प्रदेश २ मा प्रचण्ड-नेपाललाई 'काउण्टर' दिँदै ओली समूहको शक्ति प्रदर्शन

A+ A A-

नेकपाको ओली समूहले प्रचण्ड-नेपाल समूहको विरोध प्रदर्शनलाई काण्टर दिँदै प्रदेश- २ मा शक्ति प्रदर्शनमा उत्रिएको छ । संसद् विघटन असंवैधानिक भएको भन्दै प्रचण्ड-नेपाल समूहले कामचलाउ सरकारका प्रधानमन्त्री ओलीविरुद्ध विरोध प्रदर्शनमा उत्रिएको बेला ओली समूहले त्यसलाई काउण्टर दिँदै प्रदेशका विभिन्न जिल्लामा आफ्ना नेता-कार्यकर्ता उतारेको हो ।

संसद् विघटन गर्नुको कारण र चाल्नुपर्ने अगामी कदमको विषयमा प्रशिक्षण दिन नेकपाको अगुवा नेता तथा कार्यकर्ता भेला भन्दै ओली समूहले हजारौँ नेता-कार्यकर्ता सडक उतार्दै आएको छ । उनीहरूले प्रधानमन्त्री ओलीलगायत नेकपाका नेताहरूको समर्थन, प्रचण्ड-नेपाल समूहका नेताहरूको विरोध र संसद् विघटनलाई बाध्यात्मक परिस्थितिको रूपमा व्याख्या गर्दै प्रदर्शन गर्दै आएको छ ।

सोही क्रममा मंगलबार ओली समूहले जनकपुरमा समेत अगुवा कार्यकता भेलापूर्व शक्ति प्रदर्शन गरेको हो । जिल्लाभरबाट आएका नेता-कार्यकर्ताले जनकपुरधामस्थित रेल्वे स्टेशनबाट विभिन्न चोक परिक्रमा गर्दै र्‍याली प्रदर्शन गरेको छ । नेकपाको प्रदेश पार्टी कार्यालयमा आयोजित भेला कार्यक्रममा उपप्रधानमन्त्री ईश्वर पोखरेल, महिला तथा बालबालिकामन्त्री जुली महासेठलगायतका वक्ता रहेका छन् ।

यसअघि सिरहा र पर्सालगायतका जिल्लामा समेत भेला बोलाइएको थियो । भेलामा नेता कार्यकर्तालाई संसद् विघटना संवैधानिक, बाध्यात्मक परिस्थितिपछि चालिएको सही कदम र चुनावको तयारीको विषयमा प्रशिक्षण दिँदै आएको एक जना प्रदेशसभा सदस्यले जानकारी दिए ।

यता, प्रचण्ड-नेपाल समूहले संसद् विघटनविरुद्ध प्रदेश- २ मा जिल्लादेखि स्थानीयस्तरसम्मै साताव्यापी संघर्षको घोषणा गरिसकेका छन् ।