पुसमा अहिलेसम्मकै धेरै कर्जा प्रवाह, ८३ अर्ब निक्षेप आउँदा १४३ अर्ब ऋण गयो

A+ A A-

लामो समयदेखि बैंकमा लगानीयोग्य रकम (तरलता) बढ्दै गएकोमा पुसमा भने कर्जाको माग ह्वात्तै बढेको देखिएको छ ।

पुस महिनामा मात्रै १ खर्ब ४३ अर्ब रूपैयाँको कर्जा माग भएको नेपाल बैंकर्स संघको तथ्यांक छ । महिनागत रूपमा यो कर्जा माग अहिलेसम्मकै धेरै देखिएको छ । गत असोजमा पनि अत्यधिक १ खर्ब ३१ अर्ब रूपैयाँको कर्जा माग भएको थियो । त्यसपछिको दुई महिनामा भने कम मात्रै कर्जा प्रवाह भएको थियो ।

चालु आर्थिक वर्षको पहिलो साउनमा अघिल्लो महिनाको तुलनामा २५ अर्ब रूपैयाँले कर्जा घटेर २८ अर्ब ७८ अर्ब रूपैयाँ पुगेको थियो । 'पुस मसान्तसम्म आइपुग्दा कर्जा प्रवाह ३२ खर्ब ४४ अर्ब रूपैयाँ पुगेको छ । अघिल्ला महिनाहरूमा कर्जा प्रवाह कम मात्र देखिएको थियो । तर, पुसमा भने अनपेक्षित वृद्धि भएको देखियो,' बैंकर्श संघका अध्यक्ष तथा सानीमा बैंकका प्रमुख कार्यकारी अधिकृत भुवन दाहालले भने ।

पुसमा कर्जा प्रवाह हुनुको मुख्यत: पुस मसान्तमा गर्नु पर्ने कर चुक्ताको कारण पनि हो । पुसमा व्यवसायीहरूले अनिवार्य रूपमा अघिल्लो आर्थिक वर्षको कर चुक्ता प्रमाणपत्र लिनु पर्ने हुन्छ । यसो हुँदा बैंकबाट ऋण बढी निकालिएको हुन सक्ने बैंकर्सहरूको अनुमान छ । बढी ऋण जानुले लगानी विस्तार बढेको पनि देखिन्छ ।

चालु आर्थिक वर्षको ६ महिनाको अविधमा गएको जम्मा ऋणको करिब आधा हिस्सा पुस महिनामा मात्रै गएको छ । चालु आर्थिक वर्षको मंसिरसम्म १ खर्ब ९८ अर्ब रूपैयाँको कर्जा प्रवाह भएको थियो ।

पुसमा थप १ खर्ब ४३ अर्ब रूपैयाँले बढेपछि चालु आर्थिक वर्षको कर्जा प्रवाह ३ खर्ब ४१ अर्ब रूपैयाँ रहेको छ । यो गत आर्थिक वर्षको सोही अवधिको तुलनामा १ खर्ब ८ अर्ब रूपैयाँ बढी हो । गत आर्थिक वर्षको ६ महिनाको अवधिमा २ खर्ब ३३ अर्ब रूपैयाँको कर्जा प्रवाह भएको थियो ।

चालु वर्षको कर्जा प्रवाहको स्थिति महिनागत
महिना	रकम अर्बमा
साउन	-२५
भदौ	२६
असोज	१३१
कात्तिक	१७
मंसिर	४९
पुस	१४३

पुस महिनामा कर्जा प्रवाहमात्रै नभएर निक्षेप पनि बढेको देखिएको छ । तर, कर्जा प्रवाहको तुलनामा निक्षेप भने न्यून देखिएको छ ।

पुस महिनामा ८८ अर्ब रूपैयाँको निक्षेप बैंकमा थपिएको छ । चालु आर्थिक वर्षको साउन र कात्तिक महिनामा अघिल्लो महिनाको तुलनामा निक्षेप घटेको थियो । ६ महिनाको अवधिमा २ खर्ब ९५ अर्ब रूपैयाँ निक्षेप थपिएको छ । गत वर्ष यही अवधिमा १ खर्ब ८२ अर्ब रूपैयाँ निक्षेप थपिएको थियो ।

महिनागत रूपमा बैंकमा जम्मा भएको निक्षेप
महिना	रकम अर्बमा
साउन	-८
भदौ	१६
असोज	१५९
कात्तिक	-६
मंसिर	४५
पुस	८८