प्रदेश २ : मण्डललाई दलको नेताबाट हटाउन प्रचण्ड-नेपाल समूहले बोलायो बैठक

A+ A A-

प्रदेश २ को नेकपा संसदीय दलको नेताबाट सत्यनरायण मण्डललाई हटाउन प्रचण्ड–नेपाल समूहले दलको बैठक बोलाएको छ । भोलि दिउँसो १ बजे दलको बैठक बोलाइने सचेतक बेची लुंगेलीले जानकरी दिइन् ।

उनका अनुसार मंगलबार नेता मण्डललाई कारबाही गरी दलको नेताबाट हटाइने छ । मण्डलविरुद्ध एक साताअघि नै उपनेता रामकुमार यादवसमक्ष दर्ता गरिएको अविश्वासको प्रस्तावमाथि निर्णय गर्दै अर्का सांसदलाई दलको नेता चयन गरिने उनले बताइन् ।

स्थायी कमिटी सदस्यसमेत रहेका मण्डल ओली समूहका नेता हुन् । उनलाई हटाएर अध्यक्ष माधव नेपालनिकट रहेका शत्रुधन महतोलाई दलको नेता बनाउने तयारी छ । यद्यपि, अविश्वासको प्रस्ताव फेल हुने ओली समूहका नेताहरूको दाबी छ ।

अविश्वासको प्रस्तावमा १७ जना सांसदले हस्ताक्षर गरिसकेको भए पनि उनीहरूलाई फकाएर आफूतिर तान्ने प्रयास जारी रहेको ओली समूहका एक सांसदले बताए ।

‘प्रमुख सचेतक सुन्दर विश्वकर्मालगायत अन्य केही सांसद सत्यनरायण मण्डलजीको निरन्तरक सम्पर्कमै हुनुहुन्छ । अविश्वास प्रस्तावमा हस्ताक्षर गरिसकेका दुई तीन जना सांसद फेरि हाम्रैतिर फर्किने सम्भावना छ,’ उनले भने ।

यद्यपि प्रचण्ड–नेपाल समूहले भने ती सांसदहरू ओली समूहमा नजाने र उनीहरूसँग निरन्तर सम्पर्क भइरहेको दाबी गरेको छ ।

३२ जना प्रदेशसभा सदस्य रहेको प्रदेश २ मा पूर्वएमालेतर्फका २१ र पूर्वमाओवादीबाट ११ जना छन् । दुवै समहूले आ–आफ्नातर्फ सांसदलाई फकाउने प्रयास जारी राखेका छन् ।

प्रकाशित मिति: सोमबार, पुस २०, २०७७ १६:४३