गौतम बुद्ध विमानस्थल : छैठौँपल्ट म्याद थप्ने तयारी

A+ A A-

भैरहवामा निर्माणधीन गौतम बुद्ध क्षेत्रीय अन्तर्राष्ट्रिय विमानस्थलको काम सुरु भएको ६ वर्ष भएको छ । तीन वर्षमा सक्ने गरी सुरु भएको विमानस्थल निर्माण कार्य ६ वर्ष बित्दा पनि सकिएको छैन ।

कोरोना महामारीका कारण जनशक्ति नेपाल फर्कन नसक्दा काम सुस्त गतिमा भइरहेको छ भने पछिल्लो पटक थपिएको म्याद पनि सकिएको छ । चिनियाँ ठेकेदार कम्पनी नर्थवेष्ट सिभिल एभिएसनले निर्माणमा विलम्ब गर्दा विमानस्थल निर्माणको गति सुस्त भएको हो ।

तीन वर्षमा सक्ने गरी आयोजना ३१ डिसेम्बर २०१४ मा निर्माण सुरु भएको थियो । पाँचौँपल्ट म्याद थप गरी आयोजना सम्पन्न मिति सन् २०२० डिसेम्बरसम्म पुर्‍याइएको थियो । यो अवधिमा पनि निर्माण सम्पन्न नभएपछि छैठौँपल्ट म्याद थपको तयारी गरिएको गौतमबुद्ध विमानस्थलका आयोजना प्रमुख इन्जिनियर प्रवेश अधिकारीले जानाकारी दिए ।

‘हामीलाई कोरोनाले अझ पछाडि धकलेको छ । चिनियाँ कामदार नआउँदा रनवे र उपकरण जडानका कामहरू रोकिएका छन् । त्यसकारणले पनि ठेकेदारलाई हामीले म्याद थप गर्ने तयारी गरेका हौँ’ उनले भने ।

उनका अनुसार भौतिक संरचना निर्माणको काम अन्तिम चरणमा पुगेका छ । विमानस्थल संचालनका लागि आवश्यक उपकरण जडानको काम बाँकी रहेको छ । ९८ प्रतिशत उपकरण विमानस्थलमा आइपुगे पनि उपकरण जडान गर्ने दक्ष प्राविधिक चीन, थाइल्याण्ड, अमेरिका, अष्ट्रियासहित तेस्रो मुलुकबाट आउनुपर्ने उनले बताए ।

'कोरोना संक्रमणको डरले अझैसम्म प्राविधिक नेपाल आउन सकेका छैनन् । दक्ष प्राविधिक नआउँदा राष्ट्रिय गौरवको यो आयोजनाको काम नै प्रभावित हुन पुगेको छ,' उनले भने, 'यसले गर्दा विमानस्थल संचालनमा आउने मितिको कुनै निधो छैन ।' जनशक्ति तत्काल आए पनि विमानस्थल संचालनमा ल्याउन अझै ६ महिनाभन्दा बढी समय लाग्ने उनले बताए ।

उनका अनुसार धावनमार्गमा जडान गरिने लाइट, सेन्ट्रल एसी, संचार उपकरण, फर्ड लाइट, एक्सरे मेसिन, मौसम पूर्वानुमान उपकरण, सीसी टिभी, उडान जानकारी डिस्प्ले, कन्भेयर बेल्टलगायतका उपकरण जडान गर्न विभिन्न देशबाट ६५ जनाभन्दा बढी प्राविधिक आउनुपर्ने हुन्छ ।

विमानस्थलको आईसीबी १ अन्तर्गत पूर्वाधार निर्माणको काम ६ अर्ब २२ करोडमा चिनियाँ ठेकेदार कम्पनी गरिरहेको छ भने आइसीबी २ अन्तर्गत करिब ५० करोडमा उपकरण जडानको ठेक्का थाइल्याण्डको एरो थाई कम्पनीले लिएको छ ।

प्रकाशित मिति: मंगलबार, माघ २७, २०७७ १८:५०