघदेखि दैनिक रूपमा नाका खुल्ला हुनुपर्ने मागसहित प्रदर्शन गरिएको उनको भनाइ छ ।

‘कोरोनाका कारण नाका बन्द गरेको सरकारले नाकामा सहज वातावरण बनाइदिनुपर्छ । कोरोनाको खोपसमेत लगाइसकेको अवस्थामा नाका बन्द गर्नु उचित होइन भनेर हामीले खबरदारी गर्नका लागि पनि यो प्रदर्शन गरिरहेका छौँ,’ उनले भने ।

कोरोनाले थलिएको पर्यटन व्यवसाय माथि उठ्न नसकेका बेला सरकारले नाका छिटो खोलेर सहज आवाजजावतमा सहजीकरण गर्नुपर्ने उनको भनाइ छ ।

नाकामा भैरहवा, बेलहिया, लुम्बिनीका पर्यटन व्यवसायीका साथै सुनौली, नौतनहवा, गोखरपुरसम्मका ट्राभल्स, होटल व्यवसायीले संयुक्त रूपमा नाका खुलाउन दबाब दिन संयुक्त रूपमा प्रदर्शन गर्दै आएका छन् ।

इलाका प्रहरी कार्यालय बेलहियाका प्रहरी निरीक्षक ईश्वरी अधिकारीले पर्यटन व्यवसायीले नाका खुल्लाको माग गर्दै सीमामा प्रदर्शन गरेको बताए ।

यता, किनमेलका लागि भारतीय बजार सुनौलीमा पुगेका नेपालीलाई भारतीय सुरक्षा बल (एसएसबी)ले अभद्र व्यवहार गर्ने गरेको समेत बताइएको छ । गत ६ माघमा मात्र भारतीय एसएसबीले अभद्र व्यवहार गरेको भन्दै बेलहिया नाकामा नेपालीले अवरोध गर्दै विरोध गरेका थिए ।

बेलहियामा किनमेल गर्न जाने नेपालीलाई एसएसबीले अपशब्द बोल्ने, कुकुर लगाएर लखेट्ने, सामान खोसिदिने काम गर्दै आएको छ ।

प्रकाशित मिति: मंगलबार, फागुन ११, २०७७ १५:५७