वैदेशिक रोजगारपीडित न्याय खोज्दै, अनुगमनकाे विरोधमा म्यानपावर व्यवसायीको आन्दोलन

वैदेशिक रोजगारपीडित न्याय खोज्दै, अनुगमनकाे विरोधमा म्यानपावर व्यवसायीको आन्दोलन

A+ A A-

एक वर्षअघि रोजगारीका लागि इटाली जान होमकाजी गुरुङले इम्पावर ओभरसिजमा ५ लाख रुपैयाँ बुझाएका थिए । गुरुङले रकमसँगै राहदानीसमेत दिए ।

म्यानपावरले एक १ वर्षसम्म रोजगारीमा पठाएन । राहदानीसँगै पैसा पनि फिर्ता नदिएपछि वैदेशिक रोजगार विभागमा उजुरी गर्न आएको गुरुङले जानकारी दिए । इटाली रोजगारी पठाउँछु भनेर म्यानपावरले १ वर्षसम्म झुक्याएको गुुरुङले बताए ।

‘रोजगारीमा पठाउँछु भनेर पैसा र राहदानी माग्छन् । तर, रोजगारीमा पनि पठाउँदैन । पैसा फिर्ता माग्दा फोन उठाउँदैन । जे मन लाग्छ, त्यही गर भनेर जवाफ दिन्छ’, उनले भने, ‘देशमा रोजगारी पाइँदैन । विदेश जाँदा म्यानपावरले ठग्छन् । म्यानपावरले विभागमा गरेको उजुरीको समेत वास्ता गर्दैन ।’

यस्तै, दीपज्योति ओभरसिज म्यानपावर प्रालिले कर्मा गोल्जेन शर्मालाई रोजगारीमा जापान पठाइदिन्छु भनेर ४ लाख रुपैयाँ लिएको थियो । तर, साे म्यानपावरले शर्मालाई जापान त पठाएन नै पैसा पनि फिर्ता दिएन । त्यसपछि आफू न्यायका लागि विभागमा आएको शर्माले बताए ।

शर्मा र गुरुङ त विभागमा भेटिएका प्रतिनिधिपात्र मात्र हुन् । विभागमा दैनिक ६० देखि ८० जना म्यानपावरपीडित धाउने गरेको विभागले जानकारी दिएको छ । रोजगारीका नाममा ठगिएको भन्दै रोजगारपीडित विभागभित्र न्याय माग्दै छन् भने म्यानपापरमाथि सरकारले अनुगमन गरेको भन्दै व्यवसायी आन्दोलनमा उत्रिएका छन् ।

अनुगमनको विरोधमा म्यानपावर आन्दोलित

वैदेशिक रोजगार विभागले जथाभावी अनुगमन गरेको भन्दै वैदेशिक रोजगार व्यवसायी संघ आन्दोलनमा उत्रिएका छन् । विभागले वैदेशिक रोजगार क्षेत्र अस्तव्यस्त भए पनि सुधारतिर चासो नदिई म्यानपावरमा बिनाकारण अनुगमन गरिरहेको संघको आरोप छ ।

व्यवसाय प्रवर्द्धनमा तथा सुशासनका लागि विभागले गर्नुपर्ने अत्यावश्यक सुधार गर्न आनाकानी गरेका कारण आन्दोलनमा उत्रिनुपरेको संघका महासचिव सुजित कुमार श्रेष्ठले बताए ।

कोरोना महामारीका कारण व्यवसाय धाराशयी हुने अवस्थामा पुग्दा पनि सरकारले सुधार तथा राहतका कार्यक्रम नल्याएको उनको आरोप छ । ‘विभागले अनुगमनका नाममा म्यानपावर व्यवसायीलाई तर्साएर नियन्त्रणमा राख्ने शैली देखाएको छ । म्यानपावर व्यवसायी कोरोनका कारण लगानी डुब्बाएर बसेका छन् । यस्तो समयमा विभागले म्यानपावरलाई नै तर्साउने काम गरेको छ,’ उनले भने, ‘कोरोना कारण धरापमा परेका व्यवसायीको मनोबल उकास्नुपर्ने समयमा विभागले नियन्त्रणमुखी रवैया देखाइरहेका कारण व्यवसायी सडकमा ओर्लन बाध्य भएका छौँ । सरकारले व्यवसायीको सुरक्षाको ग्यारेन्टी नगरेसम्म आन्दोलन गर्न सकिन्छ ।’

सरकारले विभिन्न बहानामा वैदेशिक रोजगारी क्षेत्र धराप र विस्थापित गर्न काम गरिरहेको उनको आरोप छ ।

सुधारका लागि अनुगमन : महानिर्देशक दहाल

सरकारले वैदेशिक रोजगारक्षेत्रका विकृति नियन्त्रण गर्न तथा रोजगारीका नाममा ठगिएका कामदारले गरेको उजुरीका आधारमा म्यानपावरमा अनुगमन गरिरहेको विभागका महानिर्देशक कुमार दहालले बताए ।

सरकारले वैदेशिक रोजगार क्षेत्रमा भइरहेको विकृति सुधार गर्न र रोजगारीका नाममा भइरहेको ठगी नियन्त्रण गर्न खोजिरहेको उनले बताए । ‘विभागले राम्रा र ठगीको उजुरी नपरेका म्यानपावरलाई बिनाकारण अनुगमन गरेको छैन । रोजगारीमा कामदार पठाउने नाममा ठगी गर्न र रोजगारीका नाममा कामदारलाई दुःख दिने म्यानपावरमाथि विभागले अनुगमन गर्दै आएको छ,’ उनले भने, ‘वैदेशिक रोजगार व्यवसायी संघले आरोप लगाएजस्तो विभागका कर्मचारीले पैसाका लागि म्यानपावरकाे अनुगमन गरेका छैनन् । आर्थिक चलखेल गरेर अनुगमन गरेको प्रमाण लिएर आए तत्काल कारबाही हुन्छ ।’ विभागलाई आरोप लगाउनुपहिले म्यानपावरभित्रका ठगी र विकृति सुधार्न संघलाई उनको सुझाव छ ।

प्रकाशित मिति: आइतबार, माघ ११, २०७७ १२:५१