ठगी सूचीका म्यानपावरतिर श्रममन्त्रीको ध्यान, 'सेटिङ'मा कारबाही फुकुवा

A+ A A-

श्रम, रोजगार तथा सामाजिक सुरक्षामन्त्री गौरीशंकर चौधरी कारबाहीकाे सूचीमा परेका म्यानपावर कम्पनीलाई जाेगाउन उद्यत् देखिएका छन् । रोजगारीका नाममा ठगिएकाहरूलाई न्यायका लागि पहल गर्नुकाे साटाे मन्त्री चाैधरी वैदेशिक राेजगार विभागले ठगी सूचीमा राखेका म्यानपावरलाई जाेगाउन लागिपरेका हुन् ।

विभाग र वैदेशिक राेजगार महाशाखालाई सुइँकाे समेत नदिई श्रममन्त्री चाैधरीले साेमबार कतार प्रहरीका लागि भन्दै गैरकानुनी रूपमा अन्तर्वार्ता लिने एसओएस म्यानपावर प्रालिमाथिको कारबाही फुकुवा गरिदिए । अब उनी कारबाहीमा परेका अन्य केही कम्पनीलाई उन्मुक्ति दिन लागिपरेका मन्त्रालय स्राेत बताउँछ ।

मन्त्रालयका कर्मचारीले समेत एसओएस म्यानपावरमाथि कारबाही फुकुवाकाे निर्णय विभागका महानिर्देशकको टेबुलमा पुगेपछि मात्र थाहा पाएका थिए ।

कतार प्रहरीका लागि भन्दै गैरकानुनी रूपमा अन्तर्वार्ता लिइरहेको अवस्थामा छापा मारी गत ८ मंसिरमा विभागले एसओएसलाई कारबाही गरेकाे थियाे ।

वैदेशिक रोजगार ऐन २०६४ विपरीत अन्तर्वार्ता लिएको भन्दै विभागले एसओएसलाई छ महिनासम्म काम गर्न राेक लगाएकाे थियाे । तर, दुई महिना पनि नपुग्दै श्रममन्त्री चाैधरीले म्यानपावरमाथिकाे कारबाही उल्ट्याइदिए ।

मन्त्रालयका एक कर्मचारीका अनुसार चौधरीले कारबाही फुकुवा गर्ने म्यानपावरकाे सूची नै तयार गरेका छन् । 'उहाँ यतिमै राेकिने छाँटकाँट छैन', मन्त्रालयका ती कर्मचारीले भने, 'उहाँकाे टेबुलमा अन्य म्यानपावरका फाइल पनि पुगेका छन्, जसमा चाँडै निर्णय हुन सक्छ ।'

वैदेशिक रोजगारीमा कामदार पठाउने क्रममा ठगी गर्ने, वैदेशिक रोजगारीका नाममा सिण्डिकेट खडा गर्न खोज्ने, अवैध बाटो हुँदै कामदारलाई विदेश पठाउने, वैदेशिक रोजगारीमा जाने कामदारसँग सरकारले तोकेभन्दा धेरै रकम लिने म्यानपावर कम्पनीलाई विभागले कारबाही गर्दै आएको छ ।

विभागकाे कारबाहीप्रति चित्त नबुझे म्यानपावरले श्रममन्त्रीसमक्ष पुनरावेदन गर्न पाउने कानुनी व्यवस्था छ ।

श्रममन्त्रीको टेबुलमा दर्जन बढी म्यानपावरका पुनरावेदन फाइल रहेकाे विभागले जनाएको छ । ती म्यानपावरलाई विभागले तोकेको क्षतिपूर्ति र कारबाहीको अध्ययन नै नगरी श्रममन्त्री चौधरीले धमाधम फुकुवा गर्न थालेका मन्त्रालयका ती कर्मचारीले बताए ।

मन्त्रालय र विभागका कर्मचारीहरू एसओएस सञ्चालक हेम गुरुङसँग माेटाे रकम लिएर मन्त्री चाैधरीले कारबाही फुकुवा गरेको शंका गर्छन् । 'नभए रातारात, हठात् कारबाही गर्नुकाे अर्थ के हाे ?', विभागका एक कर्मचारीकाे प्रश्न छ ।

चाैधरीकाे चासाे

वैदेशिक राेजगारीका यावत समस्या समाधानका लागि कुनै निर्णय गर्न नसकेका मन्त्री चाैधरी अहिले कुन म्यानपावरविरुद्ध कस्ता मुद्दा छन् भन्नेमा बढी केन्द्रित देखिएका छन् ।

विभागले गरेका महत्त्वपूर्ण निर्णय मन्त्रीले उल्ट्याएर म्यानपावरको कारबाही फुकुवा गर्दा कर्मचारीमाथि प्रश्न उठ्ने र मनोबल गिर्ने विभागका अर्का एक कर्मचारी बताउँछन् । ‘श्रम मन्त्रालयमा जिम्मेवारी सम्हल्न आएका कतिपय श्रममन्त्रीले विभागले गरेका काम कारबाहीका बारेमा अध्ययन गर्दैनन् । मन्त्री र केही नेताको भनसुनमा म्यानपावरका कारबाही र ठगीका मुद्दा लुकाउन दबाब दिन्छन्’, उनले भने, ‘विभागले ठगी गर्ने म्यानपावरलाई कारबाही गरे पनि मन्त्रीले एक मिनेटमा सबै उल्ट्याइदिन्छन् । अनुगमन गर्दा पनि सबैभन्दा ठूलो चुनौती भनेका नै मन्त्री, नेता र ठूला म्यानपावर सञ्चालक नै हुन् ।'

वैदेशिक रोजगारी क्षेत्रमा सीमित म्यानपावरले मात्र राम्राे काम गरिरहेको ती कर्मचारीकाे भनाइ छ ।

म्यानपावर खाेज्दै मन्त्री

श्रममन्त्री चौधरीले केही व्यवसायीमार्फत विभागकाे कारबाहीमा परेका म्यानपावरसँग सम्पर्क गर्न थालेको आक्षेप छ । वैदेशिक रोजगारीमा कामदार पठाउँदै आएका २ सयभन्दा धेरै म्यानपावरलाई विभागले विभिन्न उजुरीका आधारमा कारबाही गरेको छ । विभागका अनुसार ठगीमा संलग्न म्यानपावरमाथि कारबाहीस्वरूप समय ताेकेर कामकाज राेक्का गरिन्छ ।

गत ५ पुसमा संसद् विघटन गरी सरकारले वैशाखमा निर्वाचनकाे मिति ताेकिसकेकाे अवस्थामा चाैधरीले श्रम मन्त्रालयको जिम्मेवारी पाएका थिए ।

प्रकाशित मिति: बिहीबार, माघ १५, २०७७ ०५:३२