कोरिया बेरोजगारी प्रभाव : नेपालमा १० हजार श्रमिक रोकिए, भाषा परीक्षा पनि अन्योल

कोरिया बेरोजगारी प्रभाव : नेपालमा १० हजार श्रमिक रोकिए, भाषा परीक्षा पनि अन्योल

A+ A A-

रोजगारीका लागि दक्षिण कोरिया जान तयार धेरै नेपाली विभिन्न कारणले गर्दा उड्न पाएका छैनन् । वैदेशिक रोजगार विभागअन्तर्गत ईपीएस कोरिया शाखाका अनुसार कोरोना कोरोना संक्रमणपछि ‘लेबर कन्ट्रयाक्ट’ मा आएका, कोरिया रोस्टरमा नाम दर्ता भएका, सीसीभीआई लिएका र घर बिदामा आएका करिब १० हजार नेपाली कामदार रोजगारीका लागि कोरिया जान रोकिएका हुन् ।

सरकारले वैदेशिक रोजगारीमा जाने कामदारका हकमा गत वर्षको फागुनकाे अन्तिम सातादेखि नै श्रम स्वीकृति जारी गर्न बन्द गरेको थियो । कोरियन भाषा र सीप परीक्षा उत्तीर्ण गरे पनि कोरोना महामारीका कारण कोरिया जान नपाएका करिब १० हजारको रोजगारी अन्योल बनेको छ ।

कोरोना नियन्त्रण गर्न लकडाउन गरेयता कोरिया रोजगारीमा जाने सम्पूर्ण प्रक्रिया पुगेका करिब १० हजार कामदार रोकिएको शाखाले जनाएको छ । अन्तर्राष्ट्रिय उडान सहज हुँदै गएपछि गत भदौदेखि वैदेशिक रोजगारीमा जाने कामदारका हकमा सबै श्रम स्वीकृति सरकारले खुलाएको थियो ।

सन् २०१९ मा उत्तीर्ण भएका व्यक्ति पनि जान पाएनन् । सबै प्रक्रिया पुगेका करिब १० हजार कोरिया रोजगारीमा जान नपाएको वैदेशिक रोजगार विभागअन्तर्गतको ईपीएस कोरिया शाखाका निर्देशक ईन्द्र गौतमले जानकारी दिए ।

नेपालले कोरियासँग भएको श्रम सम्झौताका आधारमा कामदार लैजान प्रस्ताव गरिरहेको शाखाका निर्देशक गौतमले बताए । ‘ईपीएस शाखाले सबै प्रक्रिया पुगेका कामदार पठाउन कोरियाको सम्बन्धित पक्षसँग आग्रह गरिरहेको छ । रोजगारीमा जान प्रक्रिया पुगेका कामदारको नेपालकातर्फबाट टिकट काट्न मात्र बाँकी हो । अरू केही समस्या छैन,’ उनले भने, ‘सरकारले कोरियासँग श्रम सम्झौता नवीकरण गर्दैछ । उक्त श्रम सम्झौता नवीकरण गर्दा कोरोनाका कारण रोकिएका कामदारलाई पुन: काममा पठाउने गरी सहमतिका लागि आग्रह हुन्छ । कोरिया भाषासँगै सीप परीक्षा पास गरेका कामदार पठाउने पहल हुन्छ ।’

कोरिया जाने कामदारका हकमा नेपालले सहजीकरण र प्रक्रियाका लागि सहयोग मात्र गर्न भूमिका हुने उनको भनाइ छ ।

नेपाल र कोरिया सरकारबीच सन् २००७ देखि कोरियन भाषा सञ्चालन गरेका कामदार लिन सम्झौता भएको थियो । सन् २००७ यता कोरियन भाषा उत्तीर्ण गरेर करिब ६७ हजार युवा रोजगारीका लागि दक्षिण कोरिया पुगेको शाखाको तथ्यांक छ । सन् २०२० मा नेपालबाट ९ सय ५८ पुरुष र ६९ महिला गरेर १ हजार २७ जना नेपाली कोरिया गइसकेका छन् ।

कोरियन भाषा र सीप परीक्षा उत्तीर्ण गरेका कामदारले भने कोरिया रोजगारीमा जान पाऊँ भन्दै ईपीएस कोरिया शाखामा दैनिक आन्दोलन गरिरहेका छन् ।

घर बिदामा आएका तथा भिसा अवधि सकिन लागेका कामदारले कोरियाली रोजगारीमा सहजीकरण गरिदिन माग गर्दै आन्दोलन गरे पनि उनीहरूको समस्या समाधान भएको छैन । सबै प्रक्रिया पुगेका कामदारका हकमा नेपालले कोरिया सरकारसँग सहजीकरणका लागि पहल गरिरहेको शाखाका निर्देशक गौतमले जानकारी दिए ।

कोरियाको बेरोजगारी प्रभाव नेपाली श्रम बजारमा

नेपाली कामदारको रोजगारी गन्तव्य मुलुक दक्षिण कोरियाको श्रम बजार कोरोना महामारीका कारण धेरै प्रभावित भएको छ । कोरियामा कोरोना महामारीका समयमा करिब २५ लाखले रोजगारी गुमाएका छन् ।

सन् २०२० काे अन्तिमसम्ममा कोरोनाका कारण रोजगारी गुमाउनेको संख्या २५ लाख नाघेको कोरिया सरकारले बताइरहेको छ । कोरियाको पछिल्लो तथ्याङ्कअनुसार बेराेजगारी दर ०.१ प्रतिशतले वृद्धि भएर हाल ३.१ प्रतिशत पुगेको छ ।

कोरियामा कोरोना भाइरसका कारण बेरोजगारी बढ्दा नेपाली श्रम बजारमा प्रभाव देखा परेको छ । कोरोना महामारी फैलिएसँगै कोरिया सरकारले विदेशी कामदार आपूर्ति गर्न ढिलो गरिरहेकाे छ ।

कोरियामा कोरोना भाइरसका कारण बेरोजगारीदर बढ्दा नेपालीबाट भाषा परीक्षा उत्तीर्ण गरेका १० हजार कामदार रोजगारीमा जानबाट वञ्चित भएका छन् । कोरियामा बेरोजगारी दर बढ्दा त्यहाँ रोजगारीका लागि आउने विदेशी कामदारको कोटा कटौती हुने सम्भावना बढेको छ ।

यो वर्षको परीक्षा पनि अन्योल

कोरिया सरकारले विदेशी कामदार लिन हरेक ईपीएस कोरियन भाषा सञ्चालन गर्दै आएको छ । कोरिया सरकारले विदेशी कामदार आपूर्ति गर्दै आएका देशमा कोरोना भाइरसका कारण सन् २०२० मा कोरियन भाषा परीक्षा सञ्चालन गरेन ।

ईपीएसअन्तर्गत सन् २०२१ का लागि कोरिया सरकारले विदेशी कामदारका लागि ५२ हजार कोटा निर्धारण गरे पनि नेपालमा भाषा परीक्षा सञ्चालन गर्ने नगर्ने निश्चित अहिलेसम्म नभएको शाखाले जनाएकाे छ ।

कोरियाले २०२१ मा नेपालबाट यति नै कामदार लैजाने भनेर कोटा छुटाएको छैन । जसका कारण ईपीएसअन्तर्गत सञ्चालन हुने कोरियन भाषा परीक्षा सञ्चालनका विषयमा अहिलेसम्म टुंगो नलागेको शाखाकाे भनाइ छ ।

विगतमा कोरिया सरकारले जनवरीदेखि फेब्रुअरीसम्ममा ईपीएस भाषा परीक्षा सञ्चालनका लागि पत्राचार गर्ने गरे पनि सन् २०२१ का लागि कोरियन भाषा सञ्चालनका लागि केही जानकारी नआएको शाखाका निर्देशक गौतमले बताए ।

प्रकाशित मिति: बिहीबार, माघ ८, २०७७ ०८:५५