भिजिट भिसाको चक्करः काठमाडाैंका होटल र यूएईका घरमा बन्धक

A+ A A-

रोजगारीको प्रलोभनमा भिजिट भिसामा यूएई पुगेका नेपालीहरू काम नपाएपछि अलपत्र पर्न थालेका छन् ।

नेपालबाट म्यानपावर, कन्सल्टेन्सी, ट्राभल र एजेन्टले रोजगारीका विभिन्न प्रलोभनमा पारेर यूएई पठाएका धेरै नेपाली काम नपाएपछि अलपत्र अवस्थामा बसेका छन् ।

नेपालबाट भिजिट भिसामा लगिएका महिलाहरूलाई भाडामा घर लिएर एजेन्टले राख्ने गरेको पाइएको छ । नेपालबाट यूएई पुगेका धेरै नेपाली महिलालाई एजेन्टले घरभित्र बन्धक बनाएर राखेको चितवनकी दिलप्रिया बराइली (नाम परिवर्तन) ले यूएईबाट जानकारी दिइन् ।

नेपालबाट भिजिट भिसामा ल्याएका महिलाहरूलाई डान्सबार, रेष्टुरेन्ट र घरेलु काममा छानीछानी पुर्‍याइरहेको दिलप्रियाले बताइन् ।

‘यूएई पुगेका महिलालाई अन्य देशमा पनि पुर्‍याउने गरेका छन् । नेपालबाट यूएईका उद्योग, होटल, अस्पताल र सुपरमार्केटको रोजगारीमा भनेर ल्याउँछन् । तर, अन्त्यमा साउदी, ओमान, बहराइन, कुवेत, इरानसम्म घरेलु कामदारका रूपमा लैजाँदारहेछन्’, उनले भनिन्, ‘भिजिट भिसामा आएका नेपाली महिलालाई साथमा पासपोर्ट राख्न दिइँदैन । पासपोर्ट नभएपछि बाहिर निस्कन पाइँदैन । जसका कारण एजेन्टले जे भन्छन्, त्यही मानेर घरभित्रै बस्नुपर्छ । हरेक तीन दिनमा एजेन्टले घर परिवर्तन गर्छन् ।’

भिजिट भिसामा आएका हामी अलपत्र र घरभित्र बन्धक बनाएर एजेन्टले राखेका छन् भनेर यूएईस्थित नेपाली दूतावासमा सम्पर्क गर्दा वास्ता नगर्ने गरेको उनको गुनासो छ ।

यूएईको अजमान शहरमा भिजिट भिसामा पुगेका २ हजारभन्दा धेरै नेपाली महिला रहेको उनले जानकारी दिइन् ।

यस्तै, गत महिना भिजिट भिसामा यूएई पुगेका पोखराका दिपेन्द्र गुरुङ नेपालमा एजेन्टले भनेजस्तो रोजगारी नपाएपछि स्वदेश फर्कनका लागि यूएईस्थित नेपाली दूतावासलाई सहयोग मागिरहेका छन् ।

नेपालमा एजेन्टले सुरक्षा गार्डको रोजगारीमा भनेर भिजिट भिसामा पठाएपनि यूएईमा त्यो रोजगारी नपाएको गुरुङले बताए ।

‘नेपालबाट एजेन्टले सुरक्षा गार्डको रोजगारी पाइन्छ भनेर पठाएको थियो । तर, कोरोना भाइरसका कारण यूएईमा सुरक्षा गार्डको काम अहिलेसम्म पाइनँ । नेपालमा एजेन्टले भनेजस्तो यूएईमा सजिलो गरी रोजगारी पाइँदैन’, उनले भने, ‘भिजिट भिसामा रोजगारीको प्रलोभनमा परेर आएका नेपालीहरूको यूएईमा बिजोग हुँदोरहेछ । नेपालबाट राम्रो रोजगारीको प्रलोभन देखाएर एजेन्ट पठाउँछन् । तर, यूएईमा रोजगारी पाउन धेरै मुस्किल पर्छ ।’

एजेन्टको प्रलोभनमा परेर रोजगारी पाइन्छ भनेर भिजिट भिसामा नआउन गुरुङको आग्रह छ । भिजिट भिसामा कामदार पठाउने म्यानपावर, कन्सल्टेन्सी, ट्राभल र एजेन्टले प्रतिव्यक्ति ३ लाखसम्म रकम लिने गरेको उनको भनाइ छ ।

म्यानपावर, कन्सल्टेन्सी, ट्राभल र एजेन्ट राम्रो र छिटो काम पाइने प्रलोभनमा पारी चर्को रकम असुली गरिरहेको पाइएको छ । यूएई भिजिट भिसामा पठाएका ९३ प्रतिशत नेपाली रोजगारीका लागि जाने गरेको सरकारी तथ्यांक छ ।

होलटमा बन्धक

भिजिट भिसामा रोजगारीमा पठाउन कामदारलाई म्यानपावर कम्पनीले १५ दिनसम्म होटलमा बन्धक बनाएर राख्ने गरेको पाइएको छ । वैदेशिक रोजगार विभागले सोमबार भिजिट भिसामा कामदार पठाउँदै आएको म्यानपावरमा छापा हानेको थियो ।

विभागले भिजिट भिसामा कामदार पठाउन लागेको सूचना पाएपछि बेबीस्टार इन्टरनेसनल प्रा.लि (लाइसेन्स नम्बर १०८१/०७३/७४) मा छापा मारेको छ । उक्त म्यानपावरले गौशालामा रहेको रोयल सिराहा होटल एण्ड गेष्ट हाउसमा भिजिट भिसामा पठाउन लागेका नाै जना युवालाई एक सातादेखि बन्धक बनाएर राखेको तथ्य विभागको टोली छापा मार्ने क्रममा फेला परेको थियो ।

भिसा लागेपछि भोलि उडाउने भन्दै म्यानपावरले एक सातादेखि होटल बाहिरसम्म जान नदिई राखेको पीडित बच्चु पासवानले शिलापत्रलाई बताए ।

सिराहाबाट यूएईमा रोजगारीमा जाने भनेर एजेन्टले नाै दिनअगाडि काठमाडौं बोलाएर होटलमा राखेको पासवानले बताए ।

‘एजेन्टले यूएई रोजगारीमा पठाउने भन्दै २ लाख ६० हजार रकम लिएको छ । तर, भोलि–भोलि भन्दै एक सातादेखि होटल बाहिर निस्कन दिएको छैन’, उनले भने ‘एकतिर पैसा गयो । अर्कोतिर भिजिट भिसामा पो पठाउन लागेको रहेछ । हामीलाई यूएईको स्टार होटलमा सरसफाइको रोजगारीमा पठाउने भनेर एजेन्टले झुक्यायो ।’

भिजिट भिसामा यूएई जानका लागि ठगिएका गंगु यादव, कारिमा पासवान, विष्णु यादव, बच्चु पासवान, रामकुमार पासवान, श्यामकुमार पासवान र दिपेन्द्र पासवान रहेको विभागले जानकारी दिएको छ ।

उनीहरूलाई एजेन्ट श्याम सुन्दरले बेबीस्टार म्यानपावरसँग मिलेर भिजिट भिसामा नै पठाउन भन्दै विगत एक हप्तादेखि होटलमा राखेको पीडितले विभागको टोलीलाई बताएका थिए ।

उनीहरूलाई श्याम सुन्दर शाहले ल्याएको र यूएई भिजिट भिसामा जाने धेरैकाे पासपोर्ट राखेको पाइएको विभागले जनाएको छ ।

विभाग र नेपाल प्रहरीसहितको संयुक्त टोली भिजिट भिसामा कारोबार गर्ने म्यानपावर सञ्चालकसहित एजेन्ट खोज्दै विभागको टोलीले होटलमा पीडितलाई भेटिएको विभागका अनुगमन अधिकृत कुशल बरालले जानकारी दिए ।

भिजिट भिसामा यूएई जान आएका व्यक्ति एजेन्टमार्फत म्यानपावरसम्म आउने गरेको पाइएको अधिकृत बरालले बताए ।

‘होटलमा भेटिएका दुई जनाको भिजिट भिसा लागेको टिकटसहित पासपोर्ट समेत बरामत गरेको छ । धेरै जना भिजिट भिसामा जान आए पनि अन्य व्यक्तिको पासपोर्ट भेटिएन । विभागले भिजिट भिसामा कामदार पठाउने म्यानपावरको खोजी गरिरहेको छ ।’

विभागको टोलीले म्यानपावर कम्पनी र होटलमा पासपोर्ट भेटेको छैन । यसबारे थप अनुसन्धान गर्ने र आवश्यक कारबाही प्रक्रिया अगाडि बढाउने उनको भनाइ छ ।

भिजिट भिसामा रोजगारीमा कामदार पठाउँदै आएका म्यानपावर, कन्सल्टेन्सी, ट्राभल र एजेन्टले होटलमा बन्धक नै बनाएर राख्ने गरेको सूचना आएको विभागले जानकारी दिएको छ ।

प्रकाशित मिति: मंगलबार, पुस २१, २०७७ १४:००