एक वर्षअघि बनेका ३ पुल उद्घाटन गर्न अर्थमन्त्री पौडेलको दौडधुप

A+ A A-

अर्थमन्त्री विष्णु पौडेल बुधबार दिनभर गृहजिल्ला रूपन्देहीमा पुल उद्घाटनदेखि सडक शिलान्याससम्मका कार्यक्रममा व्यस्त रहे । मंगलबार साँझ गृहजिल्ला आएका अर्थमन्त्री पौडेल बुधबार जिल्लाका आधा दर्जन बढी कार्यक्रममा सहभागी भए । यसबीचमा उनले तीनवटा पुलको उद्घाटन, दुईवटा शिलान्यास कार्यक्रम गरे भने दुईवटा अन्य कार्यक्रममा सहभागी बने ।

बुधबार बिहान मगरघाटस्थित तिनाउ पुलको उद्घाटन गरेपछि उनी नयाँ गाउँस्थित दानव नदीमा निर्माण भएको पुल उद्घाटन गर्न पुगे । त्यसपछि मातीपुर स्वास्थ्य चौकी फर्साटिकरमा सेवा विस्तारको शुभारम्भ गरे । उनी फर्साटिकर माविमा सिभिल इन्जिनियरिङ भवनको शिलान्यासमा कोही समय बिताए । त्यसपछि देवीनगरस्थित तिनाउ पुलको उद्घाटन पुगे । लगत्तै उनी तिलोत्तमा चेम्बर अफ कर्मशको साधारणसभामा प्रमुख अतिथि बने ।

त्यसपछि उनले बुटवल बेलहिया व्यापारिक आयोजनाअन्तर्गत विस्तार हुन बाँकी रहेको चौराह–चिडियाखोला ८२ फुट सडकको शिलान्यास गरे । अदालतको आदेशले ५ वर्षसम्म रोकिएको उक्त सडक विस्तारका लागि अदालतबाट 'क्लिन चिट' पाएपछि यो सडक विस्तार हुन लागेको हो ।

पुल बनेको १ वर्षपछि उद्घाटन

अर्थमन्त्री पौडेलले बुधबार उद्घाटन गरेका तीनवटै पुलको निर्माण सकिएको एक वर्षभन्दा बढी भइसकेको छ । पहिले उद्घाटन गरेको योगीकुटी र शिवनगर जोड्ने मगरघाटको पुल २०७३ सालमा सम्झौता भएर २०७६ माघमा सम्पन्न भएको हो । १ सय ८० मिटर लम्बाइ ११ मिटरकै चौडाइको यो पुलको लागत २१ करोड ४९ लाख रहेको छ ।

त्यस्तै, नयाँ गाउँस्थित दानव नदीमा बनेको पुल ३० भदौ २०७६ मा सकिएको थियो । ९८ दसमलव २५ मिटर लम्बाइ र ७ दशमलब २ मिटर चौडाइको पुल ६ करोड २३ लाख रुपैयाँमा तयार भएको हो ।

त्यस्तै, देवीनगर र बुद्धनगर जोड्ने पुलको निर्माण ५ माघ ०७६ मा सकिएको हो । ३० असार २०७२ मा निर्माण सुरु भएको उक्त पुल १० करोड ४५ लाखको लगानीमा निर्माण भएको हो । यो पुलको लम्बाई १ सय १० मिटर छ भने चौडाई ११ मिटर रहेको छ ।

विकासको महाअभियान चलाएका छौँ : अर्थमन्त्री

बुटवलको मगरघाटस्थित तिनाउ पुलको उद्घाटन गर्दै मन्त्री पौडेलले नेपालमा पुल मात्र नबनाएर विकासको महाअभियान नै चलाएको बताए । ‘कुनै समयमा पुल नहुँदा तिनाउ वारी र पारीको विभेद थियो । पारीका जनता अस्पतालमा आउन नसक्ने अवस्थासमेत थियो । तर, अहिले वारी र पारीको विभेद सकिएको छ,’ उनले थपे, ‘के-के र कहाँ-कहाँ पुल बनायौँ भनेर सकिदैन । हामीले पुल मात्र बनाएका छैनौँ विकासको महाअभियान नै चलाएका छौँ ।’

पौडेलले तिनाउ दानव कोरिडोरमा पर्ने बस्तीका स्थानीयलाई वैकल्पिक व्यवस्थापन गर्नेसमेत सो अवसरमा बताए । ‘तिनाउ नदीको किनारमा बसौँ, बसौँ भन्ने गरी यहाँ विकास भइरहेको छ । बेलबास बेथरी सडक बन्दै छ', उनले भने, 'केही समयअघि पनि कोरिडोर सडक बनाउनका लागि शिल्यानास गरेका थियौँ । त्यहाँ पर्नेहरूलाई वैकल्पिक व्यवस्था गरेर हामीले कोरिडोरको काम गर्छौं ।’

प्रकाशित मिति: बुधबार, माघ १४, २०७७ १९:२२