बुटवलको शक्ति प्रदर्शनबाट प्रचण्ड-माधव समूहको सन्देश : प्रतिगमनलाई पराजित गरेरै छाड्छौँ

बुटवलको शक्ति प्रदर्शनबाट प्रचण्ड-माधव समूहको सन्देश : प्रतिगमनलाई पराजित गरेरै छाड्छौँ

A+ A A-

राजा ज्ञानेन्द्र शाहको प्रतिगमनविरुद्धको निर्णायक आन्दोलन गर्न होस् वा पार्टीको राजनीतिक जागरणको अभियान तत्कालीन एमालेले बुटवललाई नै रोज्ने गरेको थियो । राष्ट्रिय राजनीतिक मुद्दामा बुटवलमा भएका प्रदर्शन निर्णायक चरणमै प्रवेश गरेका छन् ।

अहिले प्रधानमन्त्री केपी ओलीले संविधानविपरीत संसद् विघटन गर्दै प्रतिगमन गरेकाले यसविरुद्ध पनि निर्णायक आन्दोलन आवश्यक भएको र यसमा लुम्बिनी प्रदेशकोको साथ आवश्यक रहेको कुरा प्रचण्ड-माधव समूहले बुटवलको विरोधसभामा गरेका छन् । उनीहरूले लुम्बिनीवासीको साथ र सहयोगमा प्रतिगमनलाई पराजित गरेरै छाड्ने संकल्पसमेत लिएका छन् ।

राजतन्तत्रविरुद्ध २०६२/०६३ मा जनआन्दोलन हुँदा एमालेका तत्कालीन महासचिव माधवकुमार नेपालको नेतृत्वमा बुटवलमा सबैभन्दा ठूलो प्रदर्शन भएको थियो । २०६४ सालको निर्वाचनमा तेस्रो पार्टी भएपछि तत्कालीन एमालेले आफ्नो राजनीतिक जागरणको कार्यक्रम १० पुस २०६५ मा ठूलो सभामार्फत गरेको थियो । त्यहाँबाट सुरु भएको राजनीतिक जागरणको बलमा दोस्रो संविधानसभाको निर्वाचमा एमालेले आफ्नो साख फर्काउन सफल भएको थियो ।

यस्तै, २०७३ मा तत्कालीन प्रधानमन्त्री पुष्पकमल दाहाल 'प्रचण्ड' नेतृत्वको सरकारले साबिकको लुम्बिनीका पहाडी जिल्लालाई लुम्बिनी प्रदेशबाट हटाउने निर्णय गर्दा बुटवलमा बृहत् प्रदर्शन भएको थियो । त्यो आन्दोलनको बलमा सरकार आफ्नो निर्णयबाट पछि हट्न बाध्य भयो ।

बिहीबार बुटवलमा बृहत् शक्ति प्रदर्शन गरेका प्रचण्ड-माधव समूहले बुटवलको भूमिका स्मरण गर्दै प्रधानमन्त्री ओलीको प्रतिगमनविरुद्ध निर्णायक आन्दोलनमा साथ खोजेका छन् । प्रधानमन्त्री ओलीले असंवैधानिक रूपमा प्रतिनिधिसभा विघटन गर्दै प्रतिगमन गरेकाले त्यसलाई पराजय गर्नैपर्ने उनीहरूको भनाइ छ ।

सभालाई सम्बोधन गर्दै त्यस समूहका अध्यक्ष प्रचण्डले श्री ३ महाराज बन्नेहरूलाई लुम्बिनी प्रदेशका जनताले धराशायी बनाउने चेतावनी दिए । ‘संविधानको घाँटी रेटेर हत्या गर्ने, लोकतन्त्रको हत्या गर्ने निरंकुश र स्वेच्छाचारी ओलीको चुट्कीको भरमा अन्त्य हुनेछन्’, प्रचण्डले भने, तपाईंहरू साथ दिनुहोस् श्री ३ बन्ने ओलीको चाहनालाई समाप्त पारेर बाँकी दुई वर्षभित्र देशलाई हामी समृद्ध बनाउनेछौँ ।’

सभालाई सम्बोधन गर्दै अर्का अध्यक्ष नेपालले ओलीका कदमले उनी आदरार्थी सम्बोधनका निम्तिसमेत लायक नभएको बताए ।

‘हुन त केपी ओलीलाई के तपाईं भन्नुजस्तो लाग्छ । राम्रो काम गरे पो सम्मान गर्नु ? केपी ओली सम्मानका लागि योग्य छैनन्,’ उनले भने । नेपालले ओलीको कदमविरुद्ध सबै एकजुट भएर आन्दोलित हुनुपर्ने धारणा व्यक्त गरे ।

सभालाई सम्बोधन गर्दै नेता वर्षमान पुनले ओलीले जनयुद्धलाई होच्याएको भन्दै आक्रोश व्यक्त गरे । माओवादी जनयुद्धलाई ‘कुहिएको फर्सी’ र जनयुद्धमा लागेकालाई ‘बाँदर’ को संज्ञा दिएकोमा पुनको आपत्ति थियो ।

‘तपाईं दुई पटक देशको प्रधानमन्त्री बन्नुभयो’, विरोधसभामा पुनले भने, ‘जसको योगदानले दुई पटक देशको प्रधानमन्त्री बन्नुभयो, उही कुहिएको फर्सी ?, उही बाँदर ?’

प्रचण्ड-माधव समूहको शक्ति प्रदर्शनमा कार्यकर्ताहरूको उल्लेखनीय सहभागिता थियो । आफ्नो राजनीतिक क्षेत्रमा कार्यकर्ताहरूको सहभागिताबाट त्यस समूहका नेता घनश्याम भुसाल निकै उत्साहित देखिन्थे । सभालाई सम्बोधन गर्दै भुसालले प्रधानमन्त्री ओली राजा र राणाहरूको प्रेत रहेको बताए ।

ओलीको कदम संसद् र सडकबाट हार्ने उनको दाबी थियो । 'कमरेड ओलीको कदम अब हार्ने कुरामा कुनै शंका छैन, हार्छ, हार्छ, हराइन्छ । यो सडकमा हराइन्छ, अदालतमा हराइन्छ, सबैतिर हराइन्छ,’ भुसालले दाबी गरे ।

सभामा भएको सहभागिताबाट हौसिएका भुसालले थपे, ‘ओलीको प्रतिगमनलाई अब घुँडा टेकाइन्छ ।’ सभामा सम्बोधन गरेका नेता नेताहरूले २८ माघमा तय भएको जनप्रदर्शनलाई विशाल बनाउने भन्दै सहभागिताका लागि अपिलसमेत गरे ।

प्रकाशित मिति: बिहीबार, माघ १५, २०७७ १९:५०