राजनीतिक गतिविधि बढेसँग आर्थिक क्षेत्र चलायमान

A+ A A-

कोरोना भाइरसका कारणले ठप्प रहेको आर्थिक क्षेत्र राजनीतिक गतिविधि बढेसँगै चलायमान बनेको छ । कोरोनाका कारणले बन्द रहेका होटेल, यातायात, व्यापार व्यवसायलगायतका क्षेत्र पछिल्लो सयम देशमा राजनीतिक अस्थिरता बढेसँगै चलायमान भएको हो ।

कामचलाउ प्रधानमन्त्री केपी शर्मा ओलीले ५ पुषमा संसद विघटन गरेपछि त्यसको पक्ष र विपक्षमा हुने कार्यक्रमका कारणले कर्णालीको अर्थतन्त्र चलायमान भएको छ ।

विगत लामो समयदेखि प्रायः सुनसानजस्तै बनेका होटेल व्यवसाय अहिले देशमा राजनीतिक गतिविधि बढेका कारण चलायमान भएको सुर्खेत वीरेन्द्रनर–६ मा रहेको होटेल रारा भिजिटका संचालक लक्ष्मीप्रसाद भट्टराईले बताए ।

‘दैनिक जसो पक्ष र विपक्षका कार्यक्रम हुने गरेका छन्,’ उनले भने, ‘त्यो कारणले पुरानै लयमा होटेल व्यवसाय नर्फिए पनि केही चलायमान हुन पुगेको छ ।’

होटेल व्यवसाय मात्रै नभएर यातायात व्यवसायी पनि विगतको भन्दा अहिले लयमा फर्किन थालेको कालीकोटका यातायात व्यवसायी धनबहादुर बटालाले बताए । ‘कोरोनाकालमा यातायात व्यवसाय ठप्प भएको थियो । यात्रुहरू सवारी साधन चढ्न नै मान्दैनथे,’ उनले भने, ‘पुषयता यातायात सवारी साधनमा यात्रुको भीड लाग्न थालेको छ ।’

ओलीले चालेको कदमको पक्ष र विपक्षमा हुने कार्यक्रममा प्रयोग हुने झण्डा, व्यानरका कारण कपडाको व्यापारमा केही वृद्धि भएको व्यापारीले बताउने गरेको छन् ।

हवाई मार्गबाट यात्रु गर्ने यात्रुको संख्या पनि वृद्धि भएको हवाई यातायातमा संग्लन व्यवसायीको भनाइ छ । काठमाडौंलगायतका देशका विभिन्न ठाउँमा हुने कार्यक्रममा नेता तथा कार्यकर्ता आउजाउ गर्ने भएकाले हवाई सेवाको व्यापारमा वृद्धि भएको हो ।

नेपालगञ्जबाट काठमाडौं जानका लागि विगतका दिनमा तीन हजार दुई सयदेखि १० हजारसम्म हवाई टिकट पाइने गरेको भए पनि अहिले चार हजारदेखि माथिको मात्र हवाई टिकट पाइने गरेको जुम्ला सिंजाका प्रेमबहादुर बस्नेतले बताए ।

‘हवाई टिकटको मूल्यमा वृद्धि हुनुका कारणले नेता तथा कार्यकर्ताको राजधानी र देशका अन्य भागमा आउजाउको कारण पनि एक हो,’ उनले भने, ‘यो अस्थिर राजनीतिले अर्थतन्त्रमा चलायमान बनाएको छ ।’

आर्थिक गतिविधि बढेसँगै बजार महँगी भने आकासिएको त्यसको नियन्त्रणमा कसैले चासो नदिएको सुर्खेत सिम्ता गाउँपालिका–७ का नरप्रसाद सापकोटाले बताए । ‘देशमा राजनीतिक अस्थितरता भएका बेला बजारमा सबै सामानको मूल्य आकासिएको छ,’ उनले भने, ‘अस्थिर राजनीतिमा नियन्त्रण गर्ने निकाय पनि कमजोर हुने गरेका छन् ।’

प्रकाशित मिति: शनिबार, माघ १०, २०७७ १५:०१