मठमन्दिरमै खर्चिइँदै स्थानीय तहको साझेदारीमा पर्यटन क्षेत्र विकासमा छुट्याएको रकम

मठमन्दिरमै खर्चिइँदै स्थानीय तहको साझेदारीमा पर्यटन क्षेत्र विकासमा छुट्याएको रकम

A+ A A-

संस्कृति पर्यटन तथा नागरिक उड्डयन मन्त्रालयले आव २०७७/७८ को पूर्वाधार निर्माण तथा पर्यटन उपज विकास साझेदारी कार्यक्रमअन्तर्गत कर्णाली प्रदेशका १७ स्थानीय तहमा भौतिक संरचना निर्माण गर्ने भएको छ । मन्त्रालयले गरेको पर्यटन पूर्वाधार तथा पर्यटन विकास साझेदारी कार्यक्रम संचालन गर्नका लागि १९ माघ २०७७ मा बसेको मन्त्रीस्तरीय निर्णयअनुसार कर्णालीका १७ स्थानीय तह छनोट भएका हुन् ।

पर्यटनक्षेत्रको विकासका लागि बजेट विनियोजन गरिएको अधिकांश रकम कर्णालीक्षेत्रमा रहेका मालिका नामका मन्दिर निर्माण, मन्दिर जाने पदमार्ग, मन्दिर जाने सडकमा निर्माणका लागि छुट्याइएको छ । कार्यक्रमअनुसार रूकुमपश्चिमको आठबिसकोट नगरपालिकामा लक्ष्मीनारायण मन्दिर, भेरी नदीमा जेटबोट संचालन र कालीपानी खानेपानी तथा सिँचाइ कुलो निर्माणका लागि ६ करोड ९९ लाख लागत छ । त्यसका लागि मन्त्रालयको ४ करोड ५५ लाख र स्थानीय तहको २ करोड ४४ लाख साझेदारी हुनेछ ।

दैलेखको बिन्द्रसैनी नगरपालिकामा ५ करोड लागतमा निर्माण हुने नगरपालिका नगरपार्क निर्माणका लागि मन्त्रालयको ३ करोड ५० लाख र नगरपालिका १ करोड ३५ लाख, रूकुमपश्चिमको बाँफीकोट नगरपालिका ५ करोड लागतमा निर्माण हुने स्यार्पुताल वरिपरि बगैँचा, प्रतीक्षालय, बाटो र अन्य पूर्वाधार बनाउन स्थानीय तहको १ करोड ५० लाख र मन्त्रालयको ३ करोड ५० लाख बजेट विनियोजन गरिएको छ ।

हुम्लाको खार्पुनाथ गाउँपालिकामा ५ करोड लागतमा खार्पुनाथ शिवालय पर्यटकीय पूर्वाधार विकास आयोजनाका लागि स्थानीय तहको १ करोड ५० लाख र मन्त्रालयको ३ करोड ५० लाख, दैलेखको दुल्लु नगरपालिमामा ७ करोड लागतमा पञ्चकोसी पर्यटन क्षेत्र संरक्षण तथा पूर्वाधार विकास कार्यक्रमका लागि नगरपालिकाको २ करोड ४५ लाख, मन्त्रालयको ४ करोड ५५ लाख विनियोजन गरिएको छ ।

त्यस्तै, जुम्लाको पातारासी गाउँपालिकामा २ करोडकाे लागतमा निर्माण हुने छुमचौर ज्युलो संरक्षण तथा सम्वर्द्धनका लागि मन्त्रालयको १ करोड ४० लाख र गाउँपालिकाको ६० लाख, कालीकोटको रास्कोट नगरपालिकामा २ करोडकाे लागतमा निर्माण हुने बडिमालिकादेखि देउरामालिका सडक स्तराेन्नतिका लागि मन्त्रालयको १ करोड ३० लाख र नगरपालिकाको ७० लाख, सुर्खेतको भेरीगंगा नगरपालिकामा ४ करोड ४५ लाख लागतमा निर्माण हुने डुमकोट दलित संग्रहालय निर्माणका लागि मन्त्रालयको २ करोड ८९ लाख र नगरपालिकाको १ करोड ५६ लाख बजेट विनियोजन गरिएको छ ।

त्यस्तै, सल्यानको वनगाड कुपिण्डे नगरपालिकामा ६ करोड ८१ लाख लागतमा निर्माण हुने कुपिण्डे ताल पूर्वाधार विकासका लागि मन्त्रालयको ४ करोड ४३ लाख र नगरपालिकाको २ करोड ३८ लाख, जाजरकोटको भेरी नगरपालिका ३ करोड लागतमा निर्माण हुने पर्यटकीयस्थल मालिका मन्दिर निर्माणका लागि मन्त्रालयको १ करोड ९५ लाख र १ करोड ५ लाख, दैलेखको भगवतीमाई गाउँपालिका ३ करोड ३२ लाखमा निर्माण हुने मयाराम स्मृति पार्क निर्माण आयोजनाका लागि नगरपालिका ९९ लाख र मन्त्रालयको २ करोड ३३ लाख रकम विनियोजन गरिएको छ ।

त्यस्तै, रूकुमपश्चिमको चौरजहारी नगरपालिमामा ६ करोड ५० लाख लागतमा निर्माण हुने मालिका पर्यटकीय क्षेत्र विकास तथा पदमार्ग निर्माणका मन्त्रालयको ४ करोड २३ लाख र नगरपालिका २ करोड २७ लाख, हुम्लाको सिमकोट गाउँपालिका ५ करोड लागतमा निर्माण हुने रलिङ तीर्थ सडकका लागि मन्त्रालयको ३ करोड ५० लाख र गाउँपालिका १ करोड ५० लाख, कालिकोटको खाँडाचक्र नगरपालिकामा १ करोड ९८ लाखमा निर्माण हुने नैनीकाध, जिउली धर्मशाला निर्माण र चुलीमालिका मन्दिर क्षेत्र पर्यटन पूर्वाधार निर्माणका लागि मन्त्रालयका १ करोड २९ लाख र नगरपालिकाको ६९ लाख बजेट छुट्याइएको छ ।

त्यस्तै, कालीकोटकै पचाल झरना गाउँपालिकामा ५ करोड लागतमा निर्माण हुने पचालझरना पदमार्ग निर्माणका गाउँपालिकाको १ करोड ५० लाख र मन्त्रालयको ३ करोड ५० लाख, जाजरकोटको नलगाड नगरपालिकामा १ करोड ५० लाखमा निर्माण हुने खानटाकुरा सहिद स्मृति भवनका लागि नगरपालिका ५२ लाख ५ हजार र मन्त्रालयको ९७ लाख ७५ हजार र डोल्पाको काइके गाउँपालिकामा ३ करोड लागतमा निर्माण हुने तातोपानी कुण्ड तथा पर्यटकीय पदमार्गका लागि मन्त्रालयको २ करोड १० लाख र गाउँपालिकाको ९० लाख रकम विनियोजन गरिएको छ ।

प्रकाशित मिति: मंगलबार, फागुन ४, २०७७ १५:२०