महोत्तरीका मिटरब्याजी अनिरुद्धको तमसुक किनबेच धन्दा, ऋणी महिलालाई यौनसम्बन्ध राख्न दबाब

महोत्तरीका मिटरब्याजी अनिरुद्धको तमसुक किनबेच धन्दा, ऋणी महिलालाई यौनसम्बन्ध राख्न दबाब

A+ A A-

महोत्तरीको भंगहा नगरपालिका–५, सीतापुरकी ३५ वर्षीया सविरा खातुनले श्रीमान् अल्लाउद्दिनलाई वैदेशिक रोजगारीका लागि साउदी पठाउन स्थानीय साहु अनिरुद्ध साहसँग मासिक सयकडा ३ रुपैयाँ अर्थात् ३६ प्रतिशत ब्याजदरमा ५० हजार रुपैयाँ ऋण लिइन् । आर्थिक अवस्था निकै कमजोर रहेकी सविरालाई चार जना छोराछोरी पाल्न मुस्किल परेपछि उनले श्रीमान्‌लाई विदेश पठाएकी थिइन् ।

अल्लाउद्दिन विदेश उडेको केही दिनमै अनिरुद्धले सविरालाई आफ्नो घर बोलाए । उनले स्थानीय लेखनदास बोलाएर ५० हजारको २४ गुणा बढी १२ लाखको कपाली तमसुक कागज लेखाएर सविरालाई सहीछाप गर्न लगाए । तर, आफू अनपढ भएकाले त्यतिबेला कतिको कागजमा सहीछाप गराइएको थियो भन्ने पत्तै नपाएको सविरा बताउँछिन् । छ महिनाभित्रै ३६ प्रतिशतका दरले ब्याजसहित अनिरुद्धलाई हिसाब गरेर ऋण चुक्ता गरिदिएको सविरा बताउँछिन् ।

तर, अनिरुद्धले भने तमसुक कागज फिर्ता गरेनन् । ‘कागज मागेपछि अनिरुद्धले ११ लाख रुपैयाँ अझै तिर्नुपर्ने भनेपछि मेरो सातो उड्यो । लिँदै नलिएको रुपैयाँ म कहाँबाट तिर्नु ? पटकपटक कागज माग्न जाँदा उनले कागज फिर्ता गर्न मैले उनीसँग सुत्नुपर्ने, गलत सम्बन्ध राख्नुपर्ने, नभए अरु नै कुनै केटीलाई मिलाइदिनुपर्ने सर्त राखे,’ उनले भनिन्, ‘मैले गाली गर्दै घर फर्कें । अनि सबै कुरा मैले श्रीमान्‌लाई बताएपछि गाउँ समाजलाई बताउन उहाँले भन्नुभयो ।’

तर, इज्जतको कुरा भएकाले बाहिर बोल्न नसकेको पीडा उनले पोखिन् । अनिरुद्धले राखेकाे प्रस्ताव अस्वीकार गरिदिएपछि उनले महोत्तरी जिल्ला अदालतमा एक वर्षपछि १२ लाख सावाँसहित ब्याज असुलउपर गरदिन भन्दै सविरामाथि मुद्दा दायर गरे । सविरा दुई वर्षदेखि अदालतमा तारेख धाउँदै छिन् । बनाएको घरबाहेक अन्य कतै जग्गा नभएकी उनी मिटरब्याजी अनिरुद्धको हर्कतले बिचल्लीमा परेकी छन् ।

अदालतले फैसला गरेर धेरै रुपैयाँ तिर्न आदेश दिए घरजग्गा सबै लिलाम हुने भन्दै सविराले समाजका मानिस भेला गरी अरु साहु महाजनबाट ऋण लिएर १३ लाख रुपैयाँ तिरिदिन तयार भइन् । तर, अनिरुद्धले १८ लाख नतिरे घडेरी आफ्नो नाउँमा पास गराइहाल्ने धम्की दिइरहेको उनले पीडा पोखिन् ।

तर, थोरै रकम ऋण लगानी गरेर २४ गुणा बढीको कागज बनाएको आरोप लागेका अनिरुद्धले तमसुक कागजैसमेत किनबेच गर्ने गरेको ऋणीहरू बताउँछन् । छ वर्षअघि वैदेशिक रोजगारीका लागि साउदी उड्न सोही वडा बस्ने २५ वर्षीय मनोज सदासँग पैसा थिएन । सोही नगरपालिकाको सिंगियाही टोल बस्ने एजेन्ट सन्त यादवले १ लाख ५ हजार रुपैयाँमा उनलाई विदेश उडाउन तयार भएका थिए ।

मनोजले एजेन्ट सन्तलाई साहुबाट चर्को ब्याजदरमा ऋण काढेर तत्काल ७५ हजार रुपैयाँ मात्र तिर्न सके । उनका अनुसार विदेश उड्नुभन्दा ३ दिनअघि एजेन्ट सन्तले ५ चैत २०७१ को मितिमा ३० हजारको तीन गुणा बढी ९० हजारको कपाली तमसुक कागजमा सहीछाप गराए । तर, विदेशमा राम्रो काम नचलेको भन्दै मनोजले बाँकी रकम तिर्न सकेनन् । एक वर्षपछि मिटरब्याजी अनिरुद्ध साह मनोजको घर पुगेर विदेश उड्नुअघि बाँकी रहेको एजेन्टको ९० हजार रुपैयाँ तुरन्त तिर्न ताकेता गरे ।

३० हजार रुपैयाँ लिएको तर ९० हजार रुपैयाँ तिर्न भनेपछि मनोजकी आमा तेतरी देवी चकित भइन् । ‘३० हजार मात्र बाँकी थियो । ३० हजारको ३ रुपैयाँ ब्याज दरले लिनुस् तर ९० हजार कसरी भयो ?' भन्दै उनले प्रश्न गरेपछि अनिरुद्धले ‘एजेन्टसँग मैले तमसुक कागज किनिसकेँ, चुपचाप ९० हजार रुपैयाँ दे, मसँग धेरै कुरा गर्ने होइन । मसँग कागज छ, धेरै बोलिस् भने मुद्दा दिन्छु, अनि तेराे घरघडेरी सबै लिलाम हुन्छ’ भन्ने जवाफ फर्काए ।

तर, त्यति रुपैयाँ तिर्न नक्ने तेतरीले बताएपछि २०७२ सालमा अनिरुद्धले महोत्तरी जिल्ला अदालतमा एजेन्ट सन्तबाट मुद्दा दर्ता गर्न लगाए । आदालतले २० मंसिर २०७३ मा सावाँब्याजसहित मनोजको सम्पत्तिबाट असुल गर्न आदेश दियो । अहिले अदालतले तत्काल घरमा बस्न भनेको तर घरजग्गा लिलाम भए कहाँ बस्ने भन्ने चिन्तामा तेतरी परिवार पिरोलिएका छन् ।

मिटरब्याजी अनिरुद्धबाटै पीडित भएका दर्जनौँ ऋणीमध्ये भंगहा नगरपालिका– ५ बस्ने ३८ वर्षकी श्यामपरी कुमारीसमेत हुन् । छोरीको उपचारका लागि २ वर्षअघि सोही नगरपालिका–३ बस्ने २८ वर्षीय रामलोचन साहबाट उनले १ लाख ५० हजार रुपैयाँ ऋण लिइन् ।

तर, लेखपढ गर्न नजान्दा अर्का मिटरब्याजी रामलोचनले नौ गुणा बढीको कपाली तमसुक कागज बनाएको श्यामपरी बताउँछिन् । १ फागुन २०७३ को मितिमा रामलोचनले उनीसित १२ लाख रुपैयाँ लिएको सहीछाप गराएका छन् । रामलोचनलाई ब्याजसहित सबै ऋण चुक्ता गरिदिएको श्यामपरीको दाबी छ । तर, कागज आजभोलि दिन्छु भन्दाभन्दै मिटरब्याजी अनिरुद्धलाई बेचिदिएको उनले बताइन् ।

सो तमसुक लिएर अनिरुद्धले जिल्ला अदालतमा २५ मंसिर २०७६ मा लिएको १२ लाखको सावाँब्याज ३ लाख ३८ हजारसहित १५ लाख ३८ हजार रुपैयाँ असुलउपर गरिपाऊँ भन्दै श्यामपरीमाथि मुद्दा दायर गरेका छन् । २० पुस २०७६ मा जिल्ला अदालतबाट पत्र आएपछि श्यामपरीको चैन उडेको छ । अनिरुद्धले सो तमसुक रामलोचनबाट किनेको र सोहीअनुसारको ऋण र ब्याजचुक्ता गर्न दबाब दिइरहेको उनले पीडा सुनाइन् । ‘रामलोचन दिनहुँ घरमा आएर सबै पैसा तिर्न धम्क्याउँदै छ । भन्छन्, कसैले बचाउँदैन । पैसा चुक्ता गरिनस् भने तिम्रो सबै सम्पत्ति लिलाम गराइदिन्छु,’ श्यामपरीले दुखेसो पोखिन् ।

श्रीमान् वैदेशिक रोजगारीमा रहेकाले अहिले उनी समाजका स्थानीय नेता तथा अगुवालाई जसरी पनि न्याय दिलाइदिन गुहार माग्दै छिन् । पीडित ऋणीहरूका अनुसार अनिरुद्धले उनीहरूजस्ता कैयौँको कपाली तमसुक कागज अन्य साहुबाट सस्तोमा किनेर मुद्दा लड्ने र ऋणीको सम्पत्ति जफत गरी उठिबास गराउने गरेका छन् ।

अनिरुद्धसित यसबारे बुझ्न खोज्दा उनी सम्पर्कमा आउन मानेनन् । उनले कीर्ते तमसुक कागज बनाउने र उठिबास गराउने उद्देश्यले गैरकानुनी ढंगले ब्याजसहित ऋण असुली गरिरहेको भन्दै गएको साता जिल्ला प्रहरी कार्यालय महोत्तरीमा झण्डै एक दर्जन पीडितहरू उजुरी दिन पुगेका थिए ।

तर, रीतपूर्वक उजुरी नलेखिएकाले सबै विवरण खुलाएर उजुरी लेखेर दिन भनी पीडितलाई घर फर्काएको जिल्ला प्रहरी कार्यालय महोत्तरीका प्रवक्ता डीएसपी प्रकाश विष्टले बताए । ‘अनिरुद्धबाट पीडित भनिएकाहरू समूहमै उजुरी दिन आउनुभएको थियो । तर, कसले कहिले पैसा लिए, कहिले फिर्ता दिए भन्नेबारेमा प्रष्ट खुलाएर उजुरी लेखेर आउनुस् भनेका छौँ,’ डीएसपी विष्टले भने ।

प्रकाशित मिति: बुधबार, माघ २१, २०७७ १६:५९