बुटवलकाे देउराली डाँडादेखि पाल्पाको नुवाकोटगढीसम्म चल्ने केबुलकारकाे शिलान्यास

केबलकारको शिलान्यास गर्दै अर्थमन्त्री विष्णु पौडेल ।

आन्तरिक तथा बाह्य पर्यटकहरूलाई लक्षित गरी बुटवलमा सिद्धार्थ केबुलकार बन्ने भएको छ । बुटवल उपमहानगरपालिका– १, देउराली डाँडादेखि पाल्पाको तिनाउ गाउँपालिका– २, नुवाकोटगढी चल्ने सिद्धार्थ केबुलकार बन्ने भएको हो ।

केबुलकारको अर्थमन्त्री विष्णु पौडेलले आज शिलान्यास गरे । यसअघि प्रधानमन्त्री केपी ओलीले १ फागुनमा बुटवलदेखि पाल्पा वसन्तपुर डाँडासम्म चल्ने लुम्बिनी केबुलकारको शिलान्यास गरेका थिए ।

केबुलकार सञ्चालनको प्रक्रिया डेढ वर्षअघिदेखि चल्दै आएको थियो । स्थानीय व्यापारीको लगानीमा बन्न लागेको सो केवलकारले १ वर्षअघि नै मन्त्रिपरिषदबाट स्वीकृत पाएको थियो ।

ऐतिहासिक एवं पुरातात्त्विक महत्त्व बोकेको मणि मुकुन्दसेन उद्यान फूलबारीदेखि उत्तरपूर्व देउरालीबाट पाल्पाको नुवाकोटगढीसम्म सञ्चालन हुने केबुलकारको लम्बाइ २ किमि ९० मिटर रहनेछ । १८ महिनाभित्र सञ्चालनमा आउने लक्ष्य राखिएको सो केबुलकारको निर्माण भारतको कम्भेयर एन्ड रोपवे सर्भिसेजले गर्दै छ ।

केबुलकारका सञ्चालकमध्येका एक माधव नेपालले ८० करोड लगानीमा केबुलकार र करिब डेढ अर्बको लागानीमा नुवाकोटगढीमा रिसोर्ट सञ्चालन गर्ने जानकारी दिए ।

१ हजार ९ सय ७३ वटा रुख कटानको अनुमति पाइसकेको निर्माण पक्षले जनाएको छ । केबुलकार सञ्चालन हुने स्थानमा काल भैरव मन्दिर, भ्यू टावर काठेगढी, उजिरसिंह पार्क, सेनकालीन इनार (रानी इनार) भग्नावशेष सेनकालीन दरबार, नुवाकोटगढी रहेका छन् ।

नुवाकोटगढी हुँदै २०१८ सालअघिसम्म पाल्पा तथा गुल्मीका मानिसले नुन लाने गर्थे । पाल्पाका स्थानीय दलबहादुर गुरुङले १०५० मा नुवाकोटगढी हुँदै भारतीय पर्यटकहरू अन्नपूर्ण बेसक्याम्पसम्म पुग्ने गरेको इतिहास भेटिएको बताए । नुन खेप्ने रोडमा केबुलकार बन्ने भएपछि यस क्षेत्रमा पर्यटकको आवागमन बढ्ने पनि उनले विश्वास व्यक्त गरे ।