कर्णालीका गाउँमा चुनावकै झल्को दिनेगरी बढ्याे राजनीतिक गतिविधि

A+ A A-

कर्णाली प्रदेशका गाउँहरुमा राजनीतिक दलले आफ्ना गतिविधि बढाएका छन् । प्रदेश र संघीय सांसदको निर्वाचनपछि राजनीतिक रूपमा सुनसान कर्णाली प्रदेशका गाउँमा प्रतिनिधिसभा विघटनपछि भने दलहरुले राजनीतिक सक्रियता बढाएका हुन् ।

प्रदेश र संघीय सांसदको चुनावपछि गाउँ नगएका दलहरु अहिले वडा–वडासम्म पुगेका छन् । प्रधानमन्त्री केपी ओलीले संसद विघटन गरेपछि उक्त कदमको पक्ष र विपक्षमा रहेका दलहरु गाउँगाउँसम्म पुगेका छन् ।

संसद विघटनपछि गाउँमा राजनीतिक चहलपहल बढेको हुम्लास्थित खार्पुनाथ गाउँपालिका–१ का नरबहादुर शाहीले बताए ।

‘कोही आएर प्रधानमन्त्रीले गरेको संसद विघटन सही भएको भन्छन् । कोही नेता संसद विघटनको कदम असंवैधानिक भन्दै गाउँमा आउने गरेका छन्,’ शाही भन्छन्, ‘संसद विघटनपछि गाउँमा राजनीतिक दलहरूको सक्रियता बढेको छ ।’

अहिले कर्णाली प्रदेशका जिल्लाहरुमा नेकपा ओली समूह, नेकपा प्रचण्ड–नेपाल समूह, नेपाली कांग्रेस, समाजवादी जनता पार्टी, मजदुर किसान पार्टी, राष्ट्रिय जनमोर्चालगायतका राजनीतिक दलहरूले दैनिकजसो कार्यक्रम गरिरहेका छन् ।

नेकपा ओली समूहका केन्द्रीय सदस्य नगेन्द्र शाही (नेशनल) ले ओलीलाई काम गर्न नदिइएकाले संसद विघटन गर्नुपरेको बताए । नयाँ जनमतका लागि आगामी वैशाखको चुनावमा जानुको विकल्प नभएकाले कर्णाली प्रदेशमा आफूहरुले चुनावी कार्यक्रम गरिरहेको उनको भनाइ छ ।

‘प्रधानमन्त्रीलाई पार्टीका नेताले नै अवरोध गरे,’ उनले भने, ‘नयाँ जनादेशका लागि गाउँगाउँमा अहिले चुनावी सभा गरिरहेका छौं ।’

उता संसद विघटन गर्ने ओलीको कदम असंवैधानिक रहेको भन्दै नेकपाकै प्रचण्ड–नेपाल समूहले पनि राजनीतिक गतिविधि गरिरहेको छ ।

नेकपा प्रचण्ड–नेपाल समूहका कर्णाली प्रदेश सचिव मायाप्रसाद शर्मा प्रधानमन्त्रीले संविधानविपरीत संसद विघटन गरेको बताउँछन् । सोही कारण कर्णालीका सबै जिल्लामा विरोध सभा, कार्यकर्ता प्रशिक्षणलगायतका कार्यक्रम गरिरहेको उनको भनाइ छ ।

‘प्रधानमन्त्री ओलीले चालेको असंवैधानिक कदमविरुद्ध हामीले गाउँगाउँमा विरोधसभा गरिरहेका छौं,’ उनले भने, ‘प्रधानमन्त्री निरंकुश बन्दै गएको अवस्थामा हामीले यसको भ्रमबाट जनतालाई जानकारी दिन यी कार्यक्रम गर्दै आएका छौं ।’

त्यस्तै नेपाली कांग्रेसले संसद पुनस्र्थापनाको मुद्दा लिएर गाउँगाउँमा सभा, सम्मेलन र विरोधसभाका कार्यक्रम गर्न थालेको कांग्रेस कर्णाली प्रदेश संसदीय दलका नेता जीवनबहादुर शाहीले बताए ।

‘अहिलेको यही अवस्थामा चुनाव पनि हुँदैन,’ उनले भने, ‘प्रधानमन्त्रीको असंवैधानिक कदमविरुद्ध देशभर आन्दोलनको आँधीबेहरी ल्याउने कांग्रेसको अभियान छ ।’

प्रकाशित मिति: बुधबार, माघ ७, २०७७ १४:४०