प्रदेश १ मा शेरधनको पद जोगाउन ज्ञानेन्द्रमार्फत राष्ट्रपतिकाे लविङ

A+ A A-

प्रदेश १ का मुख्यमन्त्री शेरधन राईको पद जोगाउन राष्ट्रपति विद्यादेवी भण्डारी सक्रिय भएकी छिन् ।

राष्ट्रपति भण्डारीले राईलाई नै मुख्यमन्त्रीमा निरन्तरता दिन कांग्रेस शेरबहादुर देउवानिटक केन्द्रीय सदस्य ज्ञानेन्द्रबहादुर कार्कीमार्फत संवाद अघि बढाएकी हुन् ।

कांग्रेस सभापति शेरबहादुर देउवा पनि राईको पक्षमा देखिएका छन् । बूढानीलकण्ठमा शुक्रबार बिहान बोलाएको पार्टीका शीर्ष नेताहरुको बैठकमा पनि सभापति देउवाले प्रदेश १ मा नेकपाको केपी ओलीसमूहलाई सघाएर बागमती प्रदेशको मुख्यमन्त्री लिने प्रस्ताव राखेका थिए ।

तर, वरिष्ठ नेता रामचन्द्र पौैडेलसहितका नेताहरुले भने देउवाको प्रस्तावमा सहमति जनाएनन् । उनीहरुले ओली समूहसँग नभई नेकपाको प्रचण्ड-नेपाल समूहसँग मिलेर जानु उपयुक्त हुनुपर्नेमा जोड दिएका थिए ।

प्रदेश १ बाट प्रतिनिधित्व गर्ने कांग्रेस केन्द्रीय सदस्य डा. मिनेन्द्र रिजाल, शेखर कोइराला, गुरुराज घिमिरे, विश्वप्रकाश शर्मालगायतका नेता ओली समूहका मुख्यमन्त्री राईलाई साथ दिन नहुने अडानमा छन् राईको पक्षमा कार्कीमात्रै देखिएका छन् ।

दुई दिनअघि सभापति देउवासँगको छलफलमा ती नेताहरुले सडकमा ओलीविरुद्ध निस्कने अनि सत्तामा ओली समूहकै साथ लाग्न नहुने मत राखेका थिए । त्यस क्रममा कार्कीको मत खुलेको थिएन । अर्थात् मौन रुपमै कार्की राईको निरन्तरताको चाहनामा थिए ।

राष्ट्रपति भण्डारीकै साथले राई मुख्यमन्त्री बन्न सफल भएका थिए । तत्कालीन नेकपा एमालेका सचिव भीम आचार्यलाई झिनो मतले संसदीय दलमा पराजित गरेर राई मुख्यमन्त्री भएका थिए ।

प्रदेश १ मा राष्ट्रपति भण्डारीको नातेदारी सम्बन्धले कार्कीले राईलाई मुख्यमन्त्रीका लागि सहयोग गर्न कांग्रेसभित्र गोप्य छलफल र सहमति जुटाउन प्रयास गरिरहेका छन् । कार्कीले आफूनिकटलाई राष्ट्रपति भण्डारीले मुख्यमन्त्री राईको पद जोगाइदिन आग्रह आएको बताउने गरेका छन् ।

तर, खुलेर उनी भनिहाल्न भने सकेका छैनन् । त्यसैले सभापति देउवासँगको सामूहिक छलफलमा पनि कार्कीले प्रष्ट धारणा राखेका छैनन् । शिलापत्रसँगको संवादमा कार्कीले राजनीतिमा जस्तोसुकै निर्णय हुने बताएपनि राईका विषयमा थप व्याख्या गरेनन् ।

कांग्रेसले राजनीति अनुकूल हेरेर सहयोग गर्ने निर्णय लिने नेता कार्कीले बताउँछन् । ‘बाहिर के हल्ला छ थाहा छैन । तर, कांग्रेसमा व्यक्तिले बोलेको भरमा कुनै समूहलाई सहयोग हुँदैन।’ कांग्रेसले अहिले राजनीतिक समस्या मूल्याकंन गरिरहेको र कसलाई सहयोग गर्न भन्ने अन्मित निष्कर्षमा पुगिनसकेको उनको भनाइ छ ।

राष्ट्रपति भण्डारी र नेता कार्कीबीच पारिवारिक सम्बन्ध छ भने राईसँग राष्ट्रपतिकाे कार्यकर्ता तहकाे सम्बन्ध छ । राष्ट्रपति भण्डारी र कार्कीले भाइटीका समेत लगाउने गर्छन् ।

पारिवारिक सम्बन्धकै कारण राष्ट्रपति भण्डारीले कार्कीको राजनीतिक जीवनमा सहयोग पनि गर्छिन् । गत निर्वाचनमा पनि सुनसरीमा उम्मेदवार भएका कार्कीलाई भण्डारीको खुबै साथ रहेको चर्चा पनि थियो । पछिल्ला दिनमा सुनसरीमा राजनीति गर्न झरेका कार्कीको प्रतिस्पर्धा प्रचण्ड-माधव समूहका नेता भीम आचार्यसँगै हो ।

जिल्लाबासीको हैसियतमा प्रतिस्पर्धी नेतालाई मुख्यमन्त्री हुनबाट रोक्नलाई पनि कार्की लाग्नु अस्वभाविक नभएको नेकपाका नेता दाबी गर्छन् । भोजपुरका राईलाई भण्डारीले ०५६ सालपछि नै साथ लिँदै आएकी थिइन् । आफ्नो समूहमा राखेर भण्डारीले राजनीतिक जीवनमा राई सहयोग गर्ने क्रममै ०७२ मा सूचना तथा सञ्चारमन्त्री भएका थिए ।

राष्ट्रपति भण्डारीको आशिर्वादले राजनीतिमा खुबै फाइदा पाइरहेका राईको मुख्यमन्त्री पद जोगाउन जसरी राष्ट्रपतिले कांग्रेस नेता ज्ञानेन्द्रमार्फत लविङ बढाएकी छिन्, कांग्रेसभित्रको अन्तरविरोधकै कारण सहज भने देखिँदैन ।

प्रदेश १ मा ओली समूहबाहेक नेकपासहित अन्य सबै प्रदेशसभामा प्रतिनिधित्व गरेका राजनीति दल एकातिर उभिने पक्का भएको प्रचण्ड-माधव समूहका नेताहरुको दाबी छ । प्रदेश १ मा ओली समूहका केही नेता अन्तिम समयमा आएर प्रचण्ड–माधव समूहकै मुख्यमन्त्रीलाई सहयोग गर्न प्रचण्ड-माधव समूहका नेताहरुको दाबी छ ।

दुवै समूह अविश्वासको प्रस्तावमा केन्द्रीत

प्रदेश १ मा कुल ९३ जना प्रदेशसभा सांसद छन् । तीमध्ये नेकपाका ६७ जना सांसद छन् । प्रचण्ड–नेपाल समूहका आचार्य पक्षले मंगलबार गरेको भेलामा ३३ जना सासंद भेला भएका थिए ।

प्रदेश सासंद सचिवालयमा प्रचण्ड-माधव समूहका ३७ जना सासंदले मुख्यमन्त्रीविरुद्ध अविश्वासको प्रस्तावमा हस्ताक्षर गरेर दर्ता गराएका छन् । हस्ताक्षर लगत्तै प्रचण्ड–माधव समूहका भीम आचार्यले महिना दिनअघि गरेको भेलामा ४२ सांसदको उपस्थिति थियो ।

नेकपाको कुल ६७ सांसदका दुवै समूहमा बहुमतका लागि आवश्यक पर्ने पर्ने ४७ सांसद अहिलेसम्म पुगेको छैन । नेकपाका दुवै समूहले सरकार बनाउन २१ जना संसद रहेको कांग्रेसको साथ लिनुपर्ने हुन्छ ।

प्रकाशित मिति: शुक्रबार, माघ ९, २०७७ १६:०५