३० हजारमा दुइटा मोबाइल पाउने लोभले ७५ हजार स्वाहा !

A+ A A-

बूढानीलकण्ठका पुजन थापाको फेसबुक वालमा ‘वान प्लस नोर्ड’ मोबाइल ३० हजारमा ‘बाइ वान गेट वान फ्रि’ भनेर आयो ।

सलामी मोहटुन्डे नामका व्यक्तिले ‘सेकेन्ड ह्यान्ड बाइ सेल्स एन्ड एक्सचेन्ज’ भन्ने ग्रुपमा पोस्ट गरेका थिए । सलामीको फेसबुकमा ठेगाना अमेरिका लेखिएको थियो ।

पुजन नयाँ मोबाइल किन्ने सोचमा थिए । सस्तोमा एउटा किन्दा अर्को पनि आउने आशामा हतारहतार क्लिक गरेर सलामीलाई रिक्वेस्ट पठाए ।

फेसबुकमा साथी बनेलगत्तै उनीहरूबीच म्यासेन्जरमा संवाद सुरु हुन्छ । ती अपरिचित सलामीले ह्वाट्सएपमा कुरा गर्न आग्रह गर्छन् । अनि उनीहरूबीच ह्वाट्सएपमा मोबाइल किनबेचको कुुरा हुन्छ ।

‘मोबाइल किन्ने होइन ?’, सलामीले सोध्छन् ।

‘एस', पुजनले जवाफ फर्काउँछन् ।

‘किन्नका लागि रजिस्टर गर्नुपर्छ । ३० प्रतिशत पैसा पनि पठाउनुपर्छ । त्यसपछि मोबाइल पठाउँछु’, सलामीको म्यासेज आउँछ ।

पुजने आफूसँग ५ हजार मात्र पठाउन सक्ने म्यासेज पठाउँछन् । त्यसमा सलामी राजी भए । तत्काल पुजनले ई–सेवाबाट ५ हजार पठाए ।

तर, ५ हजारले नपुग्ने १० हजार पठाएपछि मात्र बिल काटिने सलामीको म्यासेज आयो । पुजनले फेरि अर्को ५ हजार पठाए । जम्मा १० हजार पठाएपछि पुजनलाई बिल काटेको म्यासेजसँगै मोबाइल प्याकिङ भएको फोटो पनि आयो ।

सलामीले मोबाइल डीएचएलबाट दुई दिनमा आइपुग्ने पुजनलाई जानकारी गराउँछन् ।

‘सामान इराकमा पुगेको छ । इन्स्योरेन्स चार्ज २५ हजार रुपैयाँ लाग्ने भयो । इन्स्योरेन्सको पैसा फिर्ता आउँछ । २५ हजार र तिम्रो बैंक एकाउन्ट पठाउ’, सलामीले फेरि म्यासेज गरे ।

सलामीले पहिलाको नम्बर र आईडी छैन भनेर नयाँ पठाए । इन्स्योरेन्सको पैसा फिर्ता आउने भएपछि पुजनले थप २५ हजार रुपैयाँ ई–सेवाबाट नयाँ नम्बर र आईडीमा पठाए ।

पटक–पटक गरेर कुल ७५ हजार रुपैयाँ पैसा पठाइसकेपछि भने पुजन कतै त्यो मान्छे गलत त होइन भनेर झस्किए । सलामीले फेसबुकमा राखेको नम्बरमा फोन गरे । तर, त्यो नम्बरमा फोन लागेन ।

‘फोन लाग्दैन नि ? कुरा गर्न मिल्दैन ?’ पुजनले म्यासेजमा सोधे ।

‘फोन लाग्दैन । यो नम्बर पेमेन्टका लागि मात्र हो’, सलामीले जवाफ फर्काए ।

ह्वाट्सएपमा कुरा गर्नुको विकल्प भएन ।

पुजनलाई त्यो मानिसको विश्वास लाग्न छोड्यो । सलामीले डीएचएलबाट अरुलाई पनि सामान पठाएको फोटो पठाएर विश्वास दिलाउने प्रयत्न गरे ।

मोबाइल पाकिस्तान आइपुगेको जानकारी पनि गराए । पाकिस्तानबाट नेपाल आइपुग्न अर्को ५० हजार लाग्ने सलामीको म्यासेज आयो ।

पुजन झन् तर्सिए । आफू ठगिएको भान उनलाई हुन थाल्यो । थप पैसा नपठाउने निचोडमा उनी पुगे ।

पुजनले पैसा फिर्ता पठाउदिनु, मोबाइल चाहिँदैन भनेर सलामीलाई म्यासेज गरे । तर, सामान पाकिस्तान पुगेकाले पैसा फिर्ता नहुने सलामीले अडान लिए ।

बाहिरबाट सामान आउँदा बीचमा चार्ज लाग्छ कि लाग्दैन भनेर बुझ्न उनी डीएचएलको कार्यालय सिनामंगल जाने निर्णय गरे र मंगलबार दिउँसो हस्याङफस्याङ गर्दै डीएचएलको कार्यालयमा पुगे ।

निन्याउरो अनुहार बनाउँदै उनले डीएचएलको फ्रन्ट डेस्कमा सोधे, ‘डीएचलबाट सामान आउँदा बीचमा चार्ज लाग्छ ?’

‘केही लाग्दैन,’ डीएचएलका प्रतिनिधिलले जवाफ दिन्छन् ।

‘एक जनाले बाहिरबाट मोबाइल पठाएको छ । बीचमा इन्स्योरेन्सलगायतको पैसा माग्यो । मैले पठाउँदै गएँ । पटक-पटक मागेपछि त्यसबारेमा बुझ्न आएको । अहिले पाकिस्तानमा आइपुग्यो । थप ५० हजार चाहिन्छ भनेको छ’, उनले आफ्नो दु:खेसो डीएचएलका कर्मचारीसँग राखे ।

‘३० हजारको मोबाइल । मोबाइलको दामभन्दा बढी पठाउन भनेपछि सोच्नु पर्दैन ?’, ती र्काचारीले प्रतिप्रश्न गर्दै भने, ‘त्यो फेक हो । तपाईं पूरै ठगिनुभयो । अब नपठाउनू । यस्ता केस अरु पनि आएका थिए । तपाईं त अझ थोरैमा पर्नुभएछ । ५ लाख रुपैयाँसम्म बुझाएका केस पनि छन् ।’

ती कर्मचारीले डीएचएलले कसैसँग सामानको डिल नगर्ने र सलामीलाई नचिन्ने प्रष्ट पारे ।

‘डीएचएलले कसैसँग डिल गर्दैन । तपाईंले सामान ल्याउनुभयो भने पठाउँछ । खोजेर सामान पठाइदिन्छु भन्दैन । सामान बेच्दैन । सर्भिस दिने हो’, ती कर्मचारीले भने, ‘त्यो मान्छे हामीसँग सम्बन्धित छैन । तपाईँ ठगिनुभएको छ । ई–सेवाबाट डिटेल झिकेर प्रहरीलाई उजुरी दिनुहोस् । केही राहत भयो भने उतैबाट हुन्छ ।’

संयोगवश कामकै सिलसिलामा हामी पनि डीएचएलमा पुगेका थियौँ । ठगिएका पुजनले भनिरहेका कुरा हामीले पनि सुनिरहेका थियौँ ।

हामीले सोध्यौँ, ‘अहिलेसम्म कति पैसा पठाउनुभयो त ?’

‘आइतबारदेखि कुरा भएको हो । तीन दिनमा ७५ हजार पठाइसकेँ । फेरि ५० हजार मागेको छ !’ निराश हुँदै उनले भने ।

‘अब के गर्ने त ?’

न सलामीलाई चिनेको छ । अपरिचित ती व्यक्तिको आधिकारिक ठेगाना पनि थाहा छैन । अलमलमा परेका पुजन सीआईबीमा उजुरी गर्न लम्किए ।

०००

यो त प्रतिनिधि घटना मात्र हो । यस्ता केस पछिल्लो समय धेरै आउने गरेको प्रहरीको भनाइ छ ।

‘पछिल्लो समय यस्ता केस धेरै आएका छन् । नेपालभित्रै छ भने पक्राउ गर्न सकिन्छ । कतिलाई गरेका पनि छौँ । विदेशमा हो भने गाह्रो छ’, अपराध महाशाखा बानेश्वरका असइ पदम गुरुङले भने, ‘विदेशमा पैसा पठाएको हुन्छ । उता निकालिसकेको हुन्छ । समाउन समस्या हुन्छ । यसको ठूलो जालो छ । नगरिक सचेत हुनुपर्छ ।’

प्रकाशित मिति: मंगलबार, फागुन ४, २०७७ १८:३१