ट्रम्पविरुद्धको महाभियोग सुनुवाइ पछि सार्न रिपब्लिकनको आग्रह

A+ A A-

अमेरिकी माथिल्लो सदन सिनेटमा रिपब्लिकन पार्टीका नेता मिच म्याक्कोनेलले पूर्वराष्ट्रपति डोनाल्ड ट्रम्पविरुद्धको महाभियोग प्रस्तावमाथिको छलफल आगामी फेब्रुअरीको मध्यसम्म स्थगन गर्न आग्रह गरेका छन् ।

महाभियोगको प्रतिरक्षाका लागि आवश्यक गृहकार्य गर्न ट्रम्पका वकिलहरूलाई समय दिन म्याक्कोनेलले उक्त आग्रह गरेका हुन् । रिपब्लिकन पार्टीका सिनेटरसँगको कन्फरेन्स कलमा छलफल गर्दै म्याक्कोनेलले अघिल्लो पटकको महाभियोगकै हाराहारीमा ट्रम्पलाई समय चाहिने बताएका थिए ।

कन्फरेन्स कलमा सहभागी सिनेट सदस्य माइक ब्राउनले ट्रम्पविरुद्धको महाभियोग सुनुवाइका लागि आगामी १० वा ११ फेब्रुअरीमा गर्न सकिने सुझाव राखेका थिए । म्याक्कोनेलले फेब्रुअरीको मध्यसम्म महाभियोगमाथिको सुनुवाइ ढिलाइ गर्नेबारेमा डेमोक्रेट पार्टीबाट कुनै जानकारी प्राप्त नभएको बताए । उनले भने, 'अहिल्यै केही भएको छैन, तर हामी डेमोक्रेटसँग वार्ता अगाडि बढाउन खोजिरहेका छौँ ।'

यसै महिनाको सुरुमा म्याक्कोनेलले रिपब्लिकन सिनेट सदस्यलाई सिनेटमा महाभियोगसम्बन्धी नियमबमोजिम तल्लो सदनमा महाभियोगसम्बन्धी व्यवस्थापकले सिनेटलाई जानकारी गराएपछि लगत्तै सिनेटमा छलफल हुने प्रचलन रहेको बताए ।

संसदकी सभामुख नान्सी पेलोसीले बिहीबार पत्रकार सम्मेलन गर्दै सिनेटमा सहमति जुट्नासाथ महाभियोगमाथिको सुनुवाइ प्रारम्भ हुने र त्यसका लागि तल्लो सदन तयार रहेको जानकारी दिइन् ।

डेमोक्रेट पार्टीको बहुमत रहेको तल्लो सदनले गत १३ जनवरीमा ट्रम्पविरुद्ध महाभियोग लगाउनेसम्बन्धी एक प्रस्तावलाई २३२-१९७ मतान्तरले पारित गरिसकेको छ । ट्रम्पविरुद्ध अमेरिकी इतिहासमै एकै कार्यकालमा दुई पटक महाभियोग लगाइएको थियो ।

गत ६ जनवरीमा तत्कालीन राष्ट्रपति ट्रम्पले ह्वाइट हाउसको प्रांगणमा आफ्ना समर्थकलाई उत्तेजक भाषण दिएलगत्तै ट्रम्पका उग्र समर्थकले संसद भवनमा आक्रमण गरेका थिए । उक्त घटनामा एक प्रहरी अधिकृत सहित पाँच जनाको मृत्यु भएको थियो ।

अमेरिकी राजनीतिक इतिहासमा कालो दिनका रूपमा लिइएको उक्त घटनालाई डेमोक्रेट र कतिपय रिपब्लिकन सांसदले ट्रम्पको 'सत्ता विद्रोह' का रूपमा लिइएको थियो ।

प्रकाशित मिति: शुक्रबार, माघ ९, २०७७ १५:३७