थ्री स्टारसँगकाे झगडाले जन्मिएकाे मनाङ मर्स्याङ्दी क्लब

A+ A A-

हरेक फुटबल खेलाडीले सपना बुनेका हुन्छन्– मनाङ मर्स्याङ्दी क्लबबाट फुटबल खेल्ने । त्यसो हुनुको कारण नेपाली खेलकुदमा मनाङ मर्स्याङ्दीकाे साख हाे, घरेलु प्रतियोगिताहरूमा एकलौटी दबदबा हाे ।

नेपाली फुटबल इतिहासमा उसले पुर्‍याएको योगदान पनि कम छैन । जहिलेबाट मनाङ मर्स्याङ्दी क्लब स्थापना भयो, कहिल्यै पछि फर्किनु परेन । युरोपेली फुटबल जगत्‌मा जर्मन टिमको दबदबा जस्तो छ, ठीक त्यही शैली नेपाली फुटबल खेलमा मनाङ मर्स्याङ्दीको छ ।

राष्ट्रिय टोलीमा सहभागी खेलाडी सायदै होलान्, जसले मनाङ मर्स्याङ्दी क्लबबाट नखेलेको होस् । नेपाली फुटबल क्लबहरू अझै व्यावसायिक भइसकेका त छैनन् । तर, जति स्थापित क्लब छन्, तीमध्ये मनाङ मर्स्याङ्दी पहिलो नम्बरमै पर्छ ।

२०३९ सालमा स्थापना भएको मनाङ मर्स्याङ्दी क्लब स्थापनाकै वर्ष ‘डी’ डिभिजन च्याम्पियन बन्न सफल भयो । त्यसपछि लगातार सी, बी हुँदै मनाङले २०४२ सालमा ‘ए’ डिभिजन सहिद स्मारक लिग जित्यो । मनाङ मर्स्याङ्दी २०४२ सालयता मात्रै आठ पटक लिग विजेता बनेको छ ।

माथिल्लो श्रेणीको ए डिभिजन लिग उपाधिमा मनाङले ह्याट्रिक नै गर्‍याे । हालसम्म मनाङको उपाधि संख्या ३० भन्दा बढी पुगिसकेको छ । यति मात्रै होइन, मनाङ मर्स्याङ्दीले २०४४–०५६ र २०६० कोसी, बी र ए डिभिजन लिग च्याम्पियन हुने क्रममा तीन वर्ष एक गोल पनि नखाई उपाधि चुमेको इतिहास रचेको छ ।

ए डिभिजन लिगबाहेक मनाङ मर्स्याङ्दीले महेन्द्र गोल्डकप, बुढासुब्बा गोल्डकप, इटहरी गोल्डकप, झापा गोल्डकपलगायत राजधानी बाहिरका दर्जनौँ प्रतियोगितासँगै भुटान पुगेर किङ्स कपको उपाधिसमेत हात पारिसकेकाे छ ।

नेपाली फुटबलकै अधिकतम सुविधा दिने क्लब भएका कारण पनि मनाङ मर्स्याङ्दीको रिजल्ट राम्रो आउने गरेको टिम कप्तान कलम श्रेष्ठको बुझाइ छ । उनी भन्छन्, ‘मनाङ मर्स्याङ्दी ऐतिहासिक क्लब हो । क्लबको म्यानेजमेन्ट पनि त्यति नै राम्रो छ । खेलाडीलाई कहिलै समस्यामा पारेको छैन । त्यसैले टिम क्याप्टेन जो हुन्छ, उसले उपाधि जित्नैका लागि खेल्छ । क्याप्टेनले त्यहीअनुसार टिम बनाउँछन् ।’

मनाङ मर्स्याङ्दी क्लबबाट खेल्ने हरेक फुटबल खेलाडीको सपना हुने र आफू पनि त्यही सपनाले मनाङ मर्स्याङ्दी क्लबमा पुगेको श्रेष्ठ सुनाउँछन् ।

झगडाले जम्माएको थियो मनाङ मर्स्याङ्दी क्लब

दशरथ रंगशालामा २०३८ सालमा ‘बी’ डिभिजन लिग खेल चलिरहेको थियो । प्रतिस्पर्धामा उत्रिएका थिए– थ्री स्टार क्लब र ठमेल ११ देउराली क्लब ।

ठमेल क्लबबाट मनाङका खेलाडीहरू खेलिरहेका थिए । खेल चलिरहेकै बेला एकाएक दर्शकहरू झगडामा उत्रिए । दर्शकबाट सुरु भएको झगडा त्यत्तिमै सीमित रहेन, मैदानमा खेलिरहेका खेलाडीसम्मै पुग्यो । त्यो बेला ठमेलमाथि थ्री स्टारले एक गोलको अग्रता लिएको थियो । त्यस खेलमा थ्री स्टारलाई जिते ठमेल ११ ए डिभिजन लिगमा उक्लिने अवसर थियो ।

त्यसैले थ्री स्टारले गोल गरेपछि ठमेलका दर्शकले झगडा गर्न थाले । ठमेलका खेलाडीले रेफ्रीलाई नै पिटे । खेल पूरै बिथोलिएपछि अखिल नेपाल फुटबल संघ (एन्फा) ले ठमेलका चार खेलाडीसहित क्लबलाई नै एक वर्षको प्रतिबन्ध लगाउँदै थ्री स्टारलाई विजेता घोषणा गर्‍यो ।

क्लब नै प्रतिबन्ध भएपछि मानाङका खेलाडीले खेल्न नपाउने भए । त्यही झोँकमा मनाङबाट काठमाडौं बसाइँ सरेर व्यवसाय गर्दै आएका उपल्लो मनाङेहरूको अगुवाइमा मर्स्याङ्दी मनाङ फुटबल क्लब दर्ता भयो । पछि मात्र मनाङ मर्स्याङ्दी बनेको हो ।

त्यही झगडाले जन्माएको मनाङ मर्स्याङ्दी क्लब हाल नेपालको नम्बर वान क्लब बन्न सफल भएको छ । नेपाली फुटबलमा एकपछि अर्को गर्दै इतिहास रच्दै आएको छ । राष्ट्रिय फुटबल टिमका पूर्वकप्तान राजु शाक्य पनि मनाङ मर्स्याङ्दी क्लबको क्रेज नेपाली फुटबलमा निक्नै माथि रहेको बताउँछन् ।

राजु भन्छन्, ‘मनाङ मर्स्याङ्दी क्लबको इतिहासबारे मैले भनिराख्नु पर्दैन । त्यो हरेक लिगका खेलमा देखिएकै कुरा हो । राष्ट्रिय खेलाडीहरूको रोजाइले समेत त्यसको पुष्टि गर्छ । खेलाडीलाई राम्रो पारिश्रमिक दिनेदेखि व्यवस्थापनको पाटो समेत मनाङ मर्स्याङ्दीको सबैभन्दा बलियो पक्ष हो ।’

शाक्यका अनुसार मनाङको स्थापना हुँदा अञ्जित बस्नेत कप्तान थिए भने अमृत पन्त प्रशिक्षक । स्थापनाकालदेखि नै मनाङ मर्स्याङ्दी क्लबले खेलाडीका लागि राम्रो खर्च गरेको उनको भनाइ छ ।

मनाङ मर्स्याङ्दी अहिले खेलाडीको शानका निम्ति पनि महत्त्वपूर्ण क्लबको रूपमा स्थापित भएको छ । हाल मनाङ मर्स्याङ्दीको वाषिर्क बजेट एक करोडभन्दा बढी छ । फुटबलका जानकारहरूका अनुसार मनाङ मर्स्याङ्दी क्लबको हितका निम्ति क्लबका सदस्यहरू सधैँ एक हुन्छन् ।

ललितपुरको थ्री स्टार क्लबका खेलाडीसँगको विवादका कारण जन्मिएको मनाङ मर्स्याङ्दी क्लबको अहिलेको मुख्य प्रतिद्वन्द्वी पनि थ्री स्टार क्लब नै हो ।

प्रकाशित मिति: शनिबार, माघ १०, २०७७ ०७:२८