बुटवलमा ओली समूहको सभा : निर्वाचन केन्द्रित भाषणमै ओलीको सवा घण्टा

A+ A A-

१५ माघमा प्रचण्ड-नेपाल समूहले बुटवलको अस्पताललाइनमा सभा गरेपछि त्योभन्दा ठूलो शक्ति प्रदर्शन गर्ने होडमा लागेको केपी पक्षले आज सिद्धेश्वरी विद्यालयको खेल मैदानमा जनसभा गर्‍यो । प्रधानमन्त्रीसमेत रहेका ओली समूहका अध्यक्ष केपी शर्माले काठमाडौंको सभामा मञ्चबाटै ‘सभा हेर्न बुटवल आउनु’ भनि निम्ता दिएपछि आजको सभालाई दुवै पक्षले विशेष तरिकाले हेरेका थिए ।

बुटवलमा भएको सभामा यसअघि गरेजस्तो उत्ताउलो भाषणमा यसपटक प्रधानमन्त्री ओलीले ओलीले समय खर्चेनन् । १७ र २७ वैशाखका लागि घोषणा गरेको निर्वाचनलाई लक्षित गरेर सवा घण्टा भाषणबाजी गरे । कार्यकर्ता पंक्तिबाट उत्ताउलो भाषणको आह्वान भएपनि ओलीले आज आफ्नो कार्यकालमा भए गरेका कामको बेलिविस्तार गर्नमा ध्यान दिए ।

कार्यकर्तामाझ ठट्यौली र उत्ताउलो शैलीको भाषण आह्वान गरेको बुझेका ओलीले केही ‘रस’ भने सभामा गरे । उनले काठमाडौंमा प्रचण्ड–नेपालको सभामा मन्तव्य राख्नेहरूमाथी कटाक्ष गरे । उनले भने, ‘अस्ती एउटा लाइन देखेँ । हेर्दा त बोल्नेहरूको रहेछ । १५/१७ जनाले एकपछि अर्को आउँदै गाली पुराण सुनाएर गए । १७ गाली पुराण सुनाएपछि सकियो ।’

यति भनेपछि कार्यकर्ताबाट ताली बर्सियो । त्यसपछि उनले भाषणको लय पुनः समाते, अनि बोले, ‘प्रचण्ड-माधवसँग हाम्रो विचार मिल्दैन । हामी प्रतिस्पर्धा गर्दैनौँ ।’

दिउसो ३:४० बजे सभास्थल बुटवलको सिद्धेश्वरी माविको खेल मैदानमा पुगेका ओलीले पूरापूर सवा घण्टा भाषण गरे । भाषण गर्न रोष्टममा उभिएका ओलीले सुरुमा कार्यकर्ताको उपस्थितिलाई स्वागत गरे । मख्ख परे, अनि हासे । त्यसपछि काठमाडौंबाटै देशभरको सभाभन्दा ठूलो लुम्बिनीमा सभा हेर्न निमन्त्रण दिएको एकपटक सम्झिए ।

त्यसपछि ओलीले पूर्व सहयात्रीहरू पुष्पकमल दालाल 'प्रचण्ड' र माधव नेपाललगायत नेताहरू माथि आक्रोश पोखे । सरकारमा हुँदा काम गर्न नदिएको, संवैधानिक अंगमा नियुक्ति गर्न नदिएको, महाधिवेशनबाट अध्यक्ष छानौँलाभन्दा हातहात्ति अध्यक्ष पद मागेको भन्दै गज्रिए ।

त्यसपछि ओली विकासी भाषणमा लागे । बुटवल-नारायणगढ बनिरहेको सडकदेखि भेरी-बबइका योजनाहरू बनेको देख्न प्रचण्डले नसकेको बताए । पुल, सडक निर्माण, शिक्षा, स्वास्थ्य क्षेत्रमा गरेका कामको बेलिविस्तार लगाए । उनले मञ्चबाटै ३ फागुनमा आफ्नो कार्यकालमा भएका कामहरू जनतालाई बताउने उद्घोषसमेत गरे ।

उनले आफूले पाएको विशेषाधिकार प्रयोग गरेर संसद विघटन गरेको बताउन भुलेनन् । पार्टी भित्रैबाट देशलाई अस्थिरतातर्फ लैजान लागेकाले संसद विघटन गरी ताजा तनादेशमा गएको उनले सुनाए । उनले निर्वाचनको तयारीमा लाग्न कार्यकर्तालाई निर्देशन दिँदै सूर्य चिह्न आफ्नै भएको समेत बताए ।

सर्वोच्च अदालतमा विचाराधीन संसद विघटनको मुद्दामा ओलीले घुमाउरो तरिकाले आफ्नो पक्षको फैसला हुनुपर्ने तर्क गरे । उनले भने, ‘हामी नै संस्थापन हौँ । निर्वाचन आयोगले हामीलाई चिन्छ । त्यसैले पनि अदालतको निर्णय के आउँछ भनेर यहाँ भनिराख्न पर्दैन ।’

उनले प्रचण्ड-नेपाल समूहलाई निर्वाचनबाट नभाग्नसमेत आह्वान गरे । जनता आफ्नो पक्षमा रहेको प्रचण्ड-नेपालले बताए पनि आउने निर्वाचनमा मतपेटिकाको बाकसमा नेकपाको मात्र मत हुने बताए ।

उनले भागरथीका हत्यारालाई पानीमूनि गए पनि नछाडिने बताउँदै छिट्टै हत्यारालाई कानुनी कठघरामा उभ्याउने बताए । उनले २४ जनालाई जिउँदै जलाउने अपराधीहरूलाई १२ वर्षपछि पक्राउ परेको भन्दै निर्मला पन्तका हत्यारालाई पनि पक्रिने बताए ।

सिद्धेश्वरी विद्यालयको खेल मैदानमा आयोजना गरिएको सभामा मुख्यमन्त्री शंकर पोखरेलले २ लाख जनता उतार्ने बताए पनि सभास्थलमा ३० हजार र सडकमा २० हजार गरी ५० हजार कार्यकर्ता पुगेको आंकलन गरिएको छ ।

सभामा बोल्ने अर्थमन्त्री विष्णु पौडेल, लुम्बिनी प्रदेशका मुख्यमन्त्री शंकर पोखरेल, ऊर्जा मन्त्री टोप बहादुर रायमझी, उद्योग वाणिज्य तथा आपूर्तिमन्त्री लेखराज भट्टले निर्वाचनको तयारीमा लाग्न आग्रह गरे ।

प्रकाशित मिति: शनिबार, फागुन १, २०७७ १९:५८