फुत्किए प्रकाण्ड, फन्दामा धर्मेन्द्र

A+ A A-

नेत्रविक्रम चन्द ‘विप्लव’ नेतृत्वको समूहका उच्च तहका नेता धर्मेन्द्र बाँस्तोला पक्राउ परेका छन् । उनलाई प्रहरीले मकवानपुर सीमामा पर्ने ललितपुरको बागमती गाउँपालिका गिम्दीबाट बुधबार पक्राउ गरेको हो । उनी विप्लव समूहका पश्चिम कमाण्डर हुन् ।

उनीसँगै खड्गबहादुर विश्वकर्मा (प्रकाण्ड) का सहयोगी विवेक कुमाल पनि पक्राउ परेको उच्च प्रहरी स्रोतले बताए । प्रहरी स्रोतका अनुसार उनीहरूको साथबाट डायरी, ल्यापटप र पार्टीको महत्वपूर्ण कागजात बरामद गरिएको छ ।

प्रकाण्ड पक्राउ गर्ने योजनामा थियो प्रहरी

प्रहरी स्रोतका अनुसार ललितपुर र मकवानपुरको सीमा क्षेत्र गिम्दीबाट उनीहरू पक्राउ परेका हुन् । उनीहरूलाई अहिले गिम्दी प्रहरी चौकीमै राखिएको छ । प्रहरी स्रोतका अनुसार प्रहरी बाँस्तोलालाईभन्दा पनि विप्लव समूहका दोस्रो तहका नेता प्रकाण्डलाई पक्राउ गर्न गिम्दी पुगेको थियो ।

एक प्रहरी अधिकारीले भने, ‘हामी विश्वकर्मा (प्रकाण्ड)लाई पक्राउ गर्न पुगेका थियौँ । उनी त्यहाँ थिएन । तर, बाँस्तोला र विश्वकर्माका सहयोगी अपरझट देखिए । हामीले दुवै जनालाई नियन्त्रणमा लिइहाल्यौँ ।’

प्रकाण्डको खोजीमा अप्रेशन चलाएको प्रहरीसँग ठूलो टिम पनि नभएको त्यहाँ पुगेका एक प्रहरीको भनाइ छ । प्रकाण्ड पनि त्यही क्षेत्रमा रहेको अनुमानमा खोजीका लागि मकवानपुर प्रहरीसँगको समन्वयमा ठूलो संख्यामा प्रहरी परिचालन गरिएको छ ।

यसरी पुग्यो प्रहरी गिम्दी

प्रकाण्डका सहयोगी कुमाल केही दिनदेखि मकवानपुर सीमामा रहेकाे सूचना प्रहरीले पाएकाे थियो । दुई दिनअघि उनी मकवानपुर हुँदै गिम्दी पुगेकाे खबर थाहा पाएपछि बुधबार प्रहरी त्यहाँ पुगेको हो ।

त्यसाे त प्रहरीसँग प्रकाण्ड पनि गिम्दी रहेको सूचना थियो । साे सूचनाका आधारमा प्रकाण्डलाई पक्राउ गर्न नसके पनि बास्तोला र कुमाललाई भने प्रहरीले नियन्त्रणमा लिन सफल भएको हो । साेही क्षेत्रमा अहिले पनि प्रकाण्डकाे खाेजी तीव्र भइरहेकाे प्रहरीले जनाएको छ ।

प्रकाशित मिति: बुधबार, पुस २९, २०७७ १७:४९