कोरोनाविरुद्धको खोप वितरणमा किन ढिलाइ भयो भन्दै जब मन्त्री त्रिपाठी कड्किए...

कोरोनाविरुद्धको खोप वितरणमा किन ढिलाइ भयो भन्दै जब मन्त्री त्रिपाठी कड्किए...

A+ A A-

शनिबार बिहान ११:४३ बजे लुम्बिनी प्रादेशिक अस्पतालको गेट हुँदै अघि-अघि नेपाल प्रहरीले स्कटिङ गर्दै बा २ झ ४०२५ नं. झण्डावाला गाडी प्रवेश गर्‍यो । त्यो झण्डावाला गाडीमा थिए स्वास्थ्य तथा जनसंख्यामन्त्री हृदेयस त्रिपाठी ।

गाडीबाट ओलर्न साथ लुम्बिनी प्रदेश स्वास्थ्य निर्देशनालयका निर्देशक डा. विनोद गिरी, कोरोनाविरुद्धको खोप व्यवस्थापन लुम्बिनी प्रदेशका संयोजक डा. विकास देवकोटा, प्रदेश आपूर्ति केन्द्रका प्रमुख दिनेश चापागाईं, लुम्बिनी प्रादेशिक अस्पतालका अध्यक्ष सूर्य भट्टराई, मेडिकल सुपरिटेण्डन डा. राजेन्द्र खनालसहितको टोलीले स्वागत गर्‍यो ।

स्वागत गर्नसाथ मन्त्री त्रिपाठी लुम्बिनी प्रदेशको सामाजिक विकास मन्त्रालयका कर्मचारी तथा प्रादेशिक अस्पतालका कर्मचारी र पदाधिकारीसँग छलफलमा बसे । प्रदेशमा खोपको अवस्थाबारे आपूर्ति केन्द्रका निर्देशक चापागाई, निर्देशनालय निर्देशक गिरीसहितको टोलीले मन्त्री त्रिपाठीलाई बिफ्रिङ गरे । बिफ्रिङका क्रममा पहाडि जिल्लामा ढिला खोप पुगेको मन्त्री सामु प्रष्ट पारे ।

लुम्बिनी प्रदेशमा कोरोनाविरुद्धको खोप वितरणमा ढिलाइ किन भयो भन्दै स्वास्थ्य मन्त्री त्रिपाठी कर्मचारी माथि खनिए । ‘लुम्बिनी प्रदेशका जिल्लामा ढिलो खोप वितरण हुनुको कारण के हो ?’ मन्त्री त्रिपाठीले भने, ‘गल्ती महशुस गर्नुहोस् । नभए आफैँ गल्ती महशुस गराउँछु ।’

उनले कर्मचारीलाई अन्य प्रदेशको भन्दा लुम्बिनी प्रदेशमा अलग्गै अविनन्द पत्र पठाउनुपर्ने हो भन्दै प्रश्नसमेत गरे । उनले १४ माघदेखि नै खोप लगाउन सुरु गर्ने भनि जानकारी गराएको भए पनि खोपबारे थाहै भएन भन्ने कुरा आपत्तिजनक रहेको बताए । उनले भने, ‘जिल्ला अस्पतालमा हामी केन्द्रित गर्‍यौँ । तार्केट ग्रुप तयार गर्‍यौँ । र पनि तपाईहरूले थाहै पाइन भन्नुहुन्छ ?’

उनले दोस्रो चरणमा खोप केन्द्रबाट खोप लगाउने तयारी गरेको भए पनि जिल्ला अस्पतालमा समेत व्यवस्थापन राम्रो नभएको भन्दै आफू चिन्तित भएको बताए । उनले भने, ‘हामी दोस्रो चरणमा खोप लगाउने भनेका छौँ । खोप केन्द्रमा जाँदा तपाईंले समाल्न सक्नुहुन्न भन्ने लाग्यो । जिल्ला अस्पतालमा जाँदा त यो हालत छ । देशभर करिव १६ हजार केन्द्र छन् । त्यहाँको व्यवस्थापन कसरी गर्नुहुन्छ । यो हेरेर म त चुनौतीपूर्ण पो देख्न थालेँ ।’

लुम्बिनी प्रदेशमा कोरोनाविरुद्धको खोप वितरणमा ढिलाइ भएपछि मन्त्री त्रिपाठी अनुगमनका लागि आएका थिए । उनले सबैलाई निःशुल्क खोप लगाउने र खोप वितरणको अभियानमा साथ नदिनु भनेको जनघात भएको मन्त्री त्रिपाठीको भनाइ थियो ।

मन्त्री त्रिपाठीले प्रादेशिक अस्पतालमै रहेका बेला लुम्बिनी प्रदेशका रुकुम र रोल्पा जिल्लाका अस्पतालका प्रमुखलाई फोन गरेर खोप पुगे नपुगेको र वितरणका बारेमा सोधेका थिए । खोप वितरणको समस्या र ढिलाइ हुनुको कारण पनि उनले फोनबाट स्पष्टीकरण लिएका थिए ।

जिल्ला प्रशासन र पालिकाको समन्वयनमा दुर्गम जिल्लामा वितरण गर्न सकिने मन्त्री त्रिपाठीको भनाइ छ । पहिलो चरणको खोप वितरणमा कुनै ढिलाइ गर्न नहुनेसमेत उनले बताए । उनले अबको तीन महिनाभित्रमा ७२ प्रतिशत खोप लगाउन योग्य नेपालीलाई कोरोनाविरुद्धको खोप दिइनेसमेत बताए ।

लुम्बिनी प्रदेशमा ३९ हजार ४ सय ९५ जनाको लागि ८७ हजार ६ सय ७९ डोज खोप लगाइने छ । शनिबारसम्म पहाड र तराईका जिल्लामा गरि २ हजार ६३ सय जनालाई खोप लगाइएको छ । १४ माघमा तराईका ६ वटा जिल्ला र १५ माघ पहाडी जिल्लामा खोप अभियान सुरु गर्दा प्रदेशमा कोरोनाविरुद्धको खोप लगाउन ढिला गएको लुम्बिनी प्रदेशको स्वास्थ्य निर्देशनालयले जनाएको छ ।

प्रकाशित मिति: शनिबार, माघ १७, २०७७ १८:३१