कतारी पुलिसमा भारत हुँदै म्यानपावरले ओसार्न थाले कामदार

A+ A A-

वैदेशिक रोजगारीमा श्रमिक आपूर्ति गर्दै आएका म्यानपावर कम्पनीले कतार प्रहरीमा भिसा प्रमाणीकरण नै नगरी कामदार पुर्‍याएको तथ्य खुलेको छ । कतारस्थित नेपाली दूतावासको सम्पर्कमा आएका सरोज कुवर भिसा प्रमाणीकरण नै नगरी कतारी प्रहरीको रोजगारीका लागि कतार पुगेका छन् । कुँवर कुन म्यानपावरमार्फत् कसरी कतार प्रहरीमा गए भन्ने विषयमा दूतावासले खुलाएको छैन ।

दूतावासका अनुसार पछिल्लो समय म्यानपावर कम्पनीले भारत हुँदै नेपाली कामदार कतारी प्रहरी लैजाने गरेका छन् । केही म्यानपावर कम्पनीले कतार प्रहरीमा व्यक्तिगत श्रम स्वीकृति र भारतको बाँटो हुँदै ल्याइरहेको सूचना आएको दूतावासले जानकारी दिएको छ ।

कतार प्रहरीका लागि म्यानपावरले भिसा प्रमाणीकरणका लागि आवेदन नदिएको पनि दूतावासले जनाएको छ । म्यानपावर र एजेन्टले भारत हुँदै कतार प्रहरीमा कामदार ल्याइरहेको विषयमा दूतावासले वैदेशिक रोजगारी विभागलाई जानकारी गराएको छ ।

गत भदौयता सीमित म्यानपावरले सिण्डिकेट खडा गरेर कतार प्रहरीमा कामदार पठाउन प्रयास गरेपछि सरकारले अवैध भन्दै रोेकेको थियो । सीमित म्यानपावरले प्रक्रिया नपुर्‍याइ कतार प्रहरीमा कामदार लैजाने खोजेपछि रोके लगाएको वैदेशिक रोजगार विभागका महानिर्देशक कुमार दाहालले जानकारी दिए । कतार प्रहरीमा कामदार पठाउन रोकेपछि म्यानपावरले भारत हुँदै श्रमिक पठाउने थालेको सूचना आएको र यसबारे अध्ययन थालेको विभागका महानिर्देशक दाहालको भनाइ छ ।

‘नेपालबाट तत्काल कतार प्रहरीका लागि श्रम स्वीकृति जारी भएको छैन । जसका कारण दूतावासको सम्पर्कमा आएका कामदार कसरी कतार पुगे भन्ने अनुसन्धान हुन्छ’ उनले भने, ‘विभागले कुन म्यानपावरले कसरी कामदार पठाइरहेका छ भनेर अध्ययन अनुसन्धान थालेको छ ।'

१७ वटा म्यानपावर कम्पनीले मात्र कतारी भिसा सेन्टर (क्युभीसी)मार्फत कामदार पठाउन छनोट भएका थिए । तर, व्यवस्थापिका संसद्अन्तर्गतको उद्योग तथा वाणिज्य र श्रम तथा उपभोक्ता हित समिति र म्यानपावर व्यवसायी चर्को विरोधपछि उक्त निर्णयबाट क्युभीसीपछि हटेको थियो ।

कतारले विश्वकपकै लागि ३ हजारभन्दा धेरै सुरक्षा गार्ड र नेपालीलाई कतारी प्रहरीमा लैजानका लागि कोटा छुटाएको थियो । तर, नेपालबाट लैजाने कामदारका लागि समिति म्यानपावरले सिण्डिकेट गर्ने भएपछि कतारी प्रहरी र सुरक्षा गार्ड डिमाण्ड अन्योलमा परेको हो ।

सीमित म्यानपावरमार्फत कतार प्रहरीमा कामदार लैजान नेपालस्थित कतारी राजदूतवासको पनि संग्लनता रहेको भन्दै म्यानपावर व्यवसायीले चर्को विरोध गरेका थिए ।

प्रकाशित मिति: आइतबार, माघ ११, २०७७ १५:४०