मुख्यमन्त्री शाहीले किन गरे निजी सचिवालय हेरफेर ?

A+ A A-

कर्णाली प्रदेशका मुख्यमन्त्री महेन्द्रबहादुर शाहीले बुधबार आफ्नो निजी सचिवालयमा कार्यरत तीन जनालाई बिदा दिएर नयाँ मान्छे नियुक्ति गरिसकेका छन् ।

तीन वर्ष सचिवालयमा काम गरेका जनसम्पर्क सल्लाहकार जनकनाथ योगी, प्रमुख स्वकीय सचिव खेमबहादुर सिंह र स्वकीय सुमन शाहीलाई मुख्यमन्त्री शाहीले बिदा गरेका हुन् । रिक्त पदमा मुख्यमन्त्री शाहीले जनसम्पर्क सल्लाहकारमा विष्णु विक, प्रमुख स्वकीय सचिवमा कृष्ण आचार्य र स्वकीय सचिवमा रविन्द्र शाहीलाई नियुक्त गरेका छन् ।

उनको सचिवालय फेरबदल भएपछि अधिंकाशले मुख्यमन्त्रीको घेरा तोडिएको ब्याख्या गरेका छन् । तीन वर्षअघि मुख्यमन्त्री हुँदा शाहीले तत्कालीन माओवादी केन्द्रका नेता जनार्दन शर्मा र शक्तिबहादुर बस्नेत निकटलाई उनले आफ्नो सचिवालयमा राखेका थिए ।

शर्मानिकट जुम्लाका वीरबहादुर कुँवर (हाल नेकपा जुम्ला जिल्ला अध्यक्ष) लाई प्रमुख स्वकीय सचिव बनाएका थिए । त्यो विषय शक्ति बस्नेतलाई मन परेको थिएन । कँवुरलाई बस्नेत निकटले जानाजान जुवाखालमा फसाए । प्रहरीले पक्राउ गर्न खोज्दा त्यहाँबाट फरार भएका उनले पछि सचिवालयबाट राजीनामा दिए ।

कुँवर अहिले पनि आफूनिकटसँग भन्ने गर्छन्, ‘बस्नेतनिकटका मानिसले आफूलाई बोकेर एउटा साथीको घरमा तास खेलौं भनेर प्रहरी पठाएर मलाई फसाउन खोजे ।’

कुँवरको बर्हिगमनपछि बस्नेतनिकट खेमबहादुर सिंहले प्रमुख स्वकीय सचिवमा नियुक्ति पाएका छन् । बस्नेत र शर्मानिकटका मानिसले मुख्यमन्त्री शाहीको सचिवालय भरिएको थियो । त्यतिबेला मुख्यमन्त्री शाहीलाई भेटेर आफ्ना कुरा पनि नेता कार्यकर्ताले राख्न पाउँदैनथे। मुख्यमन्त्री शाहीनिकट एक नेताले भने, ‘हिजो मुख्यमन्त्रीलाई भेट्न पनि गाह्रो थियो । अहिले उहाँले सचिवालय परिवर्तन गरेर त्यो बारलाई तोड्नु भएको छ । ’

हाल नेकपा सुर्खेत जिल्ला सचिव कृष्ण जिसीले गत महिना सामाजिक सञ्जाल फेसबुकमा मुख्यमन्त्री शाहीलाई प्रतिगमनको पक्ष रहेका ओलीतिर लाग्न भनेका थिए ।

बस्नेत र शर्मानिकट रहेकालाई मुख्यमन्त्री शाहीले क्रमश हटाउने उद्देश्य राखेको त्यसको ठाउँमा आफ्ना नजिकलाई र माधव नेपाल पक्षकालाई राख्न खोजेको नेकपा नेताहरूको भनाइ छ ।

यद्यपी मुख्यमन्त्री शाही अन्य नेतालाई पनि अवसर दिन सचिवालय हेरफेर गरिएको बताउँछन् । ‘सचिवालय हेरफेर गर्नुको पछाडि कुनै कारण छैन, ’ उनले भने,‘सबै साथीहरूलाई काम गर्ने अवसर प्रदान गरिएको हो ।’

प्रकाशित मिति: शुक्रबार, फागुन ७, २०७७ १२:१२