लोकतन्त्र जोगाउन र तानाशाहीका विरुद्ध सत्याग्रह गरिन्छ

A+ A A-

संविधान सर्वोपरी हो । केपी ओलीले संविधानमाथि बसेर निर्णय गर्न मिल्दैन । ‌ओली पनि जनताका सेवक हुन्, जनताका मालिक होइन । र, संविधानभन्दा माथि कोही पनि हुँदैनन् सबै संविधान तल हुन्छन् । ओलीले संविधानमा नदिएको अधिकार प्रयोग गरेर संसद विघटन गरे लोकतन्त्र धरापमा पारे । ओलीका समयमा पनि भ्रष्टाचार, अपराध दिनदिनै बढेका छन् । त्यसविरुद्ध अनशन बस्न लागेको हो ।

मेरो सत्याग्रह पहिला संविधान र लोकतन्त्र रक्षाकै लागि हो । त्यसपछि तानाशाहका विरुद्ध हो । ओलीले आफ्नो कदम फिर्ता लिएर वा अदालतले जनताका पक्षमा न्याय दिएर संविधानको रक्षा हुन्छ भने सत्याग्रह गर्न नपर्ला तैपनि लोकतन्त्र जोगाउन र तानाशाहीका विरुद्ध सत्याग्रह गरिन्छ ।

चिकित्सक र नागरिकका नाताले चिकित्सा तथा स्वास्थ्य क्षेत्रको सुधारका खातिर लडियो । केही प्राप्ति पनि भएका छन् । तर, नागरिकका हैसियतले मैले भोट दिएको जनप्रेमी सरकार र जनप्रेमी नेता हुन्छ भनेर हो । तानाशाह, भ्रष्ट, अपराधी जन्माउन भोट दिएको होइन । त्यसकारणले नागरिकका हैसियतले यस्तो प्रवृत्ति देखाउनेविरुद्ध र यिनीहरूलाई जवाफदेही बनाउने पनि मेरो दाइत्व रहन्छ ।

ओलीको रणनीति के छ भने ल है म गएँ भने मेरो पछि आउने भनेका प्रचण्ड र नेपाल हुन् । महाखराबको विकल्पमा महाखराब त हुन सक्दैन । जो कुर्चीमा बसेर गलत काम गर्दै छ पहिला तिनलाई निकाल्ने हो । त्यसपछि अरु खराब प्रवृत्ति भएकालाई पनि जवाफदेही बनाउने हो । प्रवृत्ति र गलत क्रियाकलाप, आपराधिक मानसिकताविरुद्ध लडाइँ लड्ने हो चाहे जुनसुकै पार्टी होस् । भ्रष्टका विरुद्ध निरन्तर लडिन्छ । यिनीहरूलाई छाडिँदैन ।

संसद विघटनविरुद्ध अहिंसात्मक नागरिक अभियानका क्रममा डा. गोविन्द केसीले शिलापत्रसँग गरेको वार्तालापको सम्पादित अंश ।