भिजिट भिसाका कारण यूएईबाट आउने कामदारको माग गुम्ने खतरा

A+ A A-

रोजगारीको खोजीमा रहेका युवालाई विभिन्न प्रलोभन देखाई वैदेशिक रोजगारीको नाममा ठगी गर्ने गिरोहले पछिल्लो समयमा भिजिट भिसामा धमाधम कामदार युएई ओसार्न थालेका छन् । वैदेशिक रोजगारीमा जान इच्छुक रहेका व्यक्तिलाई राम्रो रोजगारीको प्रलोभन देखाई दलाल र गिरोहले भिजिट भिसामा कामदार युएई पठाइरहेका छन् ।

दलाल र गिरोह भिजिट भिसामा कामदार पठाउँदा राम्रो र छिटो काम पाइने प्रलोभनमा पारी चर्को रकम असुली गरिरहेको पाइएको छ । म्यानपावर, कन्सल्टेन्सी, ट्राभल र एजेन्टले यूएई भिजिट भिसामा पठाएका ९३ प्रतिशत नेपाली रोजगारीका लागि जाने गरेको गृह मन्त्रालयको अध्ययनले देखाएको छ ।

यूएईमा बसेर सेटिङ, डिमाण्ड गुम्ने खतरा

भिजिट भिसाका नाममा दलाली गर्ने नेपालीहरुको संख्या बढेको वैदेशिक रोजगार विभागले जनाएको छ । कोरोना भाइरसका कारण वैदेशिक रोजगारीमा कामदार पठाउन बन्द भएपछि कतिपय म्यानपावर कम्पनीले नै सेटिङ गरेर कामदार भिजिट भिसामा यूएई पठाउँदै आएको तथ्य विभागसँग छ ।

विभागले भिजिट भिसामा कामदार पठाउँदै आएका कतिपय म्यानपावरमा छापा समेत मार्दै आएको छ । बेरोजगारीको फाइदा उठाउँदै राम्रो जागिरको आश्वासन देखाएर नेपाली युवा ठग्ने गिरोह सक्रिय हुँदै गएका छन् ।

यूएईमा बसेर भिजिट भिसाका गिरोहले नेपालमा एजेन्ट राखेर कामदार ओसार्ने गरेको वैदेशिक रोजगार विभागका महानिर्देशक कुमारप्रसाद दाहाल बताउँछन् । युएईमा बसेर नेपालबाट भिजिट भिसामा कामदार ओसार्ने गिरोह सक्रिय रहेको सूचना विभागमा आएको महानिर्देशक दाहालले बताए ।

‘भिजिट भिसामा जाने व्यक्ति पनि दलालबाट ठगिएपछि मात्र उजुरी लिएर आउँछन् । भिजिट भिसाका नाममा ठगिएका कतिपय पीडितलाई आफूलाई लैजाने व्यक्तिका बारेमा जानकारी समेत हुँदैन्’, उनले भने, ‘विभागले भिजिट भिसामा कामदार पठाउने म्यानपावर, कन्सल्टेन्सी, ट्राभल र एजेन्टमाथि कडा निगरानी राख्दै आएको छ । भिजिट भिसामा कामदार पठाउँदै आएका १ दर्जन म्यानपावर, कन्सल्टेन्सी, ट्राभल र एजेन्ट छापा मारेर कागतजात समेत जफत गरेको छ ।’

रोजगारीको लोभमा भिजिट भिसामा बाहिर नजान विभागले सूचनामार्फत सम्बन्धित व्यक्तिलाई जानकारी समेत गराइरहेको उनको भनाइ छ ।

म्यानपावर, कन्सल्टेन्सी, ट्राभल र एजेन्टले सबैभन्दा धेरै भिजिट भिसामा यूएईमा नेपाली पठाइरहेका छन् । जसका कारण नेपाललाई यूएईका रोजगारदाता कम्पनीले दिँदै आएको कामदारको कोटा गुम्ने खतरा बढ्दै गएको वैदेशिक रोजगार व्यवसायीहरुले चिन्ता व्यक्त गर्न थालेका छन् ।

भिजिट भिसाका नाममा कामदार म्यानपावर, कन्सल्टेन्सी, ट्राभल र एजेन्टले ओसार्न थालेपछि यसको प्रभाव यूएईका रोजगारदाता कम्पनीले नेपालका लागि छुट्याउने कोटामा पर्ने थालेको वैदेशिक रोजगार व्यवसायी संघका महासचिव सुजित श्रेष्ठ बताउँछन् ।

सरकारले भिजिट भिसामा गइरहेका व्यक्तिका बारेमा राम्रो अनुसन्धान गरेन र पठाउने दलाललाई कानुनी दायरामा ल्याउन नसक्दा यूएईबाट आउने कामदारको कोटा नै जोखिममा पर्ने थालेको महासचिव श्रेष्ठले बताए ।

‘नेपालबाट भिजिट भिसामा गएका व्यक्ति घुम्नका लागि गएका होइनन् । भिजिट भिसामा गएका काम खोजेर बस्छन् । रोजगारदाता कम्पनीले बाहिरबाट खर्च गरेर कामदार ल्याउनुभन्दा भिजिट भिसामा गएका व्यक्ति नै राख्छन्’, उनले भने, ‘भिजिट भिसामा जाने व्यक्तिका कारण नेपालबाट रोजगारीमा जाने अन्य व्यक्तिको अवसर गुम्दै छ भने भिजिट भिसामा जाने व्यक्तिसँग श्रम स्वीकृति समेत हुँदैन । जसका कारण भोलि केही भयो भन्ने उद्धार गर्न सरकारलाई समेत समस्या पर्छ । भिजिट भिसामा कामदार लैजाने संस्था र व्यक्तिका बारेमा सरकारले गम्भीर भएर काम गर्नुपर्छ ।’

भिजिट भिसाका कारण यूएईबाट आउने कामदारको कोटा समेत घट्न थालेको उनको भनाइ छ । भिजिट भिसामा कामदार ओसार्ने दलाल र एजेन्ट सक्रिय भएपनि सरकारले दोष म्यानपावरमाथि लगाउँदै आएको उनको आरोप छ ।

भिजिट भिसामा कामदार पठाउन एजेन्ट र दलालमाथि मानव बेचबिखन सम्बन्धी कारबाही गर्नुपर्ने महासचिव श्रेष्ठको माग छ ।

यूएईसँगै खाडीका अन्य देशमा समेत ट्राभल एजेन्सी, कन्सल्टेन्सी, म्यानपावर कम्पनी र तिनैका प्रतिनिधि एजेन्टले भिजिट भिसाका नाममा रोजगारीमा कामदार पठाइरहेको पाइएको हो ।

यूएई नेपाली कामदारको प्रमुख रोजगारगन्तव्य देशभित्र पर्छ । नेपालबाट रोजगारीका लागि वार्षिक ७० हजारभन्दा धेरै नेपाली युएई पुग्ने गरेका छन् ।

भदौयता ११ हजार भिजिट भिसामा यूएई, कडा गर्न थालेपछि घटे

कोरोना भाइरस (कोभिड–१९) का कारण बन्द भएको अन्तर्राष्ट्रिय हवाई सेवा सञ्चालनमा आएयता झण्डै ११ हजार नेपाली भिजिट भिसामा यूएई पुगेको अध्यागमन विभागको तथ्यांकमा छ ।

अध्यागमन विभागका अनुसार गत १६ भदौयता अन्तर्राष्ट्रिय हवाई सेवा सञ्चालनमा आएपछि १० हजार ८ हजार ९ सय ६४ नेपाली भिजिट भिसामा यूएई पुगेका छन् । पछिल्लो समय भिजिट भिसामा जाने नेपाली संख्या बढ्न थालेपनि गृहमन्त्रालय कडाई गर्न थालेको छ ।

पछिल्लो एक महिनामा सेटिङमा भिजिट भिसामा यूएई जान टिकट लिएका करिब ९ सय जना रोकिएको अध्यागमन विभागले जानकारी दिएको छ ।

सरकारले निश्चित मापदण्ड तोकेर सोही अनुसारको आवातजावत सहज नगर्दासम्म भिजिट भिसामा कामदार पठाउने सेटिङ रोकिने देखिँदैन । सरकारले तोकेको मापदण्ड समेत नपुगेका नेपाली यूएई भिजिट भिसामा गइरहेको पाइएको छ ।

प्रकाशित मिति: मंगलबार, पुस २१, २०७७ ०६:५७