यस्तो पनि सरकारी कार्यालय : २ वर्षमा जम्मा सय सेवाग्राही

A+ A A-

सामान्यतया सरकारी कार्यालयमा दैनिकजसो भीड हुन्छ । कुनै सरकारी कार्यालयमा त भीडभाड भएकै कारण एकै दिनमा गर्न सकिने काममा पनि दुई/तीन दिन धाउनुपर्ने हुन्छ । सरकारी कार्यालयमा हुने सेवा सम्पादन, प्रदान गर्ने कामको चापले स्थानीयले हैरानी मात्र खेप्दैनन्, छिटो काम गर्न बिचौलियासम्म पुग्छन् ।

तर, बुटवलमा एउटा यस्तो सरकारी कार्यालय छ, जहाँ एक वर्षमा ५० जनाले मात्र सेवा लिएका छन्, २ वर्षमा जम्मा १ सय १४ जनाले । रूपन्देहीको बुटवल-११ लालीगुराँस पथमा स्थापना गरिएको कम्पनी रजिष्ट्रारको शाखा कार्यालयमा कर्मचारी दैनिकजसो कार्यालयमा आउँछन् र सेवाग्राही कुर्दैमा दिन बिताउँछन् ।

लालीगुराँस पथमा रहेको कम्पनीको कार्यालयले कुनै पनि प्राइभेट कम्पनी, पब्लिक कम्पनी स्थापना गर्ने, नवीकरण गर्ने, शेयर कारोबार तथा अन्य विषयमा स्वीकृत प्रदान गर्ने, कम्पनीको नामसारी, कार्यक्षेत्र विभाजनलगायतका कार्य गर्ने भनी स्थापना भएको कार्यालय गुमनाम सरकारी कार्यालयजस्तै बनेको छ ।

कार्यालयका निमित्त प्रमुख मोहन अर्यालले साउन २०७५ मा नेपाल सरकार, उद्योग वाणिज्य तथा आपूर्ति मन्त्रालयअन्तर्गत कम्पनी रजिष्टारको कार्यालयको शाखा कार्यालय बुटवलमा स्थापना गरिएको भए पनि हालसम्म पूर्ण अधिकार नपाउँदा काम गर्न नसकिएको बताउँछन् । संघीय कार्यालयले अधिकार प्रत्यायोजन नगरिएको कारण काम गर्न कठिनाइ भएको अर्यालले बताए ।

कम्पनी रजिष्ट्रारको कार्यालयका सहायक सूचना अधिकारी रेखा थापाका अनुसार कार्यालयले हालसम्म नयाँ कम्पनी दर्ता, प्रमणपत्र वितरण र शेयर खरिद बिक्रीको लागि सनाखद गर्ने काम मात्रै गर्दै आएको छ ।

साउन २०७५ मा स्थापना भएको कार्यालयको माघ २०७७ मा २ वर्ष ६ महिना पूरा भएको छ । जसमा हालसम्म १ सय १० वटा कम्पनी दर्ता भएका छन् भने चारवटा दर्ता प्रक्रियामा रहेका छन् । सूचना अधिकारी थापाका अनुसार दर्तापश्चात गर्ने सम्पूर्ण कामा काठमाडौंमा हुने भएका कारण अधिकांश सेवाग्राही काठमाडौंमा जाने गरेका हुन् । बुटवलमा कार्यालय छ भन्ने विषयमा समेत सेवाग्राहीलाई जानकारी नहुनु, भए पनि दर्तापश्चातको काम सबै काठमाडौंबाट हुने भएकाले पनि काठमाडौंमा जानुपर्ने बाध्यता छ ।

सात जनाको दरबन्दी रहेको कार्यालयमा हाल छ जना मात्रै कर्मचारी कार्यरत छन् । जसमा दुई जना प्राशासनिक क्षेत्रभन्दा बाहिरका कर्मचारीहरू हुन् । एक जना कार्यालय प्रमुख उपसचिवस्तरको रजिष्ट्रारको दरबन्दी खाली छ भने शाखा अधिकृत दुई जना, नायब शुब्बा एक जना, कम्प्युटर अपरेटर एक जना गरी कूल पाँच जना कर्मचारी प्रशासनिक क्षेत्रमा छन् ।

भाडामा मात्र मासिक ४५ हजार खर्च

निकै कम मात्रामा सेवाग्राहीलाई सेवा दिएको कम्पनीले कार्यालयकै प्रयोजनका लागि मासिक ४५ हजार भाडा तिर्दै आएको छ । बुटवल-११ कालिका चौकनजिकै लालीगुराँस पथमा दुईवटा फ्ल्याट भाडामा लिएर कार्यालय सञ्चालन गरिएकोमा मासिक ४५ हजार रुपैयाँ भ्याटसहित कार्यालयले भुक्तानी दिँदै आएको कार्यालयले जनाएको छ ।

दुई वर्ष छ महिनामा उक्त कार्यालयले घर भाडा मात्रै हिसाब गर्ने हो भने १३ लाख ३५ हजार रुपैयाँ भुक्तानी गरेको छ । यसको अलवा पानी, बिजुलीको बिल, कर्मचारीको तलबभत्तालगायतमा सरकारको लाखौँ लगानी भएको छ ।

प्रकाशित मिति: बुधबार, माघ ७, २०७७ ०९:२६