विष्णु पौडेल र घनश्याम भुसालको गृहजिल्लामा कुन समूहको पल्ला भारी ?

A+ A A-

राष्ट्रिय राजनीतिमा प्रभाव जमाएका नेकपा नेताहरूको जिल्ला हो, रूपन्देही । नेकपा विभाजनको दिशामा अघि बढिरहँदा नेता कार्यकर्ताको तीव्र ध्रुवीकरण चलिरहेको छ ।

पार्टी औपचारिक रूपमा नफुट्दै तल्लो कमिटी र नेताहरू दुई समूहमा विभाजित भएका छन् । प्रधानमन्त्री केपी ओली र पुष्पकमल दाहाल प्रचण्ड–माधव नेपाल समूहले छुट्टाछुट्टै भेला गर्दै संगठनमा आफ्नो पकड जोगाउन प्रयत्न गरिरहेका छन् ।

पार्टी कमिटी र कार्यकर्तालाई आफ्नो पक्षमा राख्न ओली समूहका महासचिव विष्णु पौडेल र प्रचण्ड–माधव समूहका घनश्याम भुसालबीच चर्को प्रतिस्पर्धा देखिन्छ । दुवै पक्षले आफ्नो पार्टी वैधानिक नेकपा भएको र चुनाव चिन्ह पनि आफैँले पाउने प्रचार गरिरहेका छन् ।

नेकपाभित्रको तिक्तता संघ, प्रदेश हुँदै स्थानीय तहसम्मै पुगेको छ । राष्ट्रिय राजनीतिमा प्रभाव जमाउने पौडेल, भुसाल, छविलाल विश्वकर्मासहितका नेताहरू रहेकाले पनि रूपन्देहीको नेकपा ध्रुवीकरणको चर्चा छ ।

बालुवाटार जग्गा प्रकरण साथै रूपन्देहीकाे सुकुम्बासी बस्तीकाे जग्गा आफ्नो छाेरा नवीनकाे नाममा ल्याएकाे खुलासा भएसँगै पाैडेल केन्द्रीय राजनीतिमा रक्षात्मक बन्न पुगेका थिए । पछिल्लाे काल त्यसलाइ वास्ता नगरी ओलीले अर्थमन्त्री बनाएसँगै उनी खुलेर उनकाे समूहमा देखिएका छन् ।

०७४ सालको निर्वाचनमा जिल्लाका ५ निर्वाचन क्षेत्रमध्ये ३ क्षेत्रमा पौडेल, भुसाल र विश्वकर्माले जिते । २ क्षेत्र कांग्रेसले जितेको थियो । विश्वकर्मा ओली समूहमा छन् । ओली सरकारमा कृषिमन्त्रीसमेत रहेका भुसालले उनकाे कदम असंवैधानिक भन्दै राजीनामा दिएका छन् । उनी प्रचण्ड–माधव समूहका एक शीर्षस्थ नेता हुन् ।

पार्टी एक नहुँदै रूपन्देहीमा तत्कालीन माओवादीबाट केन्द्रीय राजनीतिमा प्रभाव राख्ने खासै नेता थिएनन् । त्यसैले पार्टी विभाजनमा पनि पूर्वएमाले पंक्तिकै विभाजन चर्चामा छ ।

रूपन्देहीका १६ वटा स्थानीय तहमध्ये नेकपाले ८ तहमा प्रमुख तथा उपप्रमुख जितेको थियो । अर्को, एउटा तहमा उपाध्यक्ष जितेको थियो । तीमध्ये २ स्थानीय तहका अध्यक्ष, उपाध्यक्ष र एउटा तहका उपाध्यक्ष प्रचण्ड–माधव नेपाल समूहमा रहेका छन् । अरु सबै तहका प्रमुख–उपप्रमुख ओली समूहमा खुलेका छन् ।

बुटवल उपमहानगरपालिकाका प्रमुख शिवराज सुवेदी र उपप्रमुख गोमादेवी आचार्य ओली समूहमा लागेका छन् । सुवेदी दुई पार्टी एकीकरणपछि बनेको जिल्ला समितिका अध्यक्षसमेत हुन् ।

त्यस्तै शुद्धोधन गाउँपालिकाका अध्यक्ष किशुनचन्द्र चौधरी र उपाध्यक्ष शान्तादेवी ज्ञवाली, सियारी गाउँपालिकाका अध्यक्ष अयोध्या थारु, सैनामैना नगरपालिकाका नगरप्रमुख चित्रबहादुर कार्की र उपाध्यक्ष विना राना, कञ्चन गाउँपालिकाका अध्यक्ष गोकर्ण क्षेत्री र उपाध्यक्ष गोमा तरामु र देवदहकी उपाध्यक्ष विद्या गुरुङ ओली खुलेका छन् ।

त्यस्तै, ओमसतिया गाउँपालिकाका हीरा केवट र उपाध्यक्ष सुदरमतीकुमारी हरिजन ओली समूहमा छन् । यी दुवै पूर्वमाओवादी पक्षका हुन् । प्रदेश सांसद दधिराम न्यौपानेका विश्वास पात्रसमेत रहेका यी दुवै जना न्यौपानेसँगै ओली समूहमा लागेका हुन् ।

त्यसैगरी, तिलोत्तमा नगरपालिकाका नगरप्रमुख बासुदेव घिमिरे र जागेश्वरी देवी चौधरी भने प्रचण्ड–माधव समूहका हुन् । संसद विघटनपछि केपी ओलीले विस्तार गरेको केन्द्रीय समितिमा समेत उपप्रमुख जागेश्वरी देवीको नाम आएपछि उनले विज्ञप्ति नै जारी गरेर उक्त समूहमा नरहेको प्रष्ट पारेकी थिइन् । तिलोत्तमा नगरपालिका नेता भुसालको गृहनगर पनि हो ।

त्यस्तै, सिद्धार्थनगर नगरपालिकाका प्रमुख हरि अधिकारी, उपाध्यक्ष उमा काफ्ले, सियारी गाउँपालिकाकी उपाध्यक्ष अमृता गुरुङ प्रचण्ड–नेपाल समूहमा रहेका छन् ।

रूपन्देही जिल्लाबाट कुल ११ जना सांसदले लुम्बिनी प्रदेशमा प्रतिनिधित्व गर्छन् । जुन प्रत्यक्ष र समानुपातिकसहित हो । जसमध्ये १० जना अहिले केपी ओली समूहमा छन् भने एक जना मात्र प्रचण्ड–माधव समूहमा छन् । निर्वाचनमा तत्कालीन माओवादी केन्द्रबाट दुई जना सांसद निर्वाचित भएका थिए ।

रूपन्देही क्षेत्र नं. १ को ख बाट दधिराम न्यौपाने र समानुपातिकतर्फबाट दिपा विक प्रदेश सांसद बनेका थिए । तर, न्यौपाने हालै ओली खेमामा आएका हुन् । पार्टी एकीकरणपछि उनी जिल्लाका सचिवसमेत थिए ।

लुम्बिनी प्रदेशमा रूपन्देहीका लिला गिरी, भोजप्रसाद श्रेष्ठ, भूमिश्वर ढकाल, तुल्सी चौधरी, विमला पन्थी, सुनता कुमार ठटेर, थान कुमारी चपागाईं, कमला विक र कृष्ण न्यौपाने ओली पक्षका हुन् ।

तत्कालीन एमाले र माओवादी केन्द्र एकता भएपछि रूपन्देहीमा १३ जेठ ०७६ मा १ सय ७४ जनाको जिल्ला कमिटी बन्यो । तत्कालीन माओवादीका ४० प्रतिशत र एमालेका ६० प्रतिशत रहने गरी बनेको जिल्ला समितिमा पनि ओली पक्ष बलियो देखिएको छ । त्यस्तै, नेकपा प्रदेश कमिटीमा नेकपाका २५ सदस्य हुन् । जसमध्ये २० जना ओली पक्षका र पाँच जना प्रचण्ड–माधव पक्षका रहेका छन् ।

नेकपा विभाजनको अन्तिम टुंगो नलागे पनि दुवै पक्षले भने जिल्लामा आ–आफ्नो दाबी प्रस्तुत गर्दै आएका छन् । नेकपा रूपन्देही ईन्चार्ज (केपी समूह)का लिला गिरीले जिल्लामा ओली पक्ष नै बलियो भएको बताए । ‘जिल्लामा हामी नै बलियो छौ । एकता गर्दा पनि कसरी गरियो भन्नेले पनि देखाउँछ । हामी बलियो छौँ,’ उनले भने ।

प्रचण्ड–माधव समूहका नेता सिद्धिचरण भट्टराईले ओलीको व्यवहारले आम कार्यकर्तामा निराशा छाएको हुँदा जिल्लामा ओली समूह कमजोर बन्दै गएको बताए । उनले जिल्ला कमिटिमा आफ्नो समूहको बहुमत रहेको दाबी गरे ।

प्रकाशित मिति: मंगलबार, माघ १३, २०७७ १८:२१