तलबसमेत नपाउने एलन मस्कको सम्पत्ति एक वर्षमा कसरी सात गुणा बढ्यो ?

A+ A A-

टेस्ला र स्पेसएक्सका सीईओ एलन मस्क संसारका सबैभन्दा धनी व्यक्ति बनेका छन् ।

ब्लुमबर्गका अनुसार गत बिहीबार टेस्लाको शेयर मूल्य ४.८ प्रतिशत बढ्यो र मस्कको कुल सम्पत्ति १८८.५ अर्ब डलर भयो । अमेजनका मालिक जेफ बेजोसको कुल सम्पत्ति १८७ अर्ब डलर छ ।

मस्कले आफू संसारको सबैभन्दा धनी बने पनि मंगलसम्म पुगेर मात्रै खुसी हुने बताएका थिए । सन् २०१६ मा भनेका थिए, ‘हामी मंगलमा आफ्नै कोलोनी नबसालेसम्म खुसी हुने छैनौँ ।’

एलन मस्क जनवरी २०२० मा विश्वका धनी व्यक्तिको सूचीमा ३५औँ स्थानमा थिए । तर, १० महिनामा उनले बिल गेट्सलाई पछि पारे र एक वर्षमा जेफ बेजोसलाई पछि पार्दै पहिलो नम्बरमा आए । एक वर्षमा उनको सम्पत्ति ७ गुणाले बढेको छ ।

१० वर्षको उमेरमा नै भिडियो गेम

एलन मस्कको जन्म २८ जून, १९७१ मा दक्षिण अफ्रिकाको प्रिटोरियामा भएको थियो । उनकी आमा माये मस्क क्यानडाकी मोडल हुन् । उनका बाबु एरोल मस्क भने दक्षिण अफ्रिकाका इलेक्ट्रो मेकानिकल इन्जिनियर थिए ।

एलन मस्क नाै वर्षको हुँदा उनका आमाबाबुको सम्बन्धविच्छेद भएको थियो । एलन १० वर्षको हुँदा उनले कम्प्युटर कोडिङको कोर्स सिकेका थिए ।

त्यसपछि उनले भिडियो गेम ब्लास्टर बनाए । यो भिडियो गेमलाई उनले १२ वर्षको उमेरमा ५ सय डलरमा बेचिदिए ।

उनले अर्थशास्त्र र भौतिक विज्ञानमा डिग्री गरेका छन् । १९९५ मा उनी विद्यावारिधि (पीएचडी) का लागि अमेरिकाको स्टेनफोर्ड विश्वविद्यालयमा गए पनि आफ्नो व्यवसाय सुरु गर्न उनले दुई दिनमा नै कलेज छाडिदिए ।

लगानीसहित टेस्लामा प्रवेश

उनले टेस्ला कम्पनी सुरु गरेका हाेइनन् । जुलाई २००३ मा मार्टिन एबरहार्ड र मार्क टारपेनिङले टेस्ला मोटर्स सुरु गरे ।

फेब्रुअरी २००४ मा एलन मस्कले यसमा ७५ लाख डलर लगानी गरे । यो लगानीसहित उनी टेस्लाको अध्यक्ष बने । अक्टोबर २००८ मा एलन मस्क टेस्लाको सीईओ बने ।

त्यसबेलासम्म उनले ७ करोड डलर लगानी गरिसकेका थिए । जून २०१० मा टेस्लाले आईपीओ लन्च गर्‍यो । यसमा कम्पनीको शेयर १ हजार २२९ प्रतिशतले बढ्यो ।

एउटा यस्तो समय पनि आयो, जतिबेला टेस्लाले ऋणसमेत लिनुपर्‍यो । टेस्लाले २००९ मा अमेरिकी सरकारबाट ४६.५ करोड डलर ऋण लियो । यो ऋण २०१३ मा तिर्‍यो ।

टेस्लाबाट कति कमाउछन् मस्क ?

एलन मस्कसँग टेस्लाको २०.८ प्रतिशत शेयर छ । जसको मूल्य हाल १५० अर्ब डलरभन्दा बढी हो । पछिल्लो एक वर्षमा टेस्लाको शेयर ७ सय प्रतिशतभन्दा बढीले बढेको छ । यही कारण धनीहरूको सूचीमा ३५ नम्बरमा रहेका एलन मस्क एकै वर्षमा पहिलो नम्बरमा आएका हुन् ।

२०२० मा मस्कको कुल आयमा १४० अर्ब डलरभन्दा बढी बढ्यो । फोर्ब्सले संसारका अर्बपतिहरूको सूची बनाउन सुरु गरेपछि पहिलो पटक कुनै अर्बपतिले एक वर्षमा यतिधेरै सम्पत्ति आर्जन गरेको जनाएको छ ।

रमाइलो कुरा त के छ भने टेस्लाबाट मस्कले कुनै तलब समेत पाउँदैनन् । उनले २०१९ मा २३ हजार ७६० डलर बेसिक तलबका रूपमा पाएका थिए । यो पाउनुको कारण भनेको क्यालिफोर्नियामा न्यूनतम बेसिक तलब दिनुपर्ने कानुन छ ।

सन् २०२८ सम्म मस्कले टेस्लाबाट तलब पाउने छैनन् । अब प्रश्न उठ्छ कि कमाइ कसरी हुन्छ ? यद्यपि मस्क र टेस्लाबीच एक प्रकारको सम्झौता भएको छ । जसमा कम्पनीको बोर्डले १६ वटा कोसेढुंगा तय गरेको छ । एलन मस्कमाथि यो पूरा गर्नुपर्ने जिम्मेवारी छ । यी कोसेढुंगा पार हुँदै जाँदा मस्कलाई कम्पनीको करिब १७ लाख शेयर प्राप्त हुनेछ ।

यो सम्झौताअनुसार आगामी १० वर्षमा टेस्लाको २ करोड २ हजार शेयर १२ किस्तामा प्राप्त हुनेछ । मे २०२० मा उनले १७ लाख शेयर पाएका थिए । यो शेयर उनलाई ३५०.०२ डलरको स्ट्राइक मूल्यमा प्राप्त हुनेछ । तर, मस्कको कमाइ त्यसबेला शेयर मूल्यअनुसार तय हुनेछ ।

टेस्लामाथि कोरोनाको असर देखिएन

२०२० मा संसारमा कोरोना महामारीले ठूलो नोक्सान पुर्‍यायो । तर, टेस्लामा यसको असर देखिएन । २ जनवरी, २०२० मा टेस्लाको शेयरमूल्य ८६.०५ डलर थियो । जुन ८ जनवरी, २०२१ मा बढेर ८१६.०४ डलर भएको छ । यसको अर्थ एक वर्षमा कम्पनीको शेयर मूल्य ८५० प्रतिशत बढेको छ ।

शेयर मूल्य मात्रै होइन, कम्पनीको मुनाफा पनि बढेको छ । ३१ डिसेम्बर, २०१९ को तीन महिनामा कम्पनीको ८२७ करोड डलर मुनाफा भएको थियो । जुन सेप्टेम्बर २०२० मा बढेर २ हजार १९८ करोड भएको छ । अर्थात् मुनाफा समेत १६५ प्रतिशतभन्दा बढीले वृद्धि भएको छ । यसैगरी, सेप्टेम्बर २०२० मा कम्पनीको रेभेन्यु पनि ठूलो मात्रामा बढेको छ ।

अरु कहाँबाट कमाउँछन् एलन मस्क ?

एलन मस्क टेस्लाका सीईओ हुनुका साथै स्पेसएक्सका पनि सीईओ हुन् । स्पेसएक्स निजी कम्पनी हो र यसबारेमा उति धेरै जानकारी बाहिर नआउने भएका कारण त्यसको वास्तविक तथ्यांक बाहिर आउँदैन ।

जुलाई २०२० मा मोर्गन स्टेनलीले आफ्नो अनुसन्धानमा स्पेशएक्सको बजार मूल्य २०० अर्ब डलरसम्म हुन सक्ने अनुमान गरेका थिए । सीएनबीसीको रिपोर्टअनुसार स्पेसएक्समा मस्को १५.३ अर्ब डलरको शेयर छ ।

यसका साथै मस्क बोरिङ कम्पनीका पनि संस्थापक हुन् । यो कम्पनी मस्कले २०१८ मा स्थापना गरेका थिए । यो कम्पनी ११.२ करोड डलरमा सुरु गरिएको थियो । यसको ९० प्रतिशत शेयर मस्कको छ ।

प्रकाशित मिति: सोमबार, पुस २७, २०७७ ०७:४०