६ महिनामै बिग्रिए कोरोना अस्पताल बुटवलका आईसीयू उपकरण

कोरोना विशेष अस्पतालले गौतमबुद्ध मुटु अस्पताललाई फिर्ता गरेका आईसीयू बेड । तस्वीर : विकास पराजुली/शिलापत्र

A+ A A-

बुटवल धागो कारखानास्थित कोरोना विशेष अस्पतालको आईसीयूमा रहेका उपकरण ६ महिनामै बिग्रिएका छन् । आईसीयूमा कार्यरत स्वास्थ्यकर्मीको वेवास्थाका कारण लाखाैँ रुपैयाँ पर्ने भेन्टिलेटरसहितका उपकरण बिग्रिएका हुन् ।

बुटवल उपमहानगरपालिकाको संरचनागत व्यवस्थापन र लुम्बिनी प्रादेशिक अस्पतालको चिकित्सीय व्यवस्थापनमा वैैशाखदेखि आईसीयू सेवा सुरु गरिएको थियो । तत्कालका लागि आईसीयूका उपकरण खरिद गर्न खरिद ऐन बाधक भएपछि प्रदेश सरकार र उपमहानगरपालिकाको पहलमा बुटवलको गौतमबुद्ध सामुदायिक मुटु अस्पतालले आईसीयूका लागि चार वटा भेन्टिलेटरसहित आठ बेड प्रदान गरेको थियो ।

१ करोडभन्दा बढी लगानीको भेन्टिलेटर र बेड अस्पतालले आईसीयूका लागि प्रदान गरे पनि ६ महिनामै उपकरण काम नलाग्ने गरी बिग्रिएका छन् । तत्काल खरिद गर्न नसक्ने अवस्थामा आफूसँग भएका भेन्टिलेटर अस्पताललाई प्रदान गरेको भए पनि उपकरण बिगारेर फिर्ता गरेको गौतमबुद्ध अस्पतालका अध्यक्ष एजाज आलमले बताए । ‘हामीले संकटको अवस्थामा सहयोग गर्नुपर्छ भनेर उपकरण दियौँ । तर, त्यहाँ पठाएका उपकरण कामै नलाग्ने गरी पठाइएको छ,’ उनले भने ।

हाल गौतमबुद्ध अस्पतालमा रहेका आईसीयू र भेन्टिलेटर लामो समय राम्रोसँग चलेको भए पनि कोरोना अस्पतालका स्वास्थ्यकर्मी, कर्मचारीकै लापरबाहीका कारण उपकरण ६ महिनामै बिग्रिएका अध्यक्ष आलमको आरोप छ । कोरोना विशेष अस्पतालले फिर्ता पठाएका आईसीयू उपकरण अहिले गौतमबुद्ध अस्पतालले बाहिरै थन्काएको छ ।

अस्पतालका व्यवस्थापक कमल भण्डारीले भेन्टिलेटरका केही पाटपुर्जा नै नभएको बताए । ‘भेन्टिलेटरका कतिपय मनिटरले समेत काम गर्दैनन् । एउटा मनिटर त ड्यामेज नै भएको छ । बेड पनि कवार्ड जस्तै बनेर आएका छन्,’ उनले भने ।

उद्योग पर्यटन वन तथा वातावरणमन्त्री लिला गिरीले कर्मचारीको बदमासीका कारण उपकरण बिग्रिएको भनेर आफूलाई समेत गुनासो आएको बताए । ‘हामीले प्रयोग भएका उपकरण अस्पताललाई नयाँ किनेर दिने सोच बनाएका थियौँ । खै कहाँबाट त्यस्तो हुन पुग्यो । यसले हामीलाई पनि लज्जित बनाएको छ,’ उनले भने ।

कोरोना विशेष अस्पतालका फोकलपर्सन डा. सुदर्शन थापाले भने काम गर्ने क्रममा भेन्टिलेटर बिग्रिएको भए पनि ममर्त गरेरै फिर्ता गरेको बताए ।

‘उहाँहरूले पनि हामीलाई नयाँ दिनु भएको होइन । बनाउँदै/चलाउँदै गरेको भेन्टिलेटर र बेड दिनुभएको थियो । हामी कहाँ पनि काम गर्ने क्रममा बिग्रिएको हो । ममर्त गरेर दिएका हौँ,’ उनले भने । डा. थापाले कामै नलाग्ने गरी भेन्टिलेटर बिग्रिएको भन्ने विषय सत्य नभएको बताए ।

धागो कारखानामा बुटवलका ३६ वटा संघसंस्थाको ४१ लाखभन्दा बढी रकम सहयोग गरेपछि आईसीयू सञ्चालनमा आएको थियो । हाल कोरोना विशेष अस्पतालको आईसीयूमा १० र भेन्टिलेटरमा दुई जना उपचाररत छन् ।

प्रकाशित मिति: मंगलबार, पुस २८, २०७७ १२:३७