कोरोनाकालमा पनि लुम्बिनीका सांसदले लिए बैठकभत्ता र यातायात खर्च

A+ A A-

लुम्बिनी प्रदेशका सांसद विष्णुप्रसाद पन्थीको बुटवलमा दुईतले पक्की घर छ । वाणगंगामा अर्को घर पनि छ । छोराछोरी विदेशमा अध्ययनरत छन् । कपिलवस्तु क्षेत्र नं. १ (१) बाट निर्वाचित सदावहार नेताको छवि बनाएका पन्थीले प्रदेशसभाबाट मासिक घर मर्मतका नाममा ७ हजार ५ सय रुपैयाँ बुझ्ने गरेका छन् । लुम्बिनी प्रदेशसभा सचिवालयका अनुसार उनले घर ममर्तका नाममा मात्र होइन, उपचारको बिल भरपाई बनाएरसमेत सुविधा लिएका छन् ।

प्रदेशसभा सचिवालयले उपलब्ध गराएको विवरणअनुसार उनले प्रदेशसभाबाट उपचार खर्चका नाममा २९ हजार ४ सय ४५ रुपैयाँ बुझेका छन् । आर्थिक रूपले सम्पन्न भए पनि सामान्य सुविधासमेत नछाड्ने पन्थी प्रदेशसभाका एक्ला सदस्य भने होइनन् । नेकपा सांसद भोजप्रसाद श्रेष्ठ बुटवल उपमहानगरपालिकाका पूर्वनगरप्रमुख हुन् । उनको बुटवलमा घर छ । छोरा औषधि व्यवसाय गर्छन् । आर्थिक रूपले सम्पन्न श्रेष्ठले पनि मासिक घर मर्मतका नाममा प्रदेशसभाबाट रकम बुझ्दै आएका छन् । त्यस्तै उपचार खर्चका लागि भन्दै ३५ हजार १ सय ६९ रुपैयाँ लिएका छन् ।

हालै नेकपाको प्रचण्ड-माधव समूहबाट अलग्गिएर नेकपाको ओली खेमामा गएका सांसद दधिराम न्यौपानेको पनि बुटवलमा पक्की घर छ । अर्थ, उद्योग, तथा पर्यटन समितिका सभापतिसमेत रहेका उनलाई छुट्टै गाडीको सुविधासमेत छ । आर्थिक रूपमा बलियो रहेका रूपन्देही क्षेत्र नं. १ (२) बाट निर्वाचित न्यौपानले पनि प्रदेश सभाबाट घर मर्मतका लागि आउने मासिक ७ हजार ५ सय रुपैयाँ लिन छाडेका छैनन् । त्यसबाहेक औषधि उपचारका लागि पनि राज्यकोषबाट न्यौपानले १२ हजार १ सय ६२ रुपैयाँ बुझेका छन् ।

रूपन्देही क्षेत्र नं. ३ (१) बाट निर्वाचित जनता समाजवादी पार्टी लुम्बिनी प्रदेशसभाका प्रमुख सचेतक हुन्, सन्तोषकुमार पाण्डेय । सिद्धार्थ नगरनगरपालिका- ४ मा स्थायी बसोबास गर्ने उनले पनि घर मर्मतसम्भारका नाममा मासिक ७ हजार ५ सय रुपैयाँका दरले प्रदेशसभाबाट रकम बुझ्दै आएका छन् ।

यी त प्रतिनिधि उदाहरण मात्र हुन् । लुम्बिनीका १३ जना सांसदले घर ममर्तका नाममा मासिक ७ हजार ५ सयका दरले प्रदेशसभाबाट रकम बुझ्दै आएका छन् । यीबाहेक नेपाली कांग्रेसका प्रमुख सचेतक फकरुद्दिन खानले पनि घर मर्मतका नाममा रकम बुझ्दै आएका छन् । उनको लुम्बिनी सांस्कृतिक नगरपालिका- ८ मा घर छ । त्यस्तै, नेकपा प्रमुख सचेतक भूमिश्वर ढकाल, कांग्रेस सांसद अष्टभुजा पाठक, बसिउद्दिन खाँन, रमा अर्याल, पुष्पा थरूनी, तुलसीप्रसाद चौधरी, डा. कृष्ण न्यौपाने र कमला विकले पनि घर मर्मतका नाममा रकम बुझ्दै आएका छन् ।

प्रदेशसभा सचिवालयका सूचना अधिकारी दिनेश अधिकारीले प्रदेशसभाका पदाधिकारी तथा सदस्यको पारिश्रमिक सुविधासम्बन्धी ऐन, २०७५ अनुसार नै घर मर्मत तथा बिरामी हुँदा औषधि उपचार खर्च लगेको बताए । उनले भने, ‘ऐनअनुसार नै घर भएकालाई मासिक ७ हजार ५ सय मर्मतका नाममा रकम लैजानुहुन्छ । घर नभएका सांसदले मासिक १५ हजार घरभाडा बुज्नुहुन्छ ।’

नेकपा प्रमुख सचेतक भूमिश्वर ढकालले घरभाडा नलिने भनेर भनेको तर मर्मतसम्भारको रकम लिने नभनेको बताए । उनले घर मर्मत गर्नुपर्ने भएकाले रकम लिनुपरेको बताए ।

औषधि खर्चका नाममा रकम बुझ्छन् सांसद

आर्थिक वर्ष २०७६/०७७ मा प्रदेशसभा सचिवालयले सांसदलाई उपचार खर्चका नाममा १४ लाख ४९ हजार ५ सय ५० रुपैयाँ भुक्तानी गर्‍यो । सुगर, प्रेसर तथा दान्त परीक्षण गरेको बिलसहित आएका २८ जना सांसदलाई उपचार खर्चबापतको रकम प्रदेशसभाले भुक्तानी गरेको हो ।

यसरी औषधि उपचारमा भुक्तानी लिएका सांसदमध्ये प्रमुख प्रतिपक्षी दल नेपाली कांग्रेस संसदीय दलका तत्कालीन नेता स्व. बलदेव शर्मा पोखरेलको खर्चबाहेक अन्य सांसदले भने नैतिकता बिर्सेर सामान्य स्वास्थ्य परीक्षणको पनि खर्च लिएका छन् । स्व. शर्माको उपचारका लागि प्रदेशसभाबाट ४ लाख ८६ हजार ८ सय २४ रुपैयाँ दिएको छ ।

कोरोना महामारीका कारण अर्थतन्त्र तहसनहस भइरहेका बेला सामान्य उपचारमा समेत प्रदेश सांसदले लोभ देखाउँदा नैतिकताको प्रश्न उठ्ने अधिवक्ता महेन्द्र पाण्डे बताउँछन् । ‘ऐनमा टेकेर दिइने सुविधा भन्दैमा आफ्नो नैतिक धरातल भुल्नुहुँदैन । सानो रकम भए पनि यसले मितव्ययितामा ठूलो अर्थ राख्छ,’ उनले भने ।

प्रदेशसभाका सभामुख पूर्णबहादुर घर्तीले उपचार खर्चका नाममा प्रदेशसभाबाट १ लाख २९ हजार ४ सय ८६ रुपैयाँ बुझेका छन् । कोरोनाकालमै १ करोडको नयाँ गाडी खरिद गरेका कारण आलोचना खेपेका सभामुख घर्तीले सामान्य स्वास्थ्य परीक्षण गरेको रकम लिन पनि छाडेनन् । उपसभामुख कृष्णी थारूले ३४ हजर ८ सय ८२ रुपैया बुझेकी छन् । सांसद मोहम्मद याकुब अन्सारीले १ लाख १२ हजार ३० रुपैयाँ बुझेका छन् ।

त्यस्तै, सांसदहरू गीता थापाले २५ हजार ५ सय ४९ रुपैयाँ, जनता समाजवादी पार्टीकी सांसद कल्पना पाण्डेले ९४ हजार ८ सय ६४, नेकपा सांसद कमलराज श्रेष्ठले १२ हजार ७ सय ७४, डा. कृष्णप्रसाद न्यौपानेले ३९ हजार ४ सय ९६, कृष्णा केसीले ७४ हजार ६७ रुपैयाँ बुझेका छन् ।

त्यसैगरी, विमला शर्मा पन्थीले ५३ हजार ४ सय २०, आशा स्वर्णकारले ३६ हजार २ सय ७६, थानकुमारी थापा चापागाईंले ३ हजार ४ सय ८६, दीपा विकले २७ हजार ७ सय, धनकली चौधरीले ५ हजार ४ सय ४०, निर्मला क्षत्रीले १३ हजार ९ सय २२, शान्तिदेवी स्वर्णकारले १२ हजार १ सय ५४, पार्वती पुन गहतराजले ५ हजार ४ सय ७५, पुर्मती ढेगाले १३ हजार २ सय ८५, पुष्पा थरूनीले १६ हजार ७ सय ७, रुन्धावती शर्माले २२ हजार १ सय १७, लौटी थारूले १३ हजार ५ सय ५३, बसिउद्धिन खाँनले २५ हजार ६ सय ७९, विजयबहादुर यादवले ६३ हजार ७१९, र सरस्वती गौतमले ३० हजार ४ सय ९६ रुपैयाँ उपचार खर्चको नाममा प्रदेशसभाबाट रकम बुझेका छन् ।

कोरोना महामारीमा पनि छाडेनन् बैठकभत्ता र यातायात खर्च

कोरोना महामारीको समय ०७६ चैतदेखि ०७७ असोजसम्म लुम्बिनी प्रदेशका पदाधिकारीले भने बैठकभत्ता र यातायात खर्च लिएको पाइएको छ । चैतदेखि असोजसम्म बैठकभत्ता र इन्धन खर्चका नाममा प्रदेशसभाका १५ जना पदाधिकारीले ५ लाख १२ हजार रकम बुझेका छन् । सभामुख घर्तीले ३१ हजार, उपसभामुख थारूले ३० हजार, विपक्षी दलको नेता वीरेन्द्रकुमार कनौडियाले २८ हजार ५ सय बझेका छन् ।

त्यस्तै, नेकपाका प्रमुख सचेतक ढकालले ३२ हजार, कांग्रेसका प्रमुख सचेतक सुरेन्द्रबहादुर हमालले २८ हजार, जनता समाजवादीका सन्तोष कुमार पाण्डेयले ३१ हजार, अर्थ उद्योग पर्यटन समितिका सभापति दधिराम न्यौपानेले ४१ हजार रुपैयाँ कोरोना महामारीको अवस्थामा बैठकभत्ता र यातायात खर्च बुझेका छन् ।

त्यसैगरी, प्रदेश मामिला तथा कानुन समितिकी सभापति दामाकुमारी शर्माले ४८ हजार, सामाजिक विकास समितिका सभापति दृग नारायण पाण्डेले ३४ हजार, कृषि वन तथा वातावरण समितिका सभापति विजयबहादुर यादवले ४७ हजार, सार्वजनिक लेखा समिति सभापति डिल्लीबहादुर चौधरीले १९ हजार, भौतिक पूर्वाधार तथा विकास समिति सभापति ढाँटी सुनार (आशा स्वर्णकार)ले ३४ हजार, विशेष अधिकार समितिका सभापति कमलराज श्रेष्ठले ३६ हजार, सत्ता पक्षको सचेतक पार्वती पुन गहतराजले २६ हजार र जनता समाजवादीका दलका नेता सहसराम यादवले बैठक भत्ता र यातायात खर्चबापत ४६ हजार ५ सय रुपैयाँ बुझेका छन् ।