रक्सीको मातमा बालिकालाई बलात्कार गरेको अभियुक्तको बयान

A+ A A-

रूपन्देही तिलोत्तमा १५ कोटिहवा ववनीकी ५ वर्षीया बालिकालाई बलात्कार गर्ने होमबहादुर विकले रक्सीको मातमा बलात्कार गरेको स्वीकार गरेका छन् ।

गत १ माघको साँझ ५ बजे घर छेउको पसलमा चीजबल, साबुन र सरफ किन्न गएकी त्यी बालिकालाई विकले ५ सय मिटर पर लगेर बलात्कार गरेको प्रहरीसामू बयान दिए ।

बाँसको फेदमुनी बालिकालाई बलात्कार गरेको र गोठमा पुगेर लुकेको उनले बताएका छन् । कपिलवस्तुको बाणगँगा नगरपालिका- १२ घर भएका अभियुक्त विक ३ वर्षदेखि ठेकेदार हीरालाल मल्लको घरमा बस्दै आएका थिए ।

मल्लले विकलाई दिउँसोमा निर्माणको काममा लगाउने र साँझ गोठको काम लगाउँदै आएका थिए । बालिकालाई बलात्कार गरेपछि गोठमा आएर बसेका विकलाई गोठबाटै प्रहरीले पक्राउ गरेको थियो । प्रहरीले ठेकेदार मल्ललाई समेत पक्राउ गरेको छ ।

१ माघ साँझ ५ बजे घरबाट पसल जान निस्किएकी बालिका बेलुकी करिब पौने ८ बजेसम्म घर नफर्केपछि परिवारका सदस्यले बालिकाको खोजी सुरु गरेका थिए । बालिकालाई विकले पिछा गरेको छिमेकी बालिकाले देखेपछि शंका लागेर खोज्दा बालिका झाडीमा भेटिएकी थिइन् ।

आरोपी विकले बालिकालाई यही ठाउँमा बलात्कार गरेको प्रहरीसामू स्वीकार गरेका छन् ।

अचेत अवस्थामा फेला परेकी बालिकाको भैरहवा मेडिकल कलेजमा उपचारका लागि लगेकोमा अस्पतालले उनलाई बुटवलको लुम्बिनी प्रादेशिक अस्पतालमा रिफर गरेको थियो । त्यहाँ पनि उपचार हुन नसकेपछि बालिकालाई थप उपचारका लागि काठमाडौं रिफर गरेको थियो ।

जिल्ला प्रहरी कार्यालय रूपन्देहीका प्रहरी प्रमुख उपरीक्षक प्रवीण पोखरेलले बालिका हराएको सूचना आएलगत्तै खोजी गर्दै जाँदा बालिकालाई खोल्सामा अचेत अवस्थामा फेला पारेको बताए ।

बालिकाको अहिले शिक्षण अस्पताल काठमाडौंमा गम्भीर अवस्थामा उपचार भइरहेको प्रहरी उपरीक्षक पोखरेलले बताए । बालिकाको गुप्ताङ्ग, अनुहार तथा शरीरका विभिन्न अंग क्षतविक्षत भएको छ । काठमाडौंमा उपचार भइरहेकी बालिकाको होस आएको र स्वास्थ्यमा क्रमशः सुधार हुँदै गएको बताइएको छ ।

स्थानीयले विकलाई घरमा नराख्न भनेका थिए

रक्सी खाएर मात्तिने, हो-हल्ला गर्ने र सँगै काम गर्नेसँग झगडा गर्ने गरेका कारण स्थानीयले पटकपटक विकलाई घरमा नराख्न ठेकेदार मल्लसँग आग्रह गरेका थिए । श्रीमतीलाई छाडेर कामको सिलसिलामा त्यहाँ आएका विक आफ्ना ५ वर्षीय छोरासँग सँगै बस्दै आएका थिए ।

स्थानीय सुकुमाया विकले छिमेकासँग झगडा गर्ने गरेकाले विकलाई त्यहाँ नराख्न मल्ललाई भनेको बताइन् । बलात्कारको आरोपमा पक्राउ परेपछि विकका ५ वर्षीय छोरालाई एक आश्रमको जिम्मा लगाइएको छ ।

प्रकाशित मिति: मंगलबार, माघ ६, २०७७ १६:०३